ކުޑަކުދީންނަކީ އެންމެންގެ ޒިންމާއެއް ކަމަށާއި ފަލަސްތީނުގެ ބިމުގައި ޝަހީދުވަނީ ވެސް "ހަމަ އަޅުގަނޑުމެންގެ ދަރީން" ކަމަށް ވިދާޅުވެ، ކުޑަކުދިންގެ ރައްކާތެރިކަމަށް އެންމެން މަސައްކަތް ކުރަންޖެހޭ ކަމަށް ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެއެވެ.
ކުޑަކުދީންގެ ދުވަހުގެ މުނާސަބަތުގައި ފޮނުއްވި ޚިތާބުގައި ރައީސް މުއިއްޒު މިއަދު ވަނީ، މަރުޙޫމް މުޙައްމަދު ޖަމީލުދީދީ 1981 ވަނަ އަހަރު ލިޔުއްވައި، ޝާއިޢުކުރެއްވި "ހައްތާވެސް ދަރީންނެވެ." ކުރު ވާހަކައަށް އިޝާރާތްކުރައްވައިފައެވެ. އެ މަނިކުފާނު ވިދާޅުވީ، އެ ކުރު ވާހަކައިގައި ބަޔާންކުރާ ފަދައިން ކުޑަކުދީންނަކީ އުފަން ދަރިން ނޫން ނަމަވެސް، އެންމެންގެ ވެސް ޒިންމާއެއް ކަމަށެވެ.
"މި ވާހަކައިން ލިބިދޭ އެންމެ ބޮޑު އެއް ޢިބުރަތަކީ، އުފަން ދަރީން ނޫނަސް، ކޮންމެ ކުޑަކުއްޖަކީ ވެސް ދަރިއެއްކަމުގައި ދެކި އޯގާތެރިކަމާއި އެހީތެރިކަމާ އެކު ދިރިއުޅެން ފަށައިފި މީހެއްގެ ނަފުސާއި ރޫޙަށް ލިބޭނެ ހަމަޖެހުމެވެ. މިފަދަ ދުވަހެއްގައި މިއީ، ވިސްނައިލުން މުހިންމު ނުކުތާއެކެވެ،" އެ މަނިކުފާނު ވިދާޅުވިއެވެ.
އެ ނުކުތާއަށް އަލިއަޅުވައިލައްވައި ރައީސް ވިދާޅުވީ، މިއަދު އެންމެ ބޮޑު އަސަރެއް އެ މަނިކުފާނަށް ކުރުވަނީ އިޒްރޭލުގެ އަނިޔާވެރިކަމުގައި ފަލަސްތީނުގެ ކުޑަކުދީންނަށް ޖެހޭ ހާލާ މެދު ކަމަށެވެ. އެ މަނިކުފާނުގެ ޚިތާބުގައި ވަނީ އަނިޔާލިބި ގެދޮރާއި ސަހަރޯވެރީން ގެއްލި ނިކަމެތިވަމުންދާ ކޮންމެ ކުއްޖަކަށް މާތް ﷲގެ މަދަދުވެރިކަން މިންވަރުކުރައްވާތޯ ދުޢާ ދަންނަވައިފައެވެ.
ރައީސް، ކުޑަކުއްޖަކާ ސަލާމްކުރައްވަނީ، އެ މަނިކުފާނު ވިދާޅުވީ ކުޑަކުދިންނަކީ އެންމެންގެ ޒިންމާއެއް ކަމަށް -- ފޮޓޯ/ ރައީސް އޮފީސް
"އިޒްރޭލުގެ އަނިޔާވެރި އަތްތަކުގެ ޝިކާރައަކަށްވެ، ޙަޔާތުގެ ޅަނދޮޅު ފޯވަހީގެ އެންމެ ހިތްފަހި ދުވަސްތަކުގެ އުފަލާއި، ތަޢުލީމާއި، ޢާއިލީ ލޯބިން މަޙްރޫމްވަމުން އެދާ މަޢުޞޫމް ކުދީންނަކީ ހަމަ އަޅުގަނޑުމެންގެވެސް ދަރީންނެވެ،" ޚިތާބުގައި ރައީސް ވިދާޅުވިއެވެ.
އެ މަނިކުފާނު ވިދާޅުވީ، ކުޑަކުދީންނަށް ރައްކާތެރިވުމާއި އެ ކުދިންނަށް ރީތި ނަމޫނާ ދެއްކުމާއި، ހެޔޮ މަގަށް އެ ކުދީންގެ ސުލޫކު ބައްޓަންކުރަން މަގުދައްކައިދިނުމަކީ ކޮންމެ މީހެއްގެ ކޮނޑުގައި ވެސް އެޅިފައިވާ ވަރަށް މުހިންމު ދީނީ، އިންސާނީ، އަދި ގައުމީ މަސްއޫލިއްޔަތެއް ކަމަށެވެ.
ރައީސް މުއިއްޒު ވަނީ މަރުޙޫމް މުޙައްމަދު ޖަމީލް ދީދީ ވިދާޅުވި ފަދައިން، "ހައްތާވެސް ދަރީން" ކަމުގައި ދެކި، ކޮންމެ ކުއްޖަކާ މެދު ވެސް ދަރިކުލުނާ އިމެއްމިނެއް ނެތް ތެދުވެރި ލޯތްބާ އެކު މުޢާމަލާތު ކުރަން އެދިވަޑައިގެންފައެވެ.
އެ ހުރިހާ ކަމެއްގެ ވެސް އެންމެ ރިވެތި ނަމޫނާއެއް މުޅި އިންސާނިއްޔަތަށް ވެސް ދައްކަވާފައިވަނީ މާތް ނަބިއްޔާ މުޙައްމަދު صلى الله عليه وسلم ގެ ރިވެތި ސީރަތުންކަން ފާހަގަކުރައްވައި ރައީސް ވިދާޅުވީ، ކުޑަކުދީން ބޮދެތި ކުރަން ވާނީ އިސްލާމީ އުސޫލުތަކަށް ކަމޭހިތައި، ދިވެހިވަންތަކަމަށް ލޯބިކުރާ އަދި، ގައުމު އިސްކުރާ، ގޮތްހުރި އުޅުންހުރި ޖީލެއްގެ ގޮތުގައި ކަމަށެވެ.
ރައީސް މުއިއްޒު: އެ މަނިކުފާނު ވަނީ ކުޑަކުދީންނަށް ބޭނުންވާ ވަސީލަތްތައް ހުރިހާ ރަށެއްގައި ގާއިމުކޮށްދެއްވާނެކަމަށް ވިދާޅުވެފައި -- ސަން ފޮޓޯ/ މޫސާ ނަދީމް
މީގެ އިތުރުން، ކުޑަކުދީން އެންމެ ގިނައިން އެ މަނިކުފާނުގެ އަރިހުގައި އެދެނީ ޕާކުތަކާއި ކުޅިވަރުކުޅޭ ތަންތަން ބިނާކޮށްދޭންކަން ފާހަގަކުރައްވައި ރައީސް ވަނީ ހުރިހާ ރަށެއްގައި ވެސް ކުޑަކުދީންނަށް ބޭނުންވާ އެފަދަ ތަންތަން ބިނާކޮށްދެއްވާނެކަމުގެ ޔަގީންކަން އަރުވައިފައެވެ.
އަދި، އެކި ކަންކޮޅުތަކުގައި ކުތުބުޚާނާތައް ބިނާކުރަން ފަށައި، ކުޑަކުދީންގެ ސިކުނޑިތަކަށް ޢިލްމާއި މަޢުލޫމާތުން ކާނާ ލިބޭނެ މަގުތައް އިތުރުކޮށްދެއްވާނެ ކަމަށް ވެސް އެ މަނިކުފާނުގެ ޚިތާބުގައި ވިދާޅުވިއެވެ.
"ބަވަނަވަމުން މިދާ ދުނިޔެއަށް ހަލުވިކަމާއެކު އަންނަ ބަދަލުތަކާއި، ކުރިއަރަމުން އަންނަ ޓެކްނޮލޮޖީތަކަށް ދަރީން އަހުލުވެރިކުރުވަން ވާނީ އަޅުގަނޑުމެން ނުހަނު ހުޝިޔާރުވެ ތިބެއެވެ. ޒަމާނީ ކޮންމެ އޮއިވަރަކާއެކު އަންނަ ނުކިއްސަރު ކަންކަމުން ދަރީން ދަފަރާ ކުރާން ހޭލުންތެރިވެ ތިބެއެވެ،" އެ މަނިކުފާނު ވިދާޅުވިއެވެ.
ރާއްޖޭގައި ޤައުމީ ފެންވަރުގައި ކުޑަކުދީންގެ ދުވަސް ފާހަގަކުރަން ފެށީ 1979 ވަނަ އަހަރުއެވެ.