ބޮލީވުޑްގެ އެކްޓަރު ކާތިކް އާރްޔަންގެ ފިލްމު "ޗަންދޫ ޗެމްޕިއަން"ގައި އެކްޓަރު ފެންނާނެ ގޮތުގެ ޕޯސްޓަރު އާއްމުންނަށް ދައްކާލައިފިއެވެ.
މިދިޔަ އަހަރުގެ ފަހުކޮޅު މި ފިލްމުގެ މަސައްކަތް ނިމިފައިވާއިރު މި ފިލްމުގައި ކުޅުނު ރޯލަށް ތައްޔާރުވުމުގެ ގޮތުން ކާތިކްގެ ހަށިގަނޑަށް ވަރަށް ބޮޑު ބަދަލެއް ގެނައެވެ. އެގޮތުން, އެއް އަހަރު ވަންދެން ކާތިކް ވަނީ ފޮނި ކާތަކެއްޗާ ދުރުހެލިވެފައެވެ. ފިލްމުގެ ޕޯސްޓަރު ރިލީޒްކުރުމާ އެކު ފިލްމަށް ތައްޔާރުވުމުގެ ގޮތުން ކާތިކް ކުރި މަސައްކަތް އަންދާޒާ ކޮށްލެވޭ ކަމަށް ބެލުންތެރިން ވަނީ ބުނެފައެވެ.
ކާތިކް އާރްޔަން އަދި ޑައިރެކްޓަރު ކަބީރު ޚާން--ފޮޓޯ/ޓެލެގްރާފްއިންޑިއާ
ޕްރޮޑިއުސަރު ސާޖިދު ނަދިއަދުވާލާ އަދި ކަބީރު ޚާން ގުޅިގެން ގެނެސްދޭ މި ފިލްމަކީ، ކަބީރު ޚާން ޑައިރެކްޓް ކޮށްފައިވާ ފިލްމެކެވެ. ކުޅިވަރަށް ހާއްސަ ބައޮގްރަފިކަލް ސްޕޯޓްސް ޑްރާމާ ސިނަމާތަކަށް ގެންނަން ނިންމާފައިވަނީ ކުރިއަށް އޮތް ޖޫން މަހުގެ 14ވަނަ ދުވަހުއެވެ.
މި ފިލްމުގައި ގެނެސްދޭ ވާހަކަ ބިނާކޮށްފައިވަނީ 1970ވަނަ އަހަރުގެ ކޮމަންވެލްތު ގޭމްސް އަދި 1972ވަނަ އަހަރު ޖަރުމަނީގައި ބޭއްވި ޕެރަލިމްޕިކްގައި ރަން މެޑަލް ހޯދި ކުރީގެ އެތްލީޓް މުރްލީކަންތު ޕެޓްކަރުގެ ހަޔާތުގެ މައްޗަށެވެ. މިއީ ފިލްމު "ބަޖްރަންގްޖީ ބައިޖާން"، "އޭކް ތާ ޓައިގާ" އަދި "83"ފަދަ ފިލްމުތައް ގެނެސްދީފައިވާ ޑައިރެކްޓަރު ކަބީރާއެކު ކާތިކް މަސައްކަތްކުރި ފުރަތަމަ ފިލްމެވެ.