ތައިލެންޑުގައި ހޫނު ގަދަވެގެން މިއަހަރުގެ މިހާތަނަށް 61 މީހުން މަރުވެފައިވާ ކަމަށް އެ ގައުމުގެ ސިއްހަތާބެހޭ ވުޒާރާއިން ހާމަކޮށްފިއެވެ.
ހޫނުގަދަވެގެން މިދިޔަ އަހަރުވެސް ތައިލޭންޑުން 37 މީހުންވަނީ މަރުވެފައެވެ. އެންމެ ގިނައިން މީހުން މަރުވެފައި ވަނީ ތައިލޭންޑުގެ އިރު އުތުރު ސަރަހައްދުތަކުންނެވެ.
ފާއިތުވި ހަފުތާތަކުގައި ތައިލެންޑަށް ވަރަށް ބޮޑަށް ހޫނުގަދަވެ، ގެއިން ބޭރަށް ނުކުމެ ނޫޅުމަށް ކަމާބެހޭ އިދާރާތަކުން އިލްތިމާސްކުރިއެވެ.
އޭޕްރީލް މަހަކީ އާންމުކޮށް ތައިލެންޑަށް ހޫނު މަހެއް ނަމަވެސް ޕެސިފިކް ސަރަހައްދުގައި އުފެދިފައިވާ އެލް ނީނޯގެ ސަބަބުން މިއަހަރުގެ ހާލަތު ވަނީ ވަރަށް ބޮޑަށް ގޯސްވެފައެވެ.
އޭޕްރީލް މަހުގެ ތެރޭގައި ތައިލެންޑުގެ ހޫނުމިން 44.2 ޑިގްރީ ސެލްސިއަސްއަށް އެރިއެވެ.
ދުނިޔޭގެ ފިނިހޫނުމިން މިދިޔަ އަހަރު ރެކޯޑް މިންވަރަކަށް މަތިވެފައިވާއިރު، އޭޝިއާ ހޫނުވަމުން އަންނަނީ ވަކިން ހަލުވި ދުވެއްޔެއްގައި ކަމަށް އދ.ގެ މޫސުމާބެހޭ އިދާރާއިން ބުނެފައިވެއެވެ.