ހުޅުމާލޭ ޖަލުގައި ހުކުމް ތަންފީޒުކުރަމުން ދިޔަ ތ. ތިމަރަފުއްޓަށް ނިސްބަތްވާ އުމުރުން 83 އަހަރުގެ ފިރިހެން ގައިދީއަކު މިއަދު މަރުވެއްޖެއެވެ.
މިކަމާ ގުޅިގެން މޯލްޑިވްސް ކަރެކްޝަނަލް ސާވިސްއިން ބުނީ އޭނާ މަރުވެފައި ވާކަން އެނގުނީ އޭނާ ނުހޭލައިގެން، އެ ގޮޅީގައި ތިބި އެހެން ގައިދީން ޑިއުޓީ އޮފިސަރުންނަށް އެންގުމުން ކަމަށެވެ.
އެގޮތުން، މެޑިކަލް ސެންޓަރަށް ގެންދިޔައިރު ވެސް ހަރަކާތް ނުކުރާތީ މެންދުރު 12:00 ހާއިރު އެމަޖެންސީ ހާލަތުގައި ހުޅުމާލޭ ހޮސްޕިޓަލަށް ގެންގޮސް ފަރުވާ ދިން ކަމަށް ކަރެކްޝަންސްއިން ބުންޏެވެ. ފަރުވާ ދިނުމަށްފަހު ވެސް ހަރަކާތެއް ނެތުމުން އޭނާ މަރުވެފައިވާ ކަމަށް ކަނޑައަޅާފައިވަނީ މެންދުރު 12:30 ހާއިރުއެވެ.
މިއަދު ހުޅުމާލޭ ޖަލުގައި މަރުވި ގައިދީއަކީ ކުޑަކުއްޖަކާ ގުޅޭ ބަދުއަހުލާގީ މައްސަލައެއްގައި 10 އަހަރު ދުވަހުގެ ހުކުމެއް ތަންފީޒުކުރަމުންދިޔަ މީހެކެވެ. އަދި އޭނާއަކީ ހަކުރު ބައްޔާއި ކިޑްނީ އަދި ކުޑަކަމުދާ ނިޒާމުގެ ބައްޔާއި، ކޮލެސްޓްރޯލް، ހައިޕަޓެންޝަން އަދި ލޮލުގެ ބަލި ފަދަ ގިނަ ބަލިތަކަށް ބޭސްކުރަމުން އައި މީހެއް ކަމަށް ކަރެކްޝަންސްއިން ބުންޏެވެ.
އޭނާ މަރުވުމާ ގުޅިގެން ކަރެކްޝަންސްއިން ވަގުތުން އެކަން އޭނާގެ އާއިލާއަށާއި ކަމާ ގުޅުން ހުރި އިދާރާތަކަށް އެންގި ކަމަށް ކަރެކްޝަނުން ބުންޏެވެ.