ސިންގަޕޫރު އެއާލައިންސްގެ މުވައްޒަފުންނަށް އަށް މަސް ދުވަހުގެ މުސާރައާ އެއްވަރުގެ ބޯނަހެއް ދޭން ނިންމައިފިއެވެ.
އެ އެއާލައިނުން އެގޮތަށް ނިންމައިފައިވަނީ ވިދިވިދިގެން ދެ އަހަރު ފައިދާ ވުމުންނެވެ.
އެ އެއާލައިން އިން 2023-2024 ވަނަ އަހަރުގެ މާލީ އަހަރުގެ ފައިދާއަށް 2.67 ބިލިއަން ސިންގަޕޫރު ޑޮލަރު ނުވަތަ 1.98 ބިލިއަން ޑޮލަރު ލިބިފައިވާއިރު، މިއީ އޭގެ ކުރީ އަހަރާ އަޅައިބަލާއިރު 24 އިންސައްތަ އިތުރު އަދަދެކެވެ.
އެ އެއާލައިނުން ބުނީ ފަތުރުކުރުމަށް އޮތް ޑިމާންޑު މިހާރު އިތުރުވަމުން އަންނަ ކަމަށާއި އޭގެ ސަބަބުތަކުގެ ތެރޭގައި ދަތުރުފަތުރުކުރުމަށް އާންމުންގެ ބޮޑު ޝައުގުވެރިކަމެއް އޮތުމާއި، ކާގޯ ފްލައިޓްތަކަށް އޮތް ޑިމާންޑް އިތުރުވުން ހިމެނޭ ކަމަށެވެ.
ސިންގަޕޫރު އެއާލައިންސު އެހާ ބޮޑަށް ކުރިއަރާފައިވަނީ ކޯވިޑް 19 އަށްފަހު އެއާލައިން ވަރަށް އަވަހަށް އާންމުންނަށް ހުޅުވައިލުމުން ކަމަށް މަޝްރަހު ދިރާސާކުރާ ފަރާތްތަކުން ބުނެއެވެ.
ސިންގަޕޫރު އެއާލައިންސް އިތުރުން އެމިރޭޓްސްއިން ވެސް ވަނީ ދާދި ފަހުން ފަސް މަހުގެ މުސާރައާ އެއްވަރުގެ ބޯނަސްއެއް މުވައްޒަފުންނަށް ދީފައެވެ. އެމިރޭޓްއަށް މިދިޔަ މާލީ އަހަރު ވަނީ 5.1 ބިލިއަން ޑޮލަރުގެ ފައިދާއެއް ލިބިފައެވެ. އެމިރޭޓްސް މިދިޔަ އަހަރު ވެސް ވަނީ މުވައްޒަފުންނަށް ބޯނަސް ދީފައެވެ.