ސަޢޫދީ ޢަރަބިއްޔާގެ ރަސްގެފާނު ސަލްމާން ބިން ޢަބްދުލްޢަޒީޒްގެ ޚާއްސަ މެހެމާން ދާރީގައި ރައީސް ޑރ. މުޙައްމަދު މުޢިއްޒާއި އަނބިކަނބަލުން ސާޖިދާ މުޙައްމަދު އެގައުމަށް ކުރެއްވި ދަތުރުފުޅަށްފަހު މިއަދު އެނބުރި ވަޑައިގެންފިއެވެ.
ރައީސްގެ ދެ ކަނބަލުން ސައުދީއަށް ފުރާވަޑައިގަތީ މިދިޔަ ހުކުރު ދުވަހުއެވެ.
އެ ދަތުރުފުޅުގައި ރައީސްގެ އަރިހުގައި އިސްލާމިކް މިނިސްޓަރު މުޙައްމަދު ޝަހީމް ޢަލީ ސަޢީދާއި އިސްލާމީ މަރްކަޒުގެ އިސް އިމާމު މުޙައްމަދު ލަޠީފާއި ރައީސް އޮފީހުގެ ޗީފް އޮފް ސްޓާފް ޢަބްދުﷲ ފަޔާޒާއި ރައީސް އޮފީހުގެ މިނިސްޓަރުން ޢަލީ ޢާރިފާއި ޢަބްދުﷲ ނާޞިރު ބައިވެރިވެވަޑައިގެންނެވިއެވެ.
ރައީސް ދެކަނބަލުންގެ އަރިހުގައި އެ ބޭފުޅުން ދަތުރުފުޅު ކުރެއްވީ ސަޢޫދީ ސަރުކާރުން ފޮނުއްވި ޚާއްސަ މަތިންދާބޯޓެއްގައި ކަމަށް ރައީސް އޮފީހުން ބުންޏެވެ.
ޝަހީމް މީގެ ކުރިން ވިދާޅުވި ގޮތުގައި ސައުދީން ރައީސަށް މަރުޙަބާ ދެންނެވީ މަދީނާ ސަރަޙައްދުގެ ގަވަރުނަރު، ޞާޙިބުއްސުމުއްވުލް މަލަކީ އަލްއަމީރް ސަލްމާން ބިން ސުލްޠާން ބިން ޢަބްދުލްޢަޒީޒް އާލް ސުޢޫދެވެ.
އެ ދަތުރުފުޅުގައި ރައީސް ވަނީ ތަޢުލީމު ހާސިލްކުރުމަށް މަދީނާގައި ތިބި ދަރިވަރުންނާ ބައްދަލުކުރައްވައިފައެވެ. އެގޮތުން 24 ދަރިވަރަކާ ބައްދަލު ކުރައްވައި، އެ ކުދީން ބޭނުންވާ ކަންކަމާއި، އެ ކުދީންގެ ހުރި ކަންބޮޑުވުންތައް ރައީސް ވަނީ އައްސަވައިފައެވެ.