ވިހިވަނަ ރައްޔިތުންގެ މަޖިލީހުގެ ރިޔާސަތު ބަލަހައްޓަވާ ފަސް މެންބަރުން ކަނޑައަޅައި، މިއަދު ނަންތައް ތަރުތީބުކޮށްފިއެވެ.
ރައްޔިތުންގެ މަޖިލީހުގެ ރައީސް އަދި ނައިބު ރައީސަށް ރިޔާސަތު ނުބެލެހެއްޓޭ ހާލަތްތަކުގައި ރިޔާސަތު ބަލަހައްޓަން ޖެހޭނީ ރައްޔިތުންގެ މަޖިލީހުގައި އެންމެ ގިނަ ދުވަސްވީ މެންބަރުންގެ ތަރުތީބުންނެވެ. އެގޮތަށް ނަންތައް ތަރުތީބުކުރާނީ މަޖިލީހުގެ ރައީސެވެ.
އެގޮތުން އާ މަޖިލީހުގެ ރިޔާސަތު ބަލަހައްޓަވާ ފަސް މެންބަރުންގެ ގޮތުގައި މަޖިލީހުގެ އާ ރައީސް އަބްދުއްރަޙީމް އަބްދުﷲ ކަނޑައަޅުއްވާފައިވަނީ:
- މީދޫ ދާއިރާގެ މެންބަރު އަހުމަދު ސިޔާމް މުހައްމަދު - މަޖިލީހުގައި މެދުނުކެނޑި 19 އަހަރާއި ތިން މަސް
- މާމިގިލި ދާއިރާގެ މެންބަރު ގާސިމް އިބްރާހީމް - މަޖިލީހުގައި މެދުނުކެނޑި 15 އަހަރު
- އޭދަފުށި ދާއިރާގެ މެންބަރު އަހުމަދު ސަލީމް - މަޖިލީހުގައި މެދުނުކެނޑި 15 އަހަރު
- ހަނިމާދޫ ދާއިރާގެ މެންބަރު އަބްދުލްޣަފޫރު މޫސާ - މަޖިލީހުގައި މެދުނުކެނޑި 15 އަހަރު
- މަހިބަދޫ ދާއިރާގެ މެންބަރު އަހުމަދު ތާރިގު - މަޖިލީހުގައި މެދުނުކެނޑި 10 އަހަރު
މަޖިލީހުގެ ގަވާއިދުގެ 44 ވަނަ މާއްދާގައި އޮންނަ ގޮތުން ނަމަ މަޖިލީހުގެ ރައީސާއި ނައިބު ރައީސް ނެތް ހާލަތުގައި މަޖިލީހުގެ ރިޔާސަތާ ހަވާލުވާ ފަސް މެންބަރުން ވާން ޖެހޭނީ މަޖިލީހުގައި މެދުނުކެނޑި އެންމެ ގިނަ ދުވަހު ޚިދުމަތް ކުރެއްވި މެންބަރުންނަށެވެ.
އަދި، އެ މެންބަރުންގެ ތަރުތީބު ކަނޑައަޅާނީ އެ ފަސް މެންބަރުންގެ މެންބަރުކަމުގެ މުއްދަތަށް އިސްކަންދީގެންނެވެ. އެގޮތުން، މެންބަރުކަމުގެ މުއްދަތު ދެ މެންބަރެއްގެ ދޭތެރޭގައި ހަމަހަމަވެއްޖެ ހިނދެއްގައި އެފަދަ މެންބަރުން ތަރުތީބުކުރާނީ އެ މެންބަރުންގެ އުމުރުގެ ދޮށީކަމަށް އިސްކަންދީގެން ކަމަށް ވެސް މަޖިލީހުގެ ގަވާއިދުގައިވެއެވެ.
ލިސްޓުގެ ކުރީގައި ތިއްބެވި ސިޔާމް، ގާސިމް، އަދި އަބްދުލްޣަފޫރަކީ މިދިޔަ 19 ވަނަ މަޖިލީހުގައި ވެސް ރިޔާސަތު ބެލެހެއްޓެވި މެންބަރުންނެވެ.
ފާހަގަކޮށްލެވޭ ގޮތުގައި މިދިޔަ 19 ވަނަ މަޖިލީހުގައި ވެސް ސިޔާމް، ގާސިމް ޣަފޫރު އަދި ސަލީމް ތިއްބެވިއެވެ. އެކަމަކު، އެ ފަހަރު އެމްޑީޕީން އިޚުތިޔާރުކުރީ ލިސްޓުގެ ތިންވަނައަށް ޣަފޫރެވެ.