ފަހި ދިރިއުޅުން ކޯޕަރޭޝަން (އެފްޑީސީ)ގެ ލޯގޯ މި ފަހުން ބަދަލުކޮށްފައިވާއިރު އެކަން ކޮށްފައިވަނީ އިތުރު އެއްވެސް ޚަރަދެއް ނުކޮށް ކަމަށް އެ ކޯޕަރޭޝަނުން މިއަދު ބުނެފިއެވެ.
އެފްޑީސީގެ އާ ލޯގޯ އިފްތިތާހު ކޮށްދެއްވީ އެ ކުންފުނީގެ ފަސް ވަނަ އަހަރީ ދުވަސް ފާހަގަ ކުރުމަށް މިދިޔަ ހުކުރު ދުވަހު ބޭއްވި ހަފުލާއެއްގައި ނައިބު ރައީސް ހުސައިން މުޙައްމަދު ލަތީފެވެ.
ސަރުކާރު ކުންފުނިތައް ރީ ބްރޭންޑް ކުރުންފަދަ ބަދަލުތަކަށް އާއްމުކޮށް ވަރަށް ބޮޑެތި ހޭދަތަކެއް ކުރެއެވެ.
ފަހި ދިރިއުޅުން ކޯޕަރޭޝަންގެ އާ ލޯގޯ--
އެފްޑީސީގެ އާ ލޯގޯ ހެދުމަށް ހޭދަވި ހަރަދު ހޯދުމަށް ހުށަހެޅި އާރްޓީއައިއަށް ޖަވާބު ދެމުން އެ ކުންފުނިން ބުނީ ލޯގޯ އަދި ބްރޭންޑިންގެ ހުރިހާ މަސައްކަތެއް ކުރީ އެ ކުންފުނީގެ މާކެޓިން ޓީމުން ކަމަށެވެ. އެހެންވެ އެ މަސައްކަތަށް އިތުރު ހަރަދެއް ކުރަން ނުޖެހޭ ކަމަށް ބުންޏެވެ.
މީގެ އިތުރުން އާ ލޯގޯއާއެކު އިފްތިތާހު ކުރި އެފްޑީސީގެ ރަސްމީ ވެބްސައިޓުވެސް ހަދައިފައިވަނީ އެ ކޯޕަރޭޝަންގެ މުވައްޒަފުން ކަމަށްވާތީ އެކަމަށް ވެސް އިތުރު ހަރަދެއް ނުދާ ކަމަށް އެ ކޯޕަރޭޝަނުން ބުންޏެވެ.
އެފްޑީސީން ބުނީ މިހާރު އެ ކޯޕަރޭޝަނުން ކުރާ މަސައްކަތަކީ އާ ލޯގޯ ތަންފީޒު ކުރުމުގެ މަސައްކަތް ކަމަށެވެ. އެގޮތުން އާ ލޯގޯއާ އެކު، އެފްޑީސީ ޓީ. ޝާޓް، ލެންޔާޑް، މުވައްޒަފުންގެ ކާޑު އަދި ބިޒްނަސް ކާޑުގެ އިތުރުން އޮފީސް ނަންބޯޑު ބަދަލުވާނެ ކަމަށް އެ ކޯޕަރޭޝަނުން ބުނެފައިވެެއެވެ.
އެއީ ބޮޑު ހޭދައެއް ދާނެ ކަމެކެވެ. ނަމަވެސް އެކަމަށް ކުރަން ޖެހޭ ހޭދައިގެ ތަފުސީލެއް އަދި ހާމައެއް ނުކުރެއެވެ.
ފަހި ދިރިއުޅުން ކޯޕަރޭޝަން ލިމިޓެޑް އުފެއްދީ 2019 ވަނަ އަހަރުގައެވެ. ސަތޭކަ އިންސައްތަ ސަރުކާރު ހިއްސާވާ މި ކުންފުނީގެ މައިގަނޑު މަޤުސަދަކީ، އަތްފޯރާ ފަށުގައި ބޯހިޔާވަހިކަން ފޯރުކޮށްދިނުމުގެ ގޮތުން މުޅި ރާއްޖެއަށް އަމާޒުކޮށްގެން ހިންގާ، ބޯހިޔާވަހިކަމުގެ މަޝްރޫޢުތައް އެއް ފުރާޅެއްގެ ދަށުން ކުރިއަށް ގެންދިއުމެވެ.