ށ. ނަރުދޫގައި މަންމައަކު އޭނާގެ ދެ ދަރިން, ނުރުހުމުގައި، ގަދަކަމުން ޕޮލިހުންގެ ބާރު ބޭނުންކޮށްގެން ގެންދަން އުޅޭކަމަށް ބުނާ ވީޑިއޯއެއް ސޯޝަލް މީޑިއާގައި އާންމުވެއްޖެއެވެ.
"ސަން" އަށް މައުލޫމާތު ދެމުން އެ ރަށުގެ މީހަކު ބުނީ އެ ކުދިންނަކީ ހަތް އަހަރު ފުރިފައިވާ ދެ ކުދިން ކަމަށެވެ. އެ ދެ ކުދިން މަންމައާއެކީ ދާން ބޭނުންނުވާ ކަަމަށާއި، ބައްޕަ ކައިރީ މަޑުކުރަން ބޭނުންވާ ކަމަށް ތަކުރާރުކޮށް ބުނިކަމަށް ވެސް ކިޔައިދިނެވެ.
އެ މީހާ ބުނީ ރަށު ރައްޔިތުންގެ ހާޒިރުގައި ވެސް އެ ކުދިން މަންމަކައިރީއަށް ދާން ބޭނުންނުވާ ކަމަށް ބުނި ކަމަށެވެ. އެހެންކަމުން ރައްޔިތުން ވެސް އެ ދެ ކުދިން ގެންދިޔަ ނުދީ މަޑުކުރުވުމަށް މަސައްކަތްކުރި ކަމަށް އޭނާ ބުންޏެވެ.
މި ހަމަނުޖެހުމާ ގުޅިގެން ގިނަ އަދަދެއްގެ ފުލުހުންގެ އިތުރުން ޖެންޑާއިން ހަރަކާތްތެރިވި ކަމަށް ވެސް އެ މީހާ ބުންޏެވެ.
މިގޮތުން ސޯޝަލް މީޑިއާގައި ދައުރުވަމުންދާ ވީޑިއޯގައި ފުލުހުން ބާރުގެ ބޭނުންކޮށްގެން އެތަނުން އެއް ކުއްޖަކު އުރައިގެން، ގަދަކަމުން ގެންދާ މަންޒަރު ފެނެއެވެ.
އެ ވީޑިއޯ ގައި ކުއްޖާ ރޮއެ ނުދާން އުޅޭ މަންޒަރު ވެސް ފެނެއެވެ. އަދި އެ ހަމަނުޖެހުމުގައި އަންހެނެއް ވެއްޓި، އަނިޔާވާ މަންޒަރު ވެސް ފެނެއެވެ.
އެ ދެކުދިންގެ މަންމައަކީ ކ. ދިއްފުއްޓަށް ނިސްބަތްވާ މީހެކެވެ.
ކޯޓުގެ އަމުރާ ދެކޮޅަށް ފިރިހެން މީހާ ވެސް ވަނީ ދަރިން ހަވާލުކުރުމަށް ދެކޮޅު ހަދާފައެވެ.