"އަޅުގަނޑުމެން ވަރަށް ހީކުރިން މި އޮލިމްޕިކްސްއަކީ އަތުނުވާނެ އެއްޗެއް ކަމަށް. އެހެންނަމަވެސް އިރާދަކުރެއްވިއްޔާ މިއަދު މި އޮތީ ދީމާ އަޅުގަނޑުމެންނަށް މީތި މިއީ ކުރެވޭނެ ކަމެއްކަމާއި ވާނެ ކަމެއް ކަމާ ދައްކުވައިދީފައި،"
ދިގު ތާރީޚުގައި ފުރަތަމަ ފަހަރަށް އޮލިމްޕިކްސްއަށް ކޮލިފައިވީ ފުރަތަމަ ދިވެއްސެއްގެ ޝަރަފު ހާސިލުކުރި އުމުރުން އެންމެ 16 އަހަރުގެ ޓޭބަލް ޓެނިސް ކުޅުންތެރިޔާ ފާތިމަތު ދީމާ އަލީއަށް މަރުހަބާ ކިޔަން މިއަދު މެންދުރު ފަހު، މާލޭގައި ބޭއްވި ޚާއްސަ މެހެފިލްގައި ހުރެ މޯލްޑިވްސް އޮލިމްޕިކް ކޮމިޓީގެ ރައީސް މުހައްމަދު އަބްދުއްސައްތާރުގެ ތައުރީފު އޮއްސައިލިއެވެ.
އޭނާ ވިދާޅުވީ، ތިން ބަހެއް އަޅައިގަތެވެ. އެއީ، "ހާޑްވޯކް، ޑިޓަމިނޭޝަން، ސެކްރިފައިސް،"އެވެ.
ދީމާގެ ޅައުމުރުގައި ހޯދި ރަން ކާމިޔާބީގެ ފަހަތުގައި އޮތީ އެ ހަގީގަތެވެ. އާއިލާއާ ދުރުގައި ހޭދަކުރި ދުވަސްތަކެވެ. ފަރިތަކުރުންތަކުގައި އެކިއެކި ގައުމުތަކުގައި ހޭދަކުރި ވަގުތުތަކެވެ. އެ ހުވަފެނުގައި ކުލަޖައްސަން މައިންބަފައިންވި ގުރުބާނީއެވެ.
އޮލިމްޕިކްސްއަށް ކޮލިފައިވީ ފުރަތަމަ ދިވެހި އެތުލީޓު ދީމާ: އޭނާއަށް ވަނީ ހޫނު މަރުހަބާއެއް ކިޔާފައި -- ސަން ފޮޓޯ/ ނާއިޝް ނާހިދު
މިއީ ދިވެހި ކުޅިވަރު އާއިލާ އެންމެ ޝައުގުވެރިކަމާ އެކު ބޭނުންވެގެން އުޅުނު އެއް ކާމިޔާބެވެ. އެއީ، ކުރެވޭނެ ކަމެއްކަން ދައްކުވައިދިނީ ދީމާއެވެ.
"އެންމެ 16 އަހަރުގެ އެތުލީޓެއް އަޅުގަނޑުމެންނަށް ދައްކުވައިދިނީ މި ހުރިހާ ދުވަހު ނުކުރެވިފައި އޮތް ކަމެއް ފަހުރުވެރިކަމާ އެކު، މުޅި ދިވެހި ސްޕޯޓްސްއަށް އަޅުގަނޑުމެންނަށް ދައްކުވައިދިނީ އަޅުގަނޑުމެންނަށް ކުރެވޭނޭ. ތި ކުދިން ވެސް ކުރާށޭ،" އޮލިމްޕިކް ކޮމިޓީގެ ރައީސް ވާހަކަ ކުރިއަށް ގެންދެވިއެވެ.
"... ލޮޓް އޮފް ވޯކް، ހާޑްވޯކް، ޑިޓާމިނޭޝަން، ސެކްރިފައިސް... މި ހުރިހާ އެއްޗެއް ލައިގެން ނޫނީއްޔާ މި އެޗީވެއް ނުވާނެ. މަސައްކަތް ކުރެވޭނީ މި ހުރިހާ ކަމެއް ކޮށްގެން. އެއަށް ފޯކަސްކޮށްގެން ދީމާ އެ ކުރި މަސައްކަތުގެ ނަތީޖާ މިއަދު އެ ފެނުނީ. އެހެންވީމާ ތި ހުރިހާ ކުދިންނަށް ވެސް އެނގެންޖެހޭނެ މި ވަރަށް މަސައްކަތްކޮށްގެން ނޫނީއްޔަކާއެއް އެ އެއް އެޗީވެއް ނުވާނެ،"
ނޭޕާލްގައި ކުރިއަށް ދިޔަ ސައުތު އޭޝިއާ ރީޖަންގެ ކޮލިފިކޭޝަން މުބާރާތުގެ ސިންގަލްސް ބައިން ޗެމްޕިއަންކަން ހޯދައިގެން ދީމާ އޮލިމްޕިކްސްއަށް ކޮލިފައިވީ ބުދަ ދުވަހުއެވެ.
އޮލިމްޕިކް ކޮމިޓީގެ ރައީސް: އޭނާ ވަނީ ދީމާއަށް ޝުކުރު އަދާކޮށް، އެއީ ނަމޫނާއެއް ކަމަށް ވިދާޅުވެފައި -- ސަން ފޮޓޯ/ ނާއިޝް ނާހިދު
ކުރިން 1988 ވަނަ އަހަރުން ފެށިގެން ރާއްޖެއިން ސަމާއޮލިމްޕިކްސްގައި ބައިވެރިވަމުން އައި ނަމަވެސް ކޮލިފައިން މުބާރާތެއް ކާމިޔާބުކޮށްގެން ދިވެހި އެއްވެސް އެތުލީޓަކު އެ މުބާރާތަށް ކޮލިފައިވެފައެއް ނުވެއެވެ. އެ ކަން ހާސިލުކުރި ފުރަތަމަ އެތުލީޓަކީ ދީމާއެވެ. އެ ތާރީޚު ބަދަލުވި ދުވަހަކީ މޭ 15 ވީ ބުދަ ދުވަހެވެ.
"ނަވާރަ ސަތޭކަ އަށްޑިހަ އަށްވަނަ އަހަރުން ފެށިގެން އަޅުގަނޑުމެން މި އަންނަނީ ސަމާ އޮލިމްޕިކްސްގައި ބައިވެރިވަމުން. މިހާ ހިސާބަށް އަޅުގަނޑުމެންނަށް އަބަދު ވެސް މި ލިބެނީ ވައިލްޑް ކާޑު މި ކިޔާ. އޭތި މި ބްރޭކް ކުރީ ދީމާ. ދެން އަޅުގަނޑުމެން އެހެން ކުޅިވަރުތަކުން ވެސް އެބަޖެހޭ މީތި ބްރޭކްކުރަން. ކުރެވޭނެކަން ދައްކުވައިދީފި،" ސައްތާރު ވިދާޅުވިއެވެ.
ދީމާ މީގެ ކުރިން ވެސް ވަނީ ބޭރުގެ އެތައް މުބާރާތެއްގައި ރާއްޖެ ތަމުސީލުކޮށްފައެވެ. ގައުމަށް ރީތި ނަން ހޯދައިދީފައެވެ. އޭނާގެ ކާމިޔާބީ އަދި އޮތީ ކުރިއަށް ކަމާ މެދު މީހުން ޝައްކު ކުރާނެ ޖާގައެއް ނެތެވެ.
އޭނާއަށް މަރުހަބާ ކިޔަން މިއަދު ކުޅިވަރު އާއިލާގެ އެންމެންހެން އެއްވެ، ސޯޝަލް ސެންޓަރުގައި ތިބީ ތަރުހީބު ދޭށެވެ. ހިތްވަރު ދޭށެވެ. އެކެއް އަނެކަކުގެ ކިބައިން ހިތްވަރު ލިބިގަންނާށެވެ.
ދިމާއަށް މަރުހަބާ ކިޔަން މިއަދު ބޭއްވި ހަރަކާތުގެ ތެރެއިން -- ސަން ފޮޓޯ/ ނާއިޝް ނާހިދު
އެ މެހެފިލްގެ ޝަރަފުވެރިއެއްގެ ގޮތުގައި ހުންނެވި ކުޅިވަރާ ބެހޭ ވަޒީރު އަބްދުﷲ ރާފިއު ވެސް އެންމެ ފުރަތަމަ ކަމަކަށް ދީމާއަށް ޝުކުރު އަދާކުރީއެވެ. އެއަށް ފަހުގައި އޭނާގެ މައިންބަފައިންނަށް ޝުކުރު އަދާކުރިއެވެ. މި ވަރުގެ ޝަރަފެއް، މި ގައުމަށް ހޯދައިދިނުމަކީ ކުޑަ ކަމެއް ނޫންކަން ފާހަގަކުރެއްވިއެވެ.
"މިއީ އެއް ރެއަކު ނިދާލާފައި ހޭލައިގެން އަނެއް ދުވަހު ކުޅެގެން ލިބުނު ކާމިޔާބެއް ނޫނޭ،" ވަޒީރު ވިދާޅުވިއެވެ.
"ލެޖެންޑަކަށް މީހަކު ވަނީ 10 އަހަރު ދުވަހު ކެނޑިނޭޅި މަސައްކަތްކޮށްގެން. ދިހަހާސް ގަޑިއިރު އެ ކުރާ ކަމެއްގައި އެ ކުޅޭ ކުޅިވަރެއްގައި ޝާމިލުވެގެން ދިޔައީމާ. ދެންމެ އަޑުއިވިއްޖެ ދީމާ ވެސް 10 އަހަރު ކޮށްފިއޭ. މާނައަކީ ވަރަށް ގިނަ ދުވަސްތަކުގެ މަސައްކަތުގެ ނަތީޖާއޭ މި ފެންނަނީ،"
ވަޒީރު ވަނީ ކުޅިވަރު އާއިލާގެ އެންމެން ވެސް މި މިސާލުން ހިތްވަރު ލިބިގަނެގެން ކުރިއަށް ދާން ހިތްވަރު ދެއްވައިފައެވެ. ޚާއްސަކޮށް، ސަރުކާރުން ދެމިއޮންނާނީ އެތުލީޓުންގެ ފަހަތުގައި އަބަދު ވެސް އެހީތެރިވެވޭ ހިސާބުގައިކަން ފާހަގަކުރެއްވިއެވެ.
އެތުލީޓުންނަށް ދަތިވާ ކަންކަން ހައްލުކޮށްދެއްވާނެކަމުގެ ޔަގީންކަން އެރުވިއެވެ. އެ އެތުލީޓުންގެ ލެވެލް މަތިކުރަން ސަރުކާރުން އެހީވާނެކަމުގެ އުންމީދު އާކޮށްދެއްވިއެވެ.
ދީމާގެ ކާމިޔާބީއަށް މަރުހަބާ ކިޔާ، އޮލިމްޕިކްސްއަށް މުބާރާތުގައި ވާދަކުރުމަށާއި ރަނގަޅު ކާމިޔާބީއެއް ހޯދުމަށް ދެވެން އޮތް ހުރިހާ އެހީތެރިކަމަކާއި އެއްބާރުލުމެއް ސަރުކާރުން ދޭނެ ކަމަށް ރައީސް ޑރ. މުޙައްމަދު މުއިއްޒު ވެސް ވަނީ ވިދާޅުވެފައެވެ.
މި އަހަރުގެ އޮލިމްޕިކްސްގައި 206 ގައުމެއް ބައިވެރިވާއިރު، އެ މުބާރާތް ކުރިއަށްދާނީ ފްރާންސުގެ ޕެރިހުގައި ޖުލައި 26 އިން އޮގަސްޓް 11 އަށެވެ.