ޕިއްޒާއެއް ކާން އެއް ދުވަހުގެ ދަތުރެއް އިޓަލީއަށް

ޕިއްޒާއެއް ކާން ދެ ރައްޓެހިން އިނގިރޭސިވިލާތުން އިޓަލީވިލާތަށް އެއްދުވަހުގެ ދަތުރެއް ކޮށްފިއެވެ.

މެންޗެސްޓާ އިވިންގް ނިއުސްއިން ރިޕޯޓުކޮށްފައިވާ ގޮތުގައި 27 އަހަރުގެ މޯގަން ބޯލްޑް، އޭނާގެ އެކުވެރިޔާ 26 އަހަރުގެ ޖެސް ވުޑާ، ޕިއްޒާ ކާން އިޓަލީއަށް ދަތުރުކޮށްފައިވަނީ އޭޕްރީލް 24 ވަނަ ދުވަހުގެ ހެނދުނެވެ. ހެނދުނު 6 ޖެހިއިރު ލިވާޕޫލުން ފުރައިގެން އިޓަލީގެ ޕިސާއަށް ގޮސް ރޭގަނޑު 11 ޖެހިއިރު އެނބުރި ލިވާޕޫލަށް އެ ދެ މީހުން ވަނީ ގޮސްފައެވެ.

ފްލައިޓް ޓިކެޓާއި އެއާޕޯޓް ޕާކިންއާއި ކެއުން އަދި އެހެނިހެން ކަންތައްތައް ހިމެނޭހެން މުޅި ދަތުރަށް އެ މީހުން ހޭދަކުރީ 170 ޕައުންޑެވެ.

"އެގޮތަށް ދަތުރުކުރުމަކީ ވަރަށް ފަސޭހަ ކަމެއް. ދަބަހެއް ޗެކް ކުރާކަން ނުޖެހޭ. ސެކިއުރިޓީ ނިންމާފައި ސީދާ ފްލައިޓަށް އެރޭނެ. އަހަރެން އޮފީހުން ޗުއްޓީ ނެގީ އެންމެ ދުވަހެއް. ޖެހިގެން އައި ދުވަހު އެނބުރި އޮފީހަށް ދިޔައިން،" އެ ދަތުރުގައި ބައިވެރިވި މޯގަން ބޯލްޑް ބުންޏެވެ.

އިނގިރޭސިވިލާތުން އިޓަލީއަށް ފްލައިޓެއްގައި ދަތުރުކުރަން އާންމު ގޮތެއްގައި ނަގަނީ 2 ގަޑިއިރާ 30 މިނެޓެވެ.