ސިންގަޕޫރުގެ ކެބިނެޓު މެންބަރެއްގެ ގޮތުގައި 13 އަހަރުވަންދެން މަސައްކަތް ކުރައްވާފައިވާ ސުބްރަމާނިއަމް އިސްވަރަންގެ މައްޗަށް ދައުވާތަކެއް ސާބިތުވެ، އެއް އަހަރަށް ޖަލަށް ލާން ހުކުމްކޮށްފިއެވެ.
އިސްވަރަން ވަނީ މީގެ ކުރިން ޕާލިމެންޓް މެންބަރު ކަމުގެ އިތުރުން އެކި އަހަރުތަކުގައި ޓްރާންސްޕޯޓް، ކޮމިއުނިކޭޝަންސް އެންޑް އިންފޮމޭޝަން، ޓްރޭޑް އެންޑް އިންޑަސްޓްރީ އަދި ބޮޑުވަޒީރުގެ އޮފީހުގެ މިނިސްޓަރުކަން ވެސް ކުރައްވައިފައެވެ.
ދުނިޔޭގެ ގައުމުތަކުގެ ކޮރަޕްޝަނުގެ މައްސަލަަތައް މިންކުރާ ޓްރާންސްޕޭރެންސީ އިންޓަނޭޝަނަލްގެ އިންޑެކްސް ލިސްޓުގައި، ކޮރަޕްޝަން އެންމެ ދަށް ފަސް ގައުމުތަކުގެ ތެރޭގައި ހިމެނޭ ސިންގަޕޫރުގައި، އިސްވަރަންގެ މައްޗަށް ދައުވާ ކުރީ މިދިޔަ ޖެނުއަރީ މަހުގައެވެ.
ދެހާސް އެކާވީސް ވަނަ އަހަރު ޓްރާންސްޕޯޓް މިނިސްޓަރު ކަމަށް ވަޑައިގެންނެވި އިސްވަރަންގެ މައްޗަށް ކުރި ތުހުމަތުތަކުގެ ތެރޭގައި އިންގްލިޝް ޕްރިމިއާ ލީގުގެ މެޗުތައް ބެލުމަށް ޓިކެޓާއި އަގު ބޮޑު ރަލާއި އެ ނޫން ވެސް ހަދިޔާތައް ވިޔަފާރިވެރިންގެ ފަރާތުން ގަބޫލުކުރުން ހިމެނެއެވެ. އެގޮތުން އޭނާ 309،000 ޑޮލަރުގެ ހަދިޔާ ހޯދައިފައިވާ ކަމަށް ދައުވާތަކުގައިވެއެވެ.
އިސްވަރަންގެ މައްޗަށް ދައުވާތައް ކުރުމާއެކު، މިދިޔަ ޖެނުއަރީ މަހުގެ 18ގައި އޭނާ ޓްރާންސްޕޯޓު މިނިސްޓަރުކަމުން އިސްތިއުފާ ދެއްވިއެވެ. އެ ދައުވާތަކަށް އޭނާ ފުރަތަމަ އިންކާރު ކުރެއްވި ނަމަވެސް ފަހުން އޭނާ ވަނީ އޭނާގެ މައްޗަށް ކުރި، ސަރުކާރުގެ މަގާމެއްގައި ހުރެ ހަދިޔާ ގަބޫލުކުރުމުގެ ހަތަރު ދައުވާއާއި އިންސާފަށް ހުރަސް އެޅުމުގެ ދައުވާއަށް އިއުތިރާފުވެފައެވެ.
އެ މައްސަލައިގައި އޭނާގެ މައްޗަށް އެއް އަހަރުގެ ޖަލު ހުކުމެއްކޮށްފައިވާއިރު، އޭނާ ހުކުމް ތަންފީޒު ކުރަން ފަށަން ޖެހޭނީ އަންނަ ހޯމަ ދުވަހުގައެވެ.
ސިންގަޕޫރުގެ މިނިސްޓަރެއްގެ ކޮރަޕްޝަނުގެ މައްސަލައެއް އެންމެ ފަހުން ބަލައިފައި ވަނީ 1986ގައެވެ. އެއީ އެގައުމުގެ އޭރުގެ ނެޝަނަލް ޑެވެލޮޕްމެންޓް މިނިސްޓަރުގެ މައްޗަށް ކުރި ރިޝްވަތުގެ ތުހުމަތުތަކެއްގައެވެ. ނަމަވެސް އެ މައްސަލައިގައި ދައުވާ ކުރުމުގެ ކުރިން އޭނާ ވަނީ މަރުވެފައެވެ.