ދިވެހި ސަރުކާރުން ރަސްމީކޮށް އެދިއްޖެނަމަ އިންޑިއާއިން ހަދިޔާކޮށްފައިވާ ޑޯނިއާ މަތިންދާ ބޯޓު އޮޕަރޭޓުކޮށްދޭން ދިވެހި ޕައިލެޓުން ތަމްރީން ކޮށްދޭން އިންޑިއާއިން އޮތީ ތައްޔާރަށްކަމަށް އެ ގައުމުގެ އެކްސްޓާނަލް އެފެއާޒް މިނިސްޓްރީން އިއްޔެ ބުނެފިއެވެ.
ކޮންމެ ހަފުތާއަކު ވެސް އިންޑިއާގެ އެކްސްޓާނަލް އެފެއާޒް މިނިސްޓްރީން ބާއްވާ ނޫސްވެރިންގެ ބައްދަލުވުމުގެ ތެރެއިން މި ހަފުތާގައި އޮތް ބައްދަލުވުމުގައި ރާއްޖޭގައި އޮޕަރޭޓުކުރާ އިންޑިއާއިން ހަދިޔާކުރި ޑޯނިއާތަކާ ގުޅޭގޮތުން ވަނީ ސުވާލެއް ކޮށްފައެވެ.
އެގޮތުން މި ފަހުން ރާއްޖޭގެ ފޮރިން މިނިސްޓަރު މޫސާ ޒަމީރު އިންޑިއާއަށް ކުރެއްވި ރަސްމީ ދަތުރުފުޅުގައި ޑޯނިއާ އޮޕަރޭޓުކުރުމަށް ޚާއްސަ ޕައިލެޓުން ތަމްރީނުކުރުމާމެދު އެއްވެސް މަޝްވަރާއެއް ކުރެވުނުތޯ ވަނީ ނޫސްވެރިއަކު ސުވާލުކޮށްފައެވެ.
އެ ސުވާލަށް ޖަވާބުދެއްވަމުން އެކްސްޓާނަލް އެފެއާޒް މިނިސްޓްރީގެ ތަރުޖަމާނު ރަންދިރް ޖައިސްވަލް ވިދާޅުވީ ރާއްޖެއާއި އިންޑިއާގެ ގުޅުން އަސްކަރީ ގޮތުން ބިނާވެފައި އޮތް އެއް އަސާސަކީ ގާބިލްކަން އިތުރުކުރުމުގެ ދާއިރާ ކަމަށެވެ.
އެހެންވެ އެ ފަދަ ހުށަހެޅުމެއް ހުށަހަޅައިފިނަމަ އެ ކަން ކުރުމަށް އިންޑިއާއިން އެހީވެދޭނެ ކަމަށެވެ.
"އަޅުގަނޑުމެން ކުރިން ވާނެ އަސްކަރީ ދާއިރާއިން ދިވެހިން ތަމްރީނުކޮށްފައި. ޕައިލެޓުން ތަމްރީނުކުރުމުގެ އެއްވެސް ހުށަހެޅުމެއް އައިސްފިނަމަ އަޅުގަނޑުމެން އެކަން ކުރާނަން. ހަމަ ވަރަށް ބަލައިގަންނާނަން އެ ހުށަހެޅުމެއް،" އޭނާ ވިދާޅުވިއެވެ.
ރާއްޖެއިން މިހާރުވަނީ އިންޑިއާ އަސްކަރީ ސިފައިން އެކީ ފައިބައިފައެވެ. އަނބުރާ ފޮނުވާލި އިންޑިއާގެ 76 ސިފައިންގެ ބަދަލުގައި، އެ ގައުމުގެ ވައިގެ އުޅަނދުތައް އޮޕަރޭޓްކުރުމަށް ގެނައި މަދަނީން ރާއްޖެއިން ފައިބާން އެއްބަސްވެފައި ވަނީ 2026ގައި ކަމަށް ސަރުކާރުން ވަނީ ބުނެފައެވެ.
ރާއްޖޭގައި ތިބި އިންޑިއާ ސިފައިން ފޮނުވާލާނެކަމުގެ ރިޔާސީ ވައުދާއެކު ވެރިކަމަށް ވަޑައިގެންނެވި ރައީސް ޑރ. މުހައްމަދު މުއިއްޒު ވަނީ، ވެރިކަމުގެ ހުވާ ކުރެއްވުމަށް ފަހު ޖެހިގެން އައި ދުވަހު، އިންޑިއާ ސިފައިން އަނބުރާ ގެންދަން ރަސްމީކޮށް އެ ގައުމުގައި އެދިވަޑައިގެންފައެވެ.