ޖަލުތަކުގައި ތިބި ގައިދީންނަށާއި މޯލްޑިވްސް ކަރެކްޝަނަލް ސާވިސަސްގެ ބެލުމުގެ ދަށުގައިވާ ބަންދު މީހުންނަށް ލިބެން ޖެހޭ އެއްވެސް އަސާސީ ޚިދުމަތެއް އުނިކޮށްފައި ނުވާނެ ކަމަށް މޯލްޑިވްސް ކަރެކްޝަނަލް ސާވިސަސްއިން މިއަދު ބުނެފިއެވެ.
ކަރެކްޝަންސް އިން މިހެން ބުނެފައި ވަނީ ކ. މާފުށި ޖަލުގެ ޔުނިޓު ދެއަކާއި ހަތަރެއްގައި ބަނޑުހައިހޫނު ކަމުގެ ހަޅުތާލެއްކޮށް، ބައެއް ގައިދީންގެ ހާލު ދެރަވެގެން އެޑްމިޓްކޮށްފައިވާ ކަމަށް އަޑު ފެތުރިފައި ވަނިކޮށެވެ.
އެކަމާ ގުޅުވައި ކަރެކްޝަންސް އިން މިއަދު އެކްސްގައި ކުރި ޕޯސްޓެއްގައި ބުނީ، ޖަލުތަކުގެ ސަލާމަތާއި ރައްކާތެރިކަން ކަށަވަރުކުރުމަށާއި މަސައްކަތްތައް ހަރުދަނާ ކުރުމަށް ބައެއް ބަދަލުތައް ގެނެސްފައިވާކަމަށެވެ.
އެހެން ނަމަވެސް، ކަރެކްޝަންސްގެ ބެލުމުގެ ދަށުގައިވާ ގައިދީންނަށް ލިބެން ޖެހޭ އެއްވެސް އަސާސީ ޚިދުމަތެއް އުނިކޮށްފައި ނުވާ ކަމަށް ކަރެކްޝަންސް އިން ބުނެފައިވެއެވެ.
މާފުށި ޖަލުގައި ތިބި ބައެއް ބަންދު މީހުންނަށް ކަރެކްޝަންސްއިން ފޯރުކޮށްދޭ ކާބޯތަކެތި ބައެއް ފަހަރު ނުނަގާކަން ފާހަަގަކޮށް ކަރެކްޝަންސްއިން ބުނީ ވިޔަފާރި އުސޫލުން ގަނެފައިވާ ތަކެތި އެފަރާތްތަކުން ބޭނުންކުރާ ކަމަށެވެ.
މީގެއިތުރުން، ކަރެކްޝަންސް އިން ވަނީ، އެއްވެސް ކަމަކާ ގުޅިގެން ބަންދުގައި ހުރި ގައިދީއެއްގެ ސިއްޙީ ހާލު ގޯސްވެ، ހޮސްޕިޓަލުގައި އެޑްމިޓުކޮށްފައި ނުވާ ކަމަށް ބުނެފައެވެ.