ށ. އަތޮޅުގެ ގިނަ ރަށްތަކެއް ހިމެނޭހެން މާލެ ދަތުރުކުރާ އުޅިއަށި ބޯޓު ގިނަ އަދަދެއްގެ މުދަލާއެކު އަޑިއަށް ހިނގައްޖެއެވެ.
މާލެއިން ށ. އަތޮޅަށް ދަތުރުކުރުމަށްފަހު މިއަދު ހެނދުނު އެ ބޯޓު އައީ ބޯޓުގައި ހުރި މުދާ ރަށްރަށަށް ބޭލުވުމަށް ދަތުރުކުރަމުންނެވެ.
އެ ބޯޓުގެ ފަޅުވެރިއަކު "ސަން"އަށް ކިޔައިދިން ގޮތުގައި ބޯޓު އަޑިއަށް ދާން މެދުވެރިވީ، މިއަދު ހެނދުނު އެ ބޯޓު ބިލެއްފަހީ ފަޅަށް ވަންނަން އުޅުމުގެ ތެރޭގައި ބަނދަރު ނެރުފައިކަށީގައި ޖެހި ގެއްލުން ވެގެންނެވެ.
އެއާއެކު ބޯޓު ވަރަށް ބޮޑަށް ދިޔަވާން ފަށައި، ބަނދަރާ ގާތްކުރިއިރު ބޯޓުގެ ބޮޑުބައެއް އޮތީ ފެނު އަޑިއަށް ގޮސްފައެވެ.
"އިތުރަށް ހަަމަ މި ވަގުތު އަޅުގަނޑުމެންނަށް ނޭނގެ ވަކި އެއްޗެއް ދަންނަވާކަށް. ބަލަމުން މި ގެންދަނީ ގެއްލުން ވީހާ ވެސް ކުޑަކުރެވޭތޯ،" އޭނާ ވިދާޅުވިއެވެ.
އުޅިއަށި ބޯޓު ބިލެއް ފަހީ ފަޅު ތެރޭ އަޑިއަށް ދަނީ -- ފޮޓޯ/ ސަން
ބޯޓު އަޑިއަށް ދިޔައިރު އޭގައި ވެސް ގިނަ އަދަދެއްގެ މުދާ ހުއްޓެވެ. އޭގެ ތެރޭގައި ގޭހާއި، ފިހާރަތަކަށް ބޭނުންވާ މުދަލާއި، އާންމުންގެ ތަކެތި ވެސް ހިމެނެއެވެ.
އުޅިއަށި ބޯޓަކީ ކަނޑިތީމުން، މާލެއާ ދެމެދު، އެ އަތޮޅު ގޮއިދުއާއި، ބިލެއްފަހީ، ފޭދުއާ ދެމެދު ދަތުރުކުރާ ބޯޓެކެވެ. އެ ބޯޓު ދަތުރުކުރަމުން އަންނަތާ ގާތްގަނޑަކަށް 17 އަހަރަށްވުރެ ދުވަސްވަނީ ވެފައެވެ.