ކުރީގެ ފަސްޓް ލޭޑީ ނަސްރީނާ އިބްރާހީމް ހިމެނޭ ގޮތަށް، ތެލެސީމިއާ ބަލިމީހުންނަށް ދޭ ޚިދުމަތް ފުޅާކުރުމަށް މަސައްކަތްކުރެއްވި ފަރާތްތަކުގެ އަގުވަޒަންކޮށް ހަނދާނީފިލާ ދީފިއެވެ.
ބައިނަލްއަގުވާމީ ތެލެސީމިއާ ދުވަސް ފާހަގަކުރުމަށް ބޭއްވި ޖަލްސާގައިވަނީ، މޯލްޑިވްސް ބްލަޑް ސާވިސަސްއަށް 20 އަހަރަށްވުރެ ދިގު މުއްދަތަށް ޚިދުމަތްކޮށްދެއްވާފައިވާ ބޭފުޅުންގެ އިތުރުން ތެލެސީމިއާ ޚިދުމަތް ފުޅާކުރުމަށް މަސައްކަތްކޮށްފައިވާ ޖަމިއްޔާ ޖަމާއަތްތަކާއި ބޭފުޅުންގެ ވެސް އަގު ވަޒަންކޮށްފައެވެ.
ބްލަޑް ސާވިސްގައި 20 އަހަރަށްވުރެ ގިނަ މުއްދަތަކަށް ޚިދުމަތް ކުރެއްވުމުގެ އަގު ވަޒަންކުރުމުގެ ގޮތުން ހަނދާނީ ފިލާ ދެއްވީ ރައީސް ޑރ. މުޙައްމަދު މުޢިއްޒުގެ އަނބިކަނބަލުން ސާޖިދާ މުޙައްމަދެވެ. އެގޮތުން ހަނދާނީ ފިލާ ލިބިލެއްވި ބޭފުޅުންނަކީ:
- ފައުޒިއްޔާ އަލީ، މ. ލަކީހެވަން، މާލެ - އެންރޯލްޑް ނާސް (ޚިދުމަތް ކުރައްވަމުން ގެންދަވާތާ 29 އަހަރާއި ދެ މަސް)
- އަލްފާޟިލާ ނަސްރިއްޔާ އާދަމް، ކުރިބޯށިގެ، ހއ. ހޯރަފުށި - އެންރޯލްޑް ނާސް (ޚިދުމަތް ކުރައްވަމުން ގެންދަވާތާ 24 އަހަރާއި 11 މަސް)
- މަރިޔަމް ރަޝީދާ އަލީ، މިނާން، ހދ. ކުޅުދުއްފުށި - ރެޖިސްޓާޑް ނާސް (ޚިދުމަތް ކުރައްވަމުން ގެންދަވާތާ 24 އަހަރާއި ފަސް މަސް)
- ޝިފާ އިބްރާހީމް، ނޫރަންގެ، ށ. ކުރެންދޫ - ސީނިއާ ލެބޯޓަރީ ޓެކްނޯލޮޖިސްޓް (ޚިދުމަތް ކުރައްވަމުން ގެންދަވާތާ 23 އަހަރާއި 11 މަސް)
- ފަރީދާ، ގ. ގޮޅާގެ، މާލެ - އެޓެންޑެންޓް (ޚިދުމަތް ކުރައްވަމުން ގެންދަވާތާ 23 އަހަރާއި ނުވަ މަސް)
- ހައްވާ ނަސީރު، ރަށްދެބައިގެ، ސ. ހިތަދޫ - މެޑިކަލް ލެބޯޓަރީ ޓެކްނީޝަން (ޚިދުމަތް ކުރައްވަމުން ގެންދަވާތާ 21 އަހަރާއި ފަސް މަސް)
ބްލަޑް ސާވިސްގައި 20 އަހަރަށްވުރެ ގިނަ މުއްދަތަކަށް ޚިދުމަތް ކުރެއްވުމުގެ އަގު ވަޒަންކުރުމުގެ ގޮތުން ހަނދާނީ ފިލާ އެރުވުން: މެޑަމް ސާޖިދާ، ހަނދާނީ ފިލާ ލިބުނު ފަރީދާއާއެކު -- ފޮޓޯ/ ރައީސް އޮފީސް
ތެލެސީމިއާގެ ޚިދުމަތް ފުޅާކުރުމަށް ޚާއްސަ މަސައްކަތްތަކެއް ކޮށްދެއްވާފައިވާ ޖަމިއްޔާ ޖަމާއަތްތަކާއި، ބޭފުޅުންގެ އަގުވަޒަންކޮށް، ހަނދާނީފިލާ ހަވާލުކޮށްދެއްވީ ރައީސް ޑރ. މުޙައްމަދު މުޢިއްޒެވެ. އެގޮތުން ހަނދާނީފިލާ ލިބުނު ދެ ޖަމިއްޔާއަކީ:
- ސޮސައިޓީ ފޯ ހެލްތް އެޑިއުކޭޝަން (ޝީ)
- މޯލްޑިވިއަން ތެލެސީމިއާ ސޮސައިޓީ
ތެލެސީމިއާގެ ޚިދުމަތް ފުޅާކުރުމަށް ޚާއްސަ މަސައްކަތްތަކެއް ކޮށްދެއްވާފައިވާތީ، އެ ކަމުގެ އަގުވަޒަންކުރުމުގެ ގޮތުން ހަނދާނީފިލާ ލިބިވަޑައިގެންނެވި ބޭފުޅުންނަކީ:
- މެޑަމް ނަސްރީނާ އިބްރާހީމް
- ޑރ. ނާއިލާ އިބްރާހީމް މުޙައްމަދު ދީދީ
- އަލްމަރްޙޫމާ ޑރ. ފަރުޒާނާ ޚާތޫންގެ ހަނދާނަށް
މި ޖަލްސާގައި ރައީސްގެ ދެކަނބަލުންގެ އިތުރުން، ހެލްތް މިނިސްޓަރު ޑރ. އަބްދުﷲ ޚަލީލު ވެސް ބައިވެރިވެ ވަޑައިގަތެވެ.