ޢަރަބި ބަހުން ބާއްވާ އެންމެ ބޮޑު ބަހުސް މުބާރާތްކަމަށްވާ "ދަ އިންޓަނޭޝަނަލް ޔުނިވާސިޓީސް ޑިބޭޓިން ކޮމްޕެޓިޝަން" ގައި ބައިވެރިވުމަށް ދިވެހިރާއްޖޭގެ އިސްލާމީ ޔުނިވަސިޓީގެ ޓީމެއް މިއަދު ޤަތަރަށް ފުރައިފިއެވެ.
އައިޔޫއެމްއިން ބުނީ، މި މުބާރާތަކީ ޤަތަރުގެ ވެރިރަށް ދޯހާގެ ޤަތަރު ނެޝަނަލް ކޮންވެންޝަން ސެންޓަރުގައި މާދަމާއިން ފެށިގެން އަންނަ ބުދަ ދުވަހުގެ ނިޔަލަށް ބާއްވާ މުބާރާތެއް ކަމަށެވެ.
އެގޮތުން، މި މުބާރާތަކީ ދުނިޔޭގެ އެކި ޔުނިވާސިޓީތަކުގެ ދަރިވަރުން ކަނޑައެޅޭ މައުޟޫތަކަށް ޢަރަބި ބަހުން ބަހުސްކުރުމަށް ބޭއްވޭ ބައިނަލްއަޤްވާމީ ބޮޑު މުބާރާތެއް ކަމަށް އައިޔޫއެމްއިން ބުނެއެވެ.
މި އަހަރުގެ މުބާރާތުގައި ދުނިޔޭގެ އެކި ކަންކޮޅުތަކުން 50 ގައުމަކުން 100 ޓީމް ހިމެނޭހެން 600 އަށްވުރެ ގިނަ ބައިވެރިން ވާދަކުރެއެވެ.
ޓީމްގެ ބައިވެރިންނާއި އެ ޔުނިވާސިޓީގެ ވައިސް ޗާންސެލާ ޑރ.ޢަލީ ޒާހިރާއި ޑެޕިއުޓީ ވައިސް ޗާންސެލާ އަޙްމަދު އަމީން މުޙައްމަދު ބައްދަލު ކުރެއްވުމުގެ ތެރެއިން --- ފޮޓޯ/ އައިޔޫއެމް
މި މުބާރާތުގައި އައިޔޫއެމްއިން ބައިވެރިވާ ޓީމްގައި ހިމެނެނީ އެ ޔުނިވާސިޓީގެ ބެޗްލާ އޮފް ޓީޗިން ޢަރަބިކް ލެންގުއޭޖް ކޯހުގައި ކިޔަވަމުންދާ ތިން ދަރިވަރުން ކަމަށްވާ، ސާރާ ބިންތު ޢާމިރު އިބްން ޢަލީއާއި ޢާއިޝަތު އީނާޝް އިބްރާހީމް އަދި އަލްޖީރިއާގެ ދަރިވަރެއް ކަމުގައިވާ ބެންބޫޒިއަން ނަރްދްޖިސްއެވެ.
ދަރިވަރުންނާއެކު ކޯޗެއްގެ ގޮތުގައި ވަޑައިގެންނެވީ އައިޔޫއެމްގެ ކުއްލިއްޔާ އޮފް ޢަރަބިކް ލެންގުއޭޖްގެ ޑީން ފައްޔާޟް ޢަލީ މަނިކެވެ. އެއާއެކު، މި ދަރިވަރުންނާ އެ ޔުނިވާސިޓީގެ ވައިސް ޗާންސެލަރު ޑރ.ޢަލީ ޒާހިރާއި ޑެޕިއުޓީ ވައިސް ޗާންސެލަރު އަޙްމަދު އަމީން މުޙައްމަދު އިއްޔެ ބައްދަލުކުރައްވާފައިވާ ކަމަށް އައިޔޫއެމްއިން ބުނެއެވެ.
މިގޮތުން، ޔުނިވާސިޓީއަށާއި ރާއްޖެއަށް ރީތި ނަން ހޯދައިދިނުމަށް ހުރިހާ ކުދިން ވެސް ގަދައަޅައި މަސައްކަތްކުރުމަށާއި މިފަދަ އަގުހުރި ފުރުޞަތުތަކުގެ ބޭނުން ހެޔޮގޮތުގައި ހިފުމަށް ޗާންސެލަރު ޑރ. ޒާހިރު ވަނީ ޓީމުގެ ބައިވެރިންނަށް އިލްތިމާސްކުރައްވާފައެވެ.
އައިޔޫއެމްގައި ހިންގާ ޢަރަބި ބަހުގެ ކޯސްތަކަށް ބޮޑު ތަރުހީބެއް ލިބެމުންދާ ކަމަށާއި އެ ކޯސްތަކުގެ ފެންވަރު ދެމެހެއްޓުމަށް ބޮޑު އިސްކަމެއް ދޭކަމަށް އެ ޔުނިވާސިޓިން ވަނީ ބުނެފައެވެ.
އަދި، މިފަދަ ބައިނަލްއަޤްވާމީ މުބާރާތްތަކުގައި ދަރިވަރުން ބައިވެރިކުރުމުގެ އެންމެ ބޮޑު ބޭނުމަކީ ދަރިވަރުންގެ ޢިލްމާއި ހުނަރު މަތިކުރުންކަމަށް އައިޔޫއެމްއިން ބުނެއެވެ.