ކައުންސިލްތަކަށް ސަރުކާރުން ދޭ ބްލޮކް ގްރާންޓްގެ ފައިސާ ލިބުމުގައި ލަސްވާކަމުގެ ކަންބޮޑުވުން ކައުންސިލްތަކުން ފާޅުކުރަން ފަށައިފިއެވެ.
މި ފައިސާ ލިބުން ލަސްވުމުގެ ކަންބޮޑުވުން ފާޅުކޮށް، ވާވު އަތޮޅު ކައުންސިލްގެ ރައީސް ޝުޖާއު އަލީ ވިދާޅުވީ، ފައިސާ ލިބުން ލަސްވާކަން ފާހަގަވާން ފެށީ މިދިޔަ ނޮވެމްބަރު މަހުން ފެށިގެން ކަމަށެވެ.
އެގޮތުން، މީގެ ކުރިން ކައުންސިލްތަކުގެ ޚަރަދަށްވާ ފައިސާ މަހުގެ 20ވަނަ ދުވަހާ ހަމައިން ލިބުނު ނަމަވެސް، މިހާރު ބައެއް މަސްމަހު ފައިދާ ނުލިބި ދޮޅު މަސް ހޭދަވާކަމަށް އޭނާ ވިދާޅުވިއެވެ.
"ވޭތުވެދިޔަ ފަސް މަހު މި ދަނީ އެއްވެސް މަހެއްގެ ފައިސާއެއް އެ މަހުގެ މުސާރަ ލިބެންވާއިރަށް ނުލިބި. އެހެންވީމަ ކައުންސިލްގައި ހުންނަ ފައިސާއަކުން އަޅުގަނޑުމެން ޖެހެނީ ކައުންސިލްގެ ޚަރަދުތައް މެނޭޖްކުރަން،" ޝުޖާއު ވިދާޅުވިއެވެ.
އޭނާ ވިދާޅުވީ، ކައުންސިލްގެ ހުރިހާ ޚަރަދެއް ވެސް ކުރަނީ ސަރުކާރުން ދޭ ބްލޮކް ގްރާންޓުން ކަމަށެވެ. އެހެންކަމުން މި ފައިސާ ނުލިބުމުން މުސާރަ ދިނުމަށް ވެސް އުނދަގޫ ވާކަމަށް އޭނާ ވިދާޅުވިއެވެ. އަދި ކަރަންޓު ބިލާއި ފެންބިލު ފަދަ ބިލްތައް ދައްކަން ގޮންޖެހުން ކުރިމަތިވާ ކަމަށް ޝުޖާއު ވިދާޅުވިއެވެ.
ކައުންސިލްތަކަށް ދޭ ފައިސާއަކީ ގާނޫނަކުން ވަކި ގޮތަކަށް ދޭން ކަނޑައަޅައިގެން ދޭ އެއްޗަކަށް ވާއިރު، މި ފައިސާ ލިބުން ލަސްވުމުން ކައުންސިލް ހިންގަން ބޭނުންވާ ސްޕީޑުގައި ނުހިނގާކަމަށް ޝުޖާއު ވިދާޅުވިއެވެ.
"މި ލާރި ނުލިބޭކަމުގައި ވަނީނަމަ، އަޅުގަނޑުމެންގެ މިއަހަރުގެ ޕްރޮގްރާމްތައް ހިންގަން އެހެން މީސްމީހުންނާ އެކީގަ ހޯދަންޖެހޭ ޚިދުމަތްތައް ހޯދަން އެބަ ބިރުގަނޭ،" އޭނާ ވިދާޅުވީ އެ ފައިސާ ނުލިބޭ ނަމަ އެއީ ކައުންސިލްތަކަށް ކުރިަތިވާ މާލީ ދައްޗެއް ކަމަށެވެ.
މިކަމާ ގުޅިގެން މިހާތަނަށް ލޯކަލް ގަވަމަންޓް އޮތޯރިޓީ (އެލްޖީއޭ)ގެ ބަހެއް އަދި ނުލިބެއެވެ.
މި ސަރުކާރުން ދަނީ ކައުންސިލްތައް ބާރުވެރި ކުރުވާ މާލީގޮތުން މިނިވަން ބަޔަކަށް ހެދުމަށް މަސައްކަތްތަކެއް ކުރަމުންނެވެ. އެގޮތުން، މީރާއަށް ލިބޭ ޓެކްސް ފައިސާއިން ކައުންސިލްތަކަސް ބައެއް ދިނުމަކީ ވިސްނުން ކަމަށް ރައީސް ޑރ. މުހައްމަދު މުއިއްޒު ވަނީ މީގެ ކުރިން ވިދާޅުވެފައެވެ.