ޗައިނާގައި ބާއްވާ އައިޓީބީ ފެއާގައި އެމްއެމްޕީއާރުސީއާއެކު ރާއްޖޭގެ ފަތުރުވެރިކަން ކުރިއަރުވަން 100 ޕާޓްނަރުން ބައިވެރިވާނެ ކަމަށް އެ ކުންފުނިން ބުނެފިއެވެ.
ރާއްޖެއަކީ މިފަހަރު އައިޓީބީ ޗައިނާގެ ޑެސްޓިނޭޝަން ޕާޓްނަރެވެ.
މިއީ ޗަައިނާގެ ފަތުރުވެރިކަމުގެ ދާއިރާ އަދި ވިޔަފާރީގައި މަޝްހޫރު އިވެންޓެކެވެ. މި ފެއާ ބޭއްވުމަށް ހަމަޖެހިފައިވަނީ މާދަމާ އިން ފެށިގެން އަންނަ ބުދަ ދުވަހުގެ ނިޔަލަށް ޝަންހާއި ވޯލްޑް އެކްސްޕޯ އެންޑް އެގްޒިބިޝަން ސެންޓަރުގައެވެ.
އެމްއެމްޕީއާރުސީން ބުނީ މި އިވެންޓުގައި އެ ކުންފުންޏާ ގުޅިގެން 100 ޕާޓްނަރުން ރާއްޖޭގެ ފަތުރުވެރިކަން ކުރިއެރުވުމަށް ފަތުރުރުވެރިކަމާ ބެހޭ 45 ތަނެއް ޕްރޮމޯޓްކޮށްދޭނެކަމަށެވެ.
އެމްއެމްޕީއާރުސީ އިން ބުނީ އެކުންފުނީގެ އަމާޒަކީ މި އެކްސްޕޯގައި ރާއްޖޭގެ ފަތުރުވެރިކަމާ ބެހޭ ވިޔަފާރިތައް ފުޅާކުރުމަށް މަގުފަހިކޮށްދީ، ޗައިނާގެ ޓްރެވަލް ނެޓްވޯކާ ގުޅުން ބަދަހިކޮށް ފަތުރުވެރިކަމުގެ ދާއިރާއަށް އިތުރު ކުރިއެރުން ހޯދައިދިނުން ކަމަށެވެ.
މީގެ އިތުރުން އައިޓީބީ ޗައިނާގެ އޮފިޝަލް ޕާޓްނަރެއް ގޮތުގައި އެމްއެމްޕީއާރުސީއަށް ރާއްޖޭގެ ފަތުރުވެރިކަމުގެ ރީތިކަން ދައްކުވައިދޭނެ ފުރުސަތު ލިބޭނެ ކަމަށާއި ރާއްޖޭގެ ސަގާފަތާއި ކެއުން ތަޖުރިބާކޮށްލުމުގެ ފުރުސަތު ވެސް ޒިޔާރަތްކުރާ ފަރާތްތަކަށް ލިބޭނެ ކަމަށް އެ ކުންފުނިން ބުންޏެވެ.
އެމްއެމްޕީއާރުސީން ބުނީ މި އެކްސްޕޯގައި ރާއްޖެ ބައިވެރިވުމުން ދައްކުވައިދެނީ ރާއްޖޭގެ ފަތުރުވެރިކަމަށް ޗައިނާގެ މާރުކޭޓުގެ މުހިއްމުކަމެވެ. އަދި މިފަދަ ޝޯއެއްގައި، ރާއްޖެއާއި ޗައިނާގެ ފަތުރުވެރިކަމާ ބެހޭ ޕާޓްނަރުންނާ ދެމެދު ގުޅުން ބަދަހިވެ ފަތުރުވެރިކަމުގެ އެންމެ ފަހުގެ މައުލޫމާތުތައް ހިއްސާކުރެވޭނެ ކަމަށް ވެސް އެމްއެމްޕީއާރުސީއިން ބުނެއެވެ.
އެމްއެމްޕީއާރުސީއިން ބުނީ ރާއްޖޭގެ ސްޓޭންޑުގައި ގިނަ ހަރަކާތްތައް ކުރިޔަށް ދާނެ ކަމަށެވެ. އެގޮތުން، ފަތުރުވެރިކަމާ ބެހޭ ޓްރޭޑް ރެޕްރެޒެންޓެޓިވުންނާއި އެހެނިހެން ޕާޓްނަރުންނާ ބައްދަލުކޮށް މައުލޫމާތާއި ގުޅުން ބަދަހިކުރުމާއި މީޑިއާ އިންޓަވިއުތަކުގައި ރާއްޖޭގެ ގުދުރަތީ ރީތިކަން ކިޔައިދީ، ސަގާފަތާއި އާދަކާދައާއި ކެއުން ތަޖުރިބާކުރުމުގެ ފުރުސަތު ދޭނެ ކަމަށް އެ ކުންފުނިން ބުންޏެވެ.
އެ ހަރަކާތްތަކުގައި ބައިވެރިވެ މީސްމީޑިއާގައި ރާއްޖޭގެ ސްޓޭންޑްގެ ތަޖުރިބާ ހިއްސާ ކުރުމުން ރާއްޖެއަށް ހިލޭ ދަތުރެއް ހޯދުމުގެ ފުރުސަތު ވެސް
ޒިޔާރަތްކުރާ މީހުންނަށް ލިބޭނެ ކަމަށް އެމްއެމްޕީއާރުސީން ބުންޏެވެ.
ޗައިނާ އަކީ ރާއްޖެއަށް އެންމެ ގިނަ ފަތުރުވެރިން ޒިޔާރަތްކުރާ ގައުމެވެ. މިގޮތުން މިދިޔަ ބުދަ ދުވަހުގެ ނިޔަލަށް ޗައިނާގެ 95,952 ފަތުރުވެރިން ރާއްޖެއަށް ދަތުރުކޮށްފައިވެއެވެ.