މި އަހަރުގެ ޖުލައި މަހު ރިލީޒްކުރުމަށް ތައްޔާރުވަމުން އަންނަ އެކްޝަން ތުރިލާ "ތެހެރާން"ގެ ވަރަށް މުހިއްމު ރޯލަކަށް އިނގިރޭސިވިލާތަށް ނިސްބަތްވާ އެކްޓަރެއް ކަމަށްވާ ތާޒް ސިންގް ސޮއިކޮށްފައިވާ ކަމަށް ރިޕޯޓުތައް ބުނެފިއެވެ.
ތާޒް ސިންގްއަކީ ސައުތު ކޮރެއާގެ މަޝްހޫރު ރެޕަ އަދި މިއުޒީޝަން ކިމް ނަމްޖޫންގެ އެންމެ ފަހުގެ މިއުޒިކް އަލްބަމް 'ރައިޓް ޕްލޭސް ރޯންގް ޕާސަންގެ ލަވަ 'ލޮސްޓު'ގެ ރޯލަކުން ފުރުސަތު ލިބުނު ފުރަތަމަ ސިކް ނަސްލުގެ އެކްޓަރެވެ. ތާޒް ސިންގް ވަނީ އަކްޝޭ ކުމާރު ލީޑް ރޯލް ކުޅުނު ފިލްމު "ބެލް ބޮޓޮމް"ގެ ރޯލަކުން ވެސް ކުރިން ފެނިފައެވެ.
ތާޒް ސިންގް ފިލްމު "ތެހެރާން"އަށް ސޮއިކޮށް އޭނާއަށް ހުށަހެޅި ރޯލްގެ ޝޫޓިންގް ނިންމާފައިވާ ކަމަށް ރިޕޯޓުތަކުން ބުނެފައިވާއިރު ތާޒް ފިލްމުގައި ފެންނާނެ ރޯލާ ބެހޭ މައުލޫމާތު ވަނީ އަދި ސިއްރުކޮށްފައެވެ.
ސައުތު ކޮރެއާގެ ރެޕަ ކިމް ނަމްޖޫންގެ މިއުޒިކް އަލްބަމްއިން ތާޒްގެ ފެނިލުމާއެކު ވަރަށް ގިނަ ބައެއްގެ ސަމާލުކަން އޭނާއަށް އަންނަނީ ލިބެމުންނެވެ. ތާޒް މިހާތަނަށް މަސައްކަތް ކޮށްފައިވާ ބޭރުގެ ފިލްމީ ޕްރޮޖެކްޓްތަކުގެ ތެރޭ "ލޮސްޓް އެންޑް ފައުންޑް"ގެ ނަމުގައި އުފެއްދި ޖަޕާނު ފިލްމު ހިމެނެއެވެ.
މި ފިލްމު ބިނާކޮށްފައި ވަނީ ކޮވިޑް-19އިގެ ޕެންޑަމިކްގެ މައްޗަށެވެ. މީގެއިތުރުން އޭނާ ވަނީ އިޓަލީގައި އުފެއްދި ސްޕޯޓްސް ކްރައިމް ޓީވީ ސީރީސްއެއްގައި ވެސް މަސައްކަތްކޮށްފައެވެ.
ޖޯން އަބްރަހަމް އަދި ބަތަލާ މަނޫޝީ ޗިލަ މުހިއްމު ރޯލް ކުޅޭ ފިލްމު "ތެހެރާން" އަކީ މެޑްޑޮކް ފިލްމްސްގެ އުފެއްދުމެކެވެ. މި ފިލްމު ރިލީޒްކުރުމަށް ނިންމާފައި ވަނީ ޖުލައި މަހުގެ 19ވަނަ ދުވަހުއެވެ.