މޯލްޑިވްސް ކަރެކްޝަނަލް ސާވިސް (އެމްސީއެސް)ގެ އޮފިސަރުން ތައިލެންޑްގައި ތަމްރީނު ހޯދުމާ ބެހޭ ގޮތުން އެ ގައުމުގެ ޑިޕާޓްމަންޓް އޮފް ކަރެކްޝަންސްއާ އެކު މަޝްވަރާ ކޮށްފިއެވެ.
މި ކަމާ ބެހޭގޮތުން މަޝްވަރާކުރައްވާފައި ވަނީ ތައިލެންޑްގެ ޑިޕާޓްމަންޓް އޮފް ކަރެކްޝަންސްގެ ދައުވަތަކަށް ކޮމިޝަނާ އޮފް ޕްރިޒަންސް ހަސަން ޒަރީރު އެ ގައުމަށް ކުރެއްވި ޒިޔަރާތެއްގައެވެ.
މި ޒިޔާރާތުގައި ޒަރީރު ވަނީ، އެ ޤައުމުގެ ޖަސްޓިސް މިނިސްޓްރީ އަދި ޑިޕާޓްމަންޓް އޮފް ކަރެކްޝަންސްގެ އިސްވެރިންނާ ބައްދަލު ކުރައްވާފައެވެ.
މި ދަތުރުފުޅުގައި ބައިވެރިވެ ވަޑައިގަންނަވާ ޓީމު ވަނީ ޗިއަންމައި ސެންޓްރަލް ޕްރިޒަން އާއި ބެންކޮކްގެ އެކި ކަރެކްޝަނަލް ފެސިޓީތަކަށް ޒިޔާރަތްކުރައްވާފައެވެ.
މީގެ އިތުރުން ގައިދީންނަށް ހިންގާ ރިހެބިލިޓޭޝަން ޕްރޮގްރާމްތަކާއި އެހެނިހެން ފަންނުވެރިކަމުގެ މަސައްކަތާއި ސިއްޙީކަންކަން ފޯރުކޮށްދޭ ގޮތްތަކާ ބެހޭ ގޮތުން ވަނީ މައުލޫމާތު ހޯދާފައެވެ.
އެމްސީއެސްއިން ބުނިގޮތުގައި ދެ މުވައްސަސާގެ މެދުގައި އިތުރަށް ގުޅުން ބަދަހި ކުރުމާ ބެހޭ ގޮތުން ފުޅާ ދާއިރާއެއްގައި ވަނީ މަޝްވަރާ ކުރައްވާފައެވެ.
ތައިލެންޑަށް ކޮމިޝަނާ އޮފް ޕްރިޒަންސް ޒަރީރު ކުރައްވާ ދަތުރުފުޅުގައި އެމްސީއެސްގެ ޖަލުތަކުގެ އިސްވެރިން ވެސް ވަނީ ބައިވެރިވެވަޑައިގެންފައެވެ.