މާލެ ސަރަހައްދުގައި ހުރި ކުޅިވަރު ކުޅޭ ތަންތަނުގެ އާބާތުރަ ފިލުވަން ފަށާފައިވާ ކަމަށް ސްޕޯޓްސް މިނިސްޓްރީން މިއަދު ބުނެފިއެވެ.
އެ މިނިސްޓްރީގެ އޮފިޝަލަކު ވިދާޅުވީ، މާލެ ސަރަހައްދުގައި މަރާމާތު ކުރަން ޖެހޭ ތަންތަން ދެނެގަނެ، އެ ތަންތަން މަރާމާތު ކުރުމަށް އަޅާނެ ފިޔަވަޅުތައް ދެނެގަތުމުގެ މަސައްކަތް މި އަހަރުން ފެށިގެން ކުރަމުން އަންނަ ކަމަށެވެ.
މިގޮތުން، މައްޗަންގޯޅި ބުރު ޕާކުގައި ހުރި އައުޓްޑޯ ޖިމް މަރާމާތު ކުރުމުގެ މަސައްކަތް މިހާރު ފަށާފައިވާކަން ފާހަގަކޮށް އޮފިޝަލް ވިދާޅުވީ، ޖިމްގައި ބޭނުންކުރާ ގިނަ ސާމާނުތައް ހުރީ ވަރަށް ބޮޑަށް ހަލާކުވެފައި ކަމަށެވެ.
އެ ޖިމް މަރާމާތު ކުރުމަށް މާލޭ ސިޓީ ކައުންސިލާ ގުޅިގެން، މިދިޔަ ބުރާސްފަތި ދުވަހު ބަންދުކޮށްފައިވާ ކަމަށާއި މި މަސް ނިމުމުގެ ކުރިން މަރާމާތަށްފަހު އާންމުންނަށް ހުޅުވާލާނެ ކަމަށް އޮފިޝަލް ވިދާޅުވިއެވެ.
"އެ އޭރިއާގެ ތަޅުންގަނޑު މަރާމާތުކޮށްފަ، ދޮރު ކުރިން ހުރި ވަރަށްވުރެ ބޮޑުކޮށްފައި، ފާރުތައް ދޮވެ ސާފުކޮށްފައި، އޭގެފަހުން ވަށާފާރުގައި ކުލަލާފައި، ތަޅުމުގެ ފްލޯ ޕެއިންޓްކޮށްފައި، ދެން ޖިމްގައި ބަހައްޓާ އާލަތްތައް އިންސްޓޯލްކޮށް ޓެސްޓުކޮށްފައި އާންމުންނަށް ހުޅުވާލާނީ،" އޭނާ ވިދާޅުވިއެވެ.
އޭގެއިތުރުން، މާލޭ ފަތާ ޓްރެކްގެ ޕްލެޓްފޯމްތައް ހަލާކުވެ މަރާމާތުނުކޮށް ގިނަ ދުވަސްތަކެއް ވެފައިވާކަން ފާހަގަކޮށް އޮފިޝަލް ވިދާޅުވީ، ޓްރެކްގެ ޕްލެޓްފޯމުގައި ކުރަންޖެހޭ ކުދިކުދި މަރާމަތުތައް މިނިސްޓްރީން ކޮށްފައިވާ ކަމަށެވެ.