މާފުށީ ޖަލުގައި ތިބި ގައިދީން ބަނޑުހައިހޫނުކަމުގެ ހަޅުތާލެއް ކުރަމުންދާ ކަމަށާއި، އޭގެ ތެރެއިން ބައެއް މީހުންގެ ހާލު ދެރަވެފައިވާ ކަމަށްބުނެ އެކަމުގެ ކަންބޮޑުވުން ފާޅު ކރަން ފަށައިފިއެވެ.
ޖަލުގައި ގައިދީއެއްގެ ހާލުދެރަވެގެން އަށިގަނޑުގައި ގެންދާ މަންޒަރު ފެންނަ ވީޑިއޯއެއް ސޯޝަލް މީޑިއާގައި ވަނީ އާންމު ވެސް ވެފައެވެ.
އިންސާނީ ހައްގުތަކަށް ވަކާލާތު ކުރާ ޖަމިއްޔާއެއް ކަމަށްވާ މޯލްޑިވްސް ހިއުމަން ރައިޓްސް އެންޑް ޑިޓެއިނީ ވޮޗްއިން ބުނީ މާފުށީ ޖަލުގެ ޔުނިޓު ދޭއް އަދި ހަތަރެއްގައި ބަނޑުހައިހޫނުކަމުގެ ހަޅުތާލެއް ކުރަމުންދާ ކަމުގެ ކަމުގެ މައުލޫމާތު ލިބިފައިވާ ކަމަށެވެ. އަދި ބައެއް ގައިދީންގެ ހާލު ދެރަވެގެން އެޑްމިޓުކޮށްފައިވާ ކަމުގެ ކަންބޮޑުވުން، އެ މީހުންގެ އާއިލާތަކުން ވެސް ހިއްސާކޮށްފައިވާ ކަމަށެވެ.
މާފުށި ޖަލު: ގައިދީންގެ ބަނޑުހައިހޫނުކަމުގެ ހަޅުތާލުގައި ހައެއްކަ މީހުން އެޑްމިޓުކޮށްފައިވާ ކަމަށް ވަނީ މައުލޫމާތު ލިބިފައި --
އެހެން ނަމަވެސް މި ކަމާ ގުޅިގެން ކަރެކްޝަންސްއާ ސުވާލު ކުރުމުން، އެ ފަދަ ކަމެއް ހިނގަމުންދާ ކަމަށް ގަބޫލު ނުކުރެވޭ ކަމަށް ބުނެފައިވާ ކަމަށް އެ ޖަމިއްޔާއިން ބުންޏެވެ. އަދި ގައިދީން ޖަލުކޮއްތު ނުކެޔަސް، ޖަލުގެ ފިހާރައިން ގަނެގެން ކާތަކެތި ކަމުންދާ ކަމަށް ކަރެކްޝަންސްއާ ހަވާލާދީ އެ ޖަމިއްޔާއިން ބުންޏެވެ.
މި ކަމާ ގުޅިގެން މީގެ ކުރިން "ސަން"އިން ކަރެކްޝަންސްއާ ސުވާލުކުރުމުން ވެސް މައުލޫމާތު ދިނީ އެ ފަދައިންނެވެ.
"އިތުރަށް މި ޖަމިއްޔާއިން ބެލިބެލުމުން އެނގުނު ގޮތުގައި، ވަރަށް ބޮޑަށް ލިމިޓުކޮށްގެން އާދިއްތަ ދުވަހު އެކަނި ޤައިދީންނަށް ކާބޯތަކެތި ވިއްކާ ފިހާރައިން މިދިޔަ ހޯމަ ދުވަހު ފެށި ހަޅުތާލުގެ ބައިވެރިންނަށް ކާތަކެތި ލިބޭނޭ އެއްވެސް ގޮތެއް އޮތްކަމަށް މިހާތަނަށް ހޯދިހޯދުމުން އެންގެން ނެތްކަމުގެ ކަންބޮޑުވުން މިޖަމިއްޔާއިން ފާޅުކުރަން" މޯލްޑިވްސް ހިއުމަން ރައިޓްސް އެންޑް ޑިޓެއިނީ ވޮޗްއިން ބުންޏެވެ.
އެ ޖަމިއްޔާއިން ބުނި ގޮތުގައި ކަރެކްޝަންސްއިން މައުލޫމާތު ދެނީ، އަދި ވެސް ގައިދީންގެ އެއްވެސް ޑިމާންޑެއް އޮތް ކަމަށް އެނގިފައިނުވާ ކަމަށެވެ. އެހެން ނަމަވެސް، ޑިމާންޑެއް ނެތި، ބަނޑުހައިހޫނުކަމުގެ ހަޅުތާލެއް ނުކުރާނެތީ، އެ ކަމުގެ އިތުރު މައުލޫމާތު ހޯދުމަށް މަސައްކަތް ކުރަމުން އަންނަ ކަމަށް އެ ޖަމިއްޔާއިން ބުނެއެވެ.
އެ ޖަމިއްޔާއިން ވަނީ، ގާނޫނާއި ގަވާއިދުތަކުގައި ގައިދީންނަށް ލިބިދޭންޖެހޭނެ ކަމަށް ކަނޑައެޅިފައިވާ އެންމެހައި ހައްގުތައް ކަށަވަރު ކުރުމަށް ކަމާގުޅުންހުރި ހުރިހާ އިދާރާތަކަށް ގޮވާލައިފައެވެ.
މީގެ ކުރިން ވެސް ގައިދީންގެ ބައެއް ޑިމާންޑުތަކަށް އިދާބަ ނުދިނުމުން، އެ މީހުން ޖަލުތަކުގައި ބަނޑުހައިހޫނުކަމުގެ ހަޅުތާލު ކުރެއެވެ.