އިންގްލިޝް ޕްރިމިއާ ލީގުގެ ތަށި ޖެހިޖެހިގެން ހަތަރު ވަނަ ފަހަރަށް ކާމިޔާބުކޮށް ތާރީހްގެ ތެރެއިން ޖާގައެއް ހޯދުމަށް މަސައްކަތް ކުރަމުންދާ މެންޗެސްޓާ ސިޓީ އާއި ފުލަމް ބައްދަލުކުރި މެޗް ކާމިޔާބުކޮށް ތާވަލްގެ އެއްވަނައަށް ސިޓީ އަރައިފިއެވެ.
ފުލަމްގެ ދަނޑުގައި ކުޅުނު މި މެޗު ސިޓީ އިން ކާމިޔާބު ކޮށްފައިވަނީ ހަަތަރު ލަނޑު ސުން ލަނޑުންނެވެ. ދެ ޓީމުން ފަރާތުން ވާދަވެރި ކުޅުމެއް ފެނިގެންދިޔަ މި މެޗުގައި ގިނައިރު ބޯޅަ ގެންގުޅެ ގިނަ ހަމަލާ އުފައްދާފައިވަނީ ސިޓީއިންނެވެ.
މި މެޗުގެ ފުރަތަމަ ދެ ތިން މިނެޓުގައި ފުލަމްއިން މޮޅު ކުޅުމެއް ދެއްކި ނަމަވެސް ސިޓީއިންވަނީ އެހާ ހިސާބުން މެޗުގެ ކޮންޓްރޯލް އަތުލައިފައެވެ. މިގޮތުން މެޗުގެ 13ވަނަ މިނެޓުގައި އުފެއްދި ހަމަލާއެއްގައި އެ ޓީމުންވަނީ މެޗުގެ ލީޑު ވެސް ނަގައިފައެވެ. މި ލަނޑު އެ ޓީމަށް ޖަހައިދިނީ މި ސީޒަންގައި އެ ޓީމާ ގުޅުނު ޖޮސްކޯ ގްވަޑިއޯލްއެވެ.
މި ލަނޑާއެކު ސިޓީއިން ވަނީ ހަމަޖެހިލާ މޮޅު ކުޅުމެއް މި މެޗުގައި ދައްކައިފައެވެ.
މި މެޗުގެ ފުރަތަމަ ހާފުގައި އިތުރު ލަނޑެއް ފެނިގެން ނުދިޔަ ނަމަވެސް ލަނޑު ޖަހާނެ ރަނގަޅު ފުރުސަތު ދެ ޓީމަށް ވެސް ލިބިގެންދިޔައެވެ. މި މެޗުގައި ސިޓީގެ ދެވަނަ ލަނޑު މެޗުގެ 59ވަނަ މިނެޓުގައި ޖަހައިދީ އެ
ޓީމުގެ ލީޑު ފުޅާކޮށްދިނީ މި ސީޒަންގައި ސިޓީގެ އެންމެ ފާހަގަކޮށްލެވޭ އެއް ކުޅުންތެރިޔާގެ ގޮތުގައި ފާހަގަވެފައިވާ ފިލް ފޯޑެންއެވެ.
މި ލަނޑު ޖެހިތާ މާގިނަ އިރުތަކެއް ނުވެ ސިޓީގެ ފޯވަޑް އާލިން ހާލަންޑަށް އެ ޓީމުގެ ލީޑު އިތުރަށް ފުޅާކޮށްދޭނެ ފުރުސަތެއް ލިބިގެންދިޔަ ނަމަވެސް އެ ހަމަލާ އޭނާއަށް ލަނޑަކަށް ބަދަލު ކޮށްލެވޭ ގޮތެއް ނުވިއެވެ.
މި މެޗުގައި ސިޓީއިން ތިންވަނަ ލަނޑު ޖަހައިދިނީ ފުރަތަމަ ލަނޑު ވެސް ޖަހައިދިން ޑިފެންޑާ ގުވަޑިއޯލްއެވެ. މެޗުގެ 71ވަނަ މިނެޓުގައި ޖަހައިދިން މި ލަނޑު އޮފް ސައިޑްކަމަށް ހީވެގެންދިޔަ ނަމަވެސް ވީއޭއާރުން ބެލުމަށްފަހު އެ ލަނޑު ވަނީ ބަލައިގެންފައެވެ.
ސިޓީގެ ފަހު ލަނޑަކީ މެޗުގެ އިތުރު ވަގުތުގައި ލިބުނު ޕެނަލްޓީއަކުން ހޫލިއަން އަލްވަރޭޒް ޖަހައިދިން ލަނޑެކެވެ. މި ލަނޑު ޖެހުމަށް ލިބިގެންދިޔަ ޕެނަލްޓީ ލިބުމަށް ދިމާވި ހާދިސާގެ ތެރޭގައި ފުލަމްގެ އީސާ ޑިއޮޕްއަށް ވަނީ ދެވަނަ ރީނޑޫ ކާޑާއެކު ރަތްކާޑު ދައްކާފައެވެ.
މި ކާމިޔާބީއާއެކު ސިޓީއިން މިވަނީ މިހާތަނަށް ކުޅުނު 36 މެޗުން ލިބިފައިވާ 85 ޕޮއިންޓާއެކު ތާވަލްގެ އެއްވަނައިގާ ދެ ޕޮއިންޓްގެ ލީޑެއް ނަގައިފައެވެ.
އަދި މިފަހަކަށް އައިސް ތާވަލްގެ އެއްވަނަ މަގާމުގައި އޮތް އާސެނަލް މިވަނީ ދެވަނަ މަގާމަށް ވެއްޓިފައެވެ.
ނަމަވެސް އާސެނަލާއި މެންޗެސްޓާ ޔުނައިޓެޑް ބައްދަލުކުރާ މެޗު އާސެނަލްއަށް ކާމިޔާބު ކުރެވިއްޖެނަމަ އެ ޓީމަށް ތާވަލްގެ އެއްވަނައަށް އެރީ ލީޑު ކާމިޔާބު ކުރާ ޓީމެއް ކަށަވަރުވުން ލީގުގެ ފަހު ހަފުތާއަށް ދެމިގެންދާނެއެވެ. މި މެޗުން ބަލިވުމުން ފުލަމް މިހާރު އުޅެނީ 37 މެޗުން ލިބިފައިވާ 44 ޕޮއިންޓާއެކު ތާވަލްގެ 14 ވަނައިގައެވެ.