ރާއްޖެއިން އަނބުރާ ފޮނުވާލި އިންޑިއާގެ 76 ސިފައިންގެ ބަދަލުގައި، އެ ގައުމުގެ ވައިގެ އުޅަނދުތައް އޮޕަރޭޓްކުރުމަށް ގެނައި މަދަނީން ރާއްޖެއިން ފައިބާން އެއްބަސްވެފައި ވަނީ 2026ގައި ކަމަށް ސަރުކާރުން މިއަދު ބުނެފިއެވެ.
މިއަދު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ސަރުކާރުން ވަނީ ރާއްޖެއިން ފޮނުވާލީ 76 އިންޑިއާ ސިފައިންކަން ހާމަކޮށްފައެވެ. އަދި އެ އަދަދަށް މަދަނީން ރާއްޖެ ގެނެސްފައިވާ ކަމަށް ސަރުކާރުން ބުންޏެވެ.
މި ބައްދަލުވުމުގައި މަދަނީންނާ ގުޅޭގޮތުން މައުލޫމާތު ދެއްވަމުން ފޮރިން މިނިސްޓަރު މޫސާ ޒަމީރު ވިދާޅުވީ ރާއްޖެ ގެނައި މަދަނީ މީހުންނަކީ އިންޑިއާއިން ހަދިޔާކުރި ހެލިކޮޕްޓަރު އުފެއްދި ކުންފުނި ކަމަށްވާ ހިންދުސްތާން އެރޮނޮޓިކްސް ލިމިޓެޑްގެ މީހުން ކަމަށެވެ.
އެ މީހުން ގެނައުމަށް އިންޑިއާ ސަރުކާރާއެކު ސޮއިކޮށްފައިވާ އެއްބަސްވުމުގައި، ރާއްޖެ ގެނައި މަދަނީން ފޮނުވާލާނެ ތާރީޚުތައް ކަނޑައަޅާފައި އޮތް ކަމަށް އޭނާ ވިދާޅުވިއެވެ. އެގޮތުން:
- ސ. ގަމުގައި ތިބި 26 މަދަނީ މީހުން - މުއްދަތު ހަމަވާނީ ފެބްރުއަރީ 2025
- ހދ. ހަނިމާދޫގައި ތިބި 25 މަދަނީ މީހުން - މުއްދަތު ހަމަވާނީ ފެބްރުއަރީ 2026
- ލ. ކައްދޫގައި ތިބި 25 މަދަނީ މީހުން - މުއްދަތު ހަމަވާނީ ފެބްރުއަރީ 2025
ފޮރިން މިނިސްޓަރު މޫސާ ޒަމީރު -- ފޮޓޯ/ ރައީސް އޮފީސް
މިނިސްޓަރު ޒަމީރު ވިދާޅުވީ އިންޑިއާއާއެކު ވެފައިވާ އެއްބަސްވުމަށް ބަދަލެއް ނާންނަހާ ހިނދަކު، އެ މުއްދަތުގައި މި ތިން ސަރަހައްދުގައި ތިބި 76 މަދަނީ މީހުން ރާއްޖޭގައި ތިބޭނެ ކަމަށެވެ.
"މި މީހުން ތިބޭނެ ވަކި މުއްދަތެއް ކަނޑައެޅިފައި އޮތީ އެންމެ ފަހުން އަޅުގަނޑުމެންނާ އެކު ސައިން ކުރެވުނު ލެޓާ އޮފް އެކްސްޗޭންޖުގައި. އެ ލެޓާ އޮފް އެކްސްޗޭންޖަށް އިތުރަށް ބަދަލެއް ނުގެންނަހާ ހިނދުގަ އޭގަ މުއްދަތެއް އެބައޮތް. މީގަ ނީޑް އޮތް ގޮތެއް ބަލާފައި ދެން އިތުރަށް އިންޑިއާ ސަރުކާރާ އެއްކޮށް ވާހަކަދައްކާނީ،" މިނިސްޓަރު ޒަމީރު ވިދާޅުވިއެވެ.
ސިފައިންގެ ބަދަލުގައި ރާއްޖެ ގެނެސްފައި ވަނީ މަދަނީ މީހުން ކަމާމެދު އިދިކޮޅުން ޝައްކު އުފައްދާތީ، އެ ބައްދަލުވުމުގައި ޑިފެންސް މިނިސްޓަރު ޣައްސާން މައުމޫން ވަނީ މިހާރު ތިބީ އިންޑިއާގެ މަދަނީ މީހުންކަން ކަށަވަރުވާ ކަމަށް ވިދާޅުވެފައެވެ.
"އަޅުގަނޑުމެން އެމީހުންގެ ޕާސްޕޯޓުތަކާއި އެމީހުންގެ ވަނަވަރުތައް ބަލާފައި އެއީ ސިވިލިއަނުންކަން މިއަދު ދިވެހި ރައްޔިތުންނަށް ދެންނެވޭނެ،" ޣައްސާން ވިދާޅުވިއެވެ.
ސަރުކާރުން މީގެ ކުރިން ބުނި ގޮތުގައި ރާއްޖޭގައި ތިބި ކަމަށް އެހާތަނަށް ލިޔެކިޔުންތަކުން ފެންނަން އޮތީ އިންޑިއާގެ 89 ސިފައިންނެވެ.
ރާއްޖޭގައި ތިބި އިންޑިއާ ސިފައިން ފޮނުވާލާނެކަމުގެ ރިޔާސީ ވައުދާއެކު ވެރިކަމަށް ވަޑައިގެންނެވި ރައީސް ޑރ. މުހައްމަދު މުއިއްޒު ވަނީ، ވެރިކަމުގެ ހުވާ ކުރެއްވުމަށް ފަހު ޖެހިގެން އައި ދުވަހު، އިންޑިއާ ސިފައިން އަނބުރާ ގެންދަން ރަސްމީކޮށް އެ ގައުމުގައި އެދިވަޑައިގެންފައެވެ.