ސޮނޭވާ ފުށި އަދި ސޮނޭވާ ޖާނީއިން ބޭނުންކުރާ ހަކަތައިގެ 50 އިންސައްތަ ސޯލާ ޕަވާއިން އުފައްދަން އެ ކުންފުނިން އަމާޒު ހިފައިފިއެވެ.
ސޮނޭވާއިން ބުނީ އެ ކުންފުނިން މިހާރު ވެސް އަންނަނީ ރާއްޖޭގައި އިއާދަކުރަނިވި ހަކަތައަށް ކުރާ މަސައްކަތުގައި ބޮޑެތި ކުރިއެރުންތަކެއް ހޯދަމުން ކަމަށެވެ.
އަދި މި އަހަރަށް ބ. އަތޮޅުގެ ސޮނެވާ ފުއްޓާއި ނ އަތޮޅުގެ ސޮނެވާ ޖާނީ އިން ވެސް އަމާޒު ހިފާފައި ވަނީ އާ ޕީވީ އިންސްޓޯލްމަންޓްތައް އިތުރުކޮށް ބޭނުން ކުރާ ހަކަތައިގެ 50 އިންސައްތައާ ގާތްކުރާ އަދަދަކަށް އިއާދަކުރަނިވި ހަކަތައިން އުފެއްދުމަށް ކަމަށް ސޮނޭވާއިން ބުންޏެވެ.
އަދި މީގެ ކުރިންވެސް ސޮނޭވާ ފުށީގެ ޕީވީ ސިސްޓަމުން ރިސޯޓުގެ ހަކަތަ ލޯޑުގެ ގާތްގަނޑަކަށް 12 ޕަސެންޓް ސަޕްލައިކޮށްފައިވާކަން އެ ކުންފުނިން ވަނީ ފާހަގަ ކޮށްފައެވެ.
ސޮނޭވާއިން ބުނީ އެ ކުންފުނީގެ އުންމީދަކީ ރާއްޖޭގެ ޓޫރިޒަމް ދާއިރާއަކީ އެއްކޮށް ކާބަން ފްރީކޮށް އޮޕަރޭޓު ކުރާ އިންޑަސްޓްރީއަކަށް ހެދުން ކަމަށެވެ.
މިހާރުވެސް ސޯލާ އެނާޖީ އެންމެ ފުރިހަމައަށް ބޭނުން ކުރުމަށް ސޮނޭވާއިން އަންނަނީ ކަނޑުގައިވެސް ފްލޯޓިން ސޯލާ ޕެނަލްތައް ބެހެއްޓުމަށް މަސައްކަތް ކުރަމުންނެވެ. އެގޮތުން އެ ކުންފުނީގެ ހދ. އަތޮޅުގެ ރިސޯޓެއްގައިވެސް ފްލޯޓިން ސޯލާ ޕެނަލް ބެހެއްޓުމުގެ މަސައްކަތް ކުރާކަން އެ ކުންފުނިން ފާހަގަ ކޮށްފައިވެއެވެ.
ސޯލާއިން ހަކަތަ އުފެއްދުމުގެ އިތުރުންވެސް ސޮނޭވާއިން އަންނަނީ، މިހާރުވެސް ހުރި ދެމެހެއްޓެނިވި ސްޓްރެޓެޖީތައް އިތުރަށް ފުޅާ ކުރުމަށް މަސައްކަތްތައް ކުރަމުންނެވެ.
ސޮނޭވާއަކީ ރާއްޖޭގެ އެކި ސަރަހައްދު ތަކުގައި ލަގްޒަރީ ރިސޯޓު ހިންގާ އޮޕަރޭޓަރެކެވެ. މިގޮތުން ބަލާއިރު އެ ކުންފުނިން ރާއްޖޭގައި ހިންގާ ސޮނޭވާ ޖާނީ ރިސޯޓަކީ ދުނިޔޭގެ މަގުބޫލުކަން ހޯދައިފައިވާ މަތީފަންތީގެ އަގުބޮޑު ރިސޯޓެކެވެ.
މި ރިސޯޓުގައި ކޮޓަރީގެ އަދަދު މަދުކޮށް، ކޮޓަރިތަކުގެ މެދުގައި އޮންނަ ހުސް ޖާގަ ވަނީ ބޮޑުކޮށްފައެވެ. މިއީ މުޅި ދުނިޔޭގައި ވެސް ބިމުގެ ނިސްބަތުން ކޮޓަރީގެ އަދަދު އެންމެ މަދު ރިސޯޓެވެ.