ރާއްޖޭގައި ވެސް ގިނަ ރިސޯޓުތަކެއް ހިންގާ ސިންގަޕޫރުގެ މަހުޖަނު އޮންގް ބެންގް ސެންގުގެ މައްޗަށް މިއަދު އެ ގައުމުގައި ދައުވާކޮށްފިއެވެ.
އޮންގްގެ މައްޗަށް ތުހުމަތުކުރެވެނީ ރިޝްވަތު ހިފުމާއި އަދުލުއިންސާފަށް ހުރަސްއެޅުމުގެ ކުށުގައި ޖަލަށްލާފައިވާ ސިންގަޕޫރުގެ ކުރީގެ ޓްރާންސްޕޯޓް މިނިސްޓަރު އެސް އިސްވަރަންއަށް ރިޝްވަތު ހުށަހެޅި ކަމަށެވެ. އެގޮތުން، އޭނާއަށް ކޮށްފައިވަނީ އަދުލުއިންސާފަށް ހުރަސްއެޅުމާއި ދައުލަތުގެ މުވައްޒަފަކަށް ހަދިޔާ ހުށަހަޅައިގެން ކުށް ކުރުމަށް ހިތްވަރު ދިނުމުގެ ދައުވާއެވެ.
ބޭރުގެ މީޑިއާތަކުން ރިޕޯޓުކޮށްފައިވާ ގޮތުގައި މި މައްސަލައިގައި ބާއްވާ އިބުތިދާއީ އަޑުއެހުންތައް ތާވަލުކޮށްފައިވަނީ ނޮވެމްބަރު 15 އަށެވެ.
ކޮރަޕްޝަންގެ މައްސަލައިގެ ތަހުގީގުގެ ތެރެއިން މިދިޔަ އަހަރުގެ ޖުލައި މަހު އޮންގް ހައްޔަރު ވެސް ކުރިއެވެ. އެކަމަކު، އޭރު ކަފާލާތުގެ ދަށުން އޭނާ ވަނީ ދޫކޮށްލައިފައެވެ.
ސިންގަޕޫރުގެ ކުރީގެ މިނިސްޓަރު އިސްވަރަން ވަނީ ގާނޫނާ ހިލާފަށް ހަދިޔާ ގަބޫލުކުރުމުގެ ދައުވާއަށް އިއުތިރާފުވެފައެވެ. ދައުވާގައިވާ ގޮތުން އިސްވަރަންއަށް ފޯމިއުލާ ވަން ގްރޯން ޕްރީގެ ޓިކެޓާއި ފްލައިޓް ދަތުރުތަކާއި ހޮޓާތަކުގައި ހުރުމުގެ ހަރަދު އޮންގް ވަނީ ހަމަޖައްސައިދީފައެވެ.
އުމުރުން 77 އަހަރުގެ އޮންގަކީ ރާއްޖޭގެ ބޮޑެތި ވިޔަފާރިތަކާ ގުޅުން އޮންނަ ވިޔަފާރިވެރިއެކެވެ.
އޮންގެ އެޗްޕީއެލް ކުންފުނީގެ ދަށުން ރާއްޖޭގައި އަށް ރިސޯޓު ވެސް ހިންގައެވެ. އޭގެ ތެރޭގައި:
- ކ. ގިލި ލަންކަންފުށި
- ކ. ހޮލިޑޭއިން ރިސޯޓް ކަނޑޫމާ މޯލްޑިވްސް
- ކ. ފޯ ސީޒަންސް މޯލްޑިވްސް އެޓް ކުޑަ ހުރާ
- ބ. ފޯ ސީޒަންސް މޯލްޑިވްސް އެޓް ލަނޑާ ގިރާވަރު
- ބ. ފޯ ސީޒަންސް މޯލްޑިވްސް ޕްރައިވެޓް އައިލެންޑް އެޓް ވޯވަށް
- ރ. އިންޓަކޮންޓިނެންޓަލް މޯލްޑިވްސް މާމުނާގާ
- ލ. ސިކްސް ސެންސަސް ލާމު
- ޅ. ކަނުހުރާ
ކޮވިޑްގެ ދަތި ހާލަތުގައި ވެސް އޮންގް ވަނީ ރާއްޖެއަށް ބޮޑެތި އެހީތެރިކަން ފޯރުކޮށްދީފައެވެ. އެގޮތުން، އެޗްޕީއެލްއިން ވަނީ 15 ވެންޓިލޭޓަރެއް ރާއްޖެއަށް ހަދިޔާކޮށްފައެވެ. އަދި، 100,000 މާސްކް ވެސް އެ ކުންފުނިން ވަނީ ހަދިޔާ ކޮށްފައެވެ.