ސަންޢާ (4 މެއި 2024) : މެޑިޓަރޭނިއަން ކަނޑު ހުރަސްކޮށް ވެސް އިސްރާއީލުގެ އާގު ބޯޓުތަކަށް ދަތުރު ނުކުރެވޭނެ ގޮތްހަދާނެކަމުގެ އިންޒާރު ޔަމަންގައި ވެރިކަންކުރާ ހޫޘީ ޖަމާއަތުން އިސްރާއީލަށް ދީފިއެވެ.
ހޫޘީންގެ ތަރުޖަމާނު ކާނަލް ޔަހުޔާ ސަރީޢު ވިދާޅުވީ ޣައްޒާގެ އާންމުންނާ ދެކޮޅަށް ހިންގާ ގަތުލުއާންމުތައް އިސްރާއީލުން ހުއްޓާނުލާނަމަ މި ފެށޭ ހަފްތާއިން ފެށިގެން މެޑިޓަރޭނިއަން ކަނޑު ހުރަސްކޮށް ވެސް އިސްރާއީލުގެ އާގު ބޯޓުތަކަށް ހަމަލާދޭން އެ ޖަމާއަތުން ފަށާނެއެވެ.
ޔަހުޔާ ވިދާޅުވި ގޮތުގައި މެޑިޓަރޭނިއަން ކަނޑު ހުރަސްކޮށް ވެސް އިސްރާއީލުގެ އާގު ބޯޓުތަކަށް ދަތުރު ނުކުރެވޭނެގޮތް ހަދާނެކަމަށާއި އެކަމަށް ވާންޖެހޭ ތައްޔާރީތައް ޔަމަނުގެ އަސްކަރިއްޔާއިން މިހާރުދަނީ ވަމުންނެވެ.
ޔަހުޔާ ސަރީޢު ވިދާޅުވި ގޮތުގައި މެޑިޓަރޭނިއަން ކަނޑުން ދަތުރުކުރާ އިސްރާއީލުގެ އާގު ބޯޓުތަކާއި އިސްރާއީލުގެ މަސްލަހަތާ ގުޅިފައިވަ އާގު ބޯޓުތައް ދެނެގަތުމުގެ ޖާސޫސީ ހަރަކާތްތައް ޔަމަނުން ކުރިޔަށްގެންދެއެވެ. މި ކަމަށް ބޭނުންވާ ޖާސޫސީ މައުލޫމާތު ހޯދުމުގައި އެހެން ފަރާތެއްގެ އެހީތެރިކަން ހޯދަންޖެހޭނަމަ އެ ކަން ކުރާނެކަން ވެސް އޭނާ ފާހަގަކުރެެއްވިއެވެ.
ހޫޘީންގެ ޑްރޯނެއް
މިއީ އީރާނަށް އިޝާރާތްކޮށް ބުނި ބަހެއްކަމަށް ބެލެވުނު ކަމަށްވިޔަސް ހޫޘީންގެ ތަރުޖަމާނު ޔަހުޔާ ސަރީޢުގެ ވާހަކާގައި އީރާނުގެ ނަން ވިދާޅުވެފައެއް ނުވެއެވެ. ހޫޘީންނަށް އެހީތެރިވާކަމަށް ތުހުމަތު ކުރެވޭ އީރާނަކީ އެ ގައުމުން ފަޒާއަށް ފޮނުވާފައިވާ އަސްކަރީ ޖާސޫސީ ދެ ސެޓަލައިޓެއްގެ އެހީގައި ފަޒާގެ މަގުން ޖާސޫސު ކުރުމުގެ ގާބިލުކަން ލިބިފައިވާ މަދު ގައުމުތަކުގެ ތެރޭގައި ހިމެނޭ ގައުމެކެވެ.
ހޫޘީންނަށް އަސްކަރީ އެހީތެރިކަމާއި ހަތިޔާރު ފޯރުކޮށްދޭކަމަށް އެމެރިކާއާއި އިސްރާއީލުން ތުހުމަތު ކުރާ ހަމައެކަނި ގައުމަކީ އީރާނެވެ. ޔަހުޔާ ސަރީޢު ވިދާޅުވިގޮތުގައި މެޑިޓަރޭނިއަން ކަނޑުން ދަތުރުކުރާ އިސްރާއީލުގެ ހަމަލާދެވޭވަރުގެ ޑްރޯންއާއި ބަލިސްޓިކް މިސައިލް ހޫޘީންގެ އަތުގައި އެބަހުއްޓެވެ.
ޔަހޫދީ އިސްރާއީލުގެ ޖަރީމާތަކުގެ ދިފާއުގައި އެމެރިކާއިން ޔަމަނަށް ހަމާލާދޭނަމަ މެޑިޓަރޭނިއަން ކަނޑުން ދަތުރުކުރާ އެމެރިކާގެ ކުންފުނިތަކުގެ އާގު ބޯޓުތަކަށް ވެސް ހަމަލާދޭނެކަމަށް ޔަހުޔާ ސަރީއު ވިދާޅުވިއެވެ.
ހޫޘީންގެ އަތުގައި ސްޓްރެޓީޖިކް މިސައިލް ނުވަތަ ދުރުރާސްތާގެ މިސައިލްގެ ބޮޑު ސްޓޮކެއް ހުރިކަމުގެ ޚަބަރުތަކެއް ދާދިފަހުންވަނީ ފެންމަތިވެފައެވެ. މިކަމާ ބެހޭގޮތުން ހޫޘީން ވެސް އަދި އީރާން ވެސް އެއްޗެއް ބުނެފައެއް ނުވެއެވެ.
ޣައްޒާގެ އާންމުންނާ ދެކޮޅަށް އިސްރާއީލު ހިންގާ ގަތުލުއާންމުތަކާ ދެކޮޅު ހެދުމުގެ ގޮތުން ހޫޘީން ގެންދަނީ އަރަބި ކަނޑުގައާއި ރަތްކަނޑުގައި އަދި ބާބުލްމަންދަބު ކަނޑުއޮޅި ހުރަސްކުރާ އިސްރާއީލުގެ އާގު ބޯޓުތަކަށް މިސައިލާއި ޑްރޯނުން ހުއްޓުމެއްނެތި ހަމަލާތައް ދެމުންނެވެ.
މިކަމާދެކޮޅަށް އިސްރާއީލުގެ ދިފާއުގައި އެމެރިކާއާއި އިނގިރޭސިވިލާތުން ހޫޘީންގެ އަމާޒުތަކަށް ވެސް ހުއްޓުމެއްނެތި ތަކުރާރުކޮށް ހަމަލާތައް ދޭން ފެށިއެވެ. ނަމަ ވެސް އޭގެ ނަތީޖާ ނުކުތީ އެމެރިކާ އާއި އިނގިރޭސިވިލާތް ހީކުރިގޮތަކަށް ނޫނެވެ.
ރަތްކަނޑާ އަދި އަރަބި ކަނޑުން ބާބުލްމަންދަބު ހުރަސްކޮށް ދަތުރުކުރާ އެމެރިކާއާއި އިނގިރޭސިވިލާތުގެ އާގު ބޯޓުތަކަށް ހޫޘީން ހަމަލާތައް އަމާޒުކުރަން ފެށީއެވެ. އެމެރިކާގެ ހަމަލާތަކަށް ނުފޯރާ ހިސާބެއްގައި (ބިމުއަޑީގެ ބިންގަރާސްތަކުގައި) ހޫޘީންގެ ޑްރޯންތަކާއި މިސައިލްތައް ހުރިކަން މިކަމުން ހާމަވެއެވެ.
ހޫޘީން މިހާތަނަށްވަނީ އިސްރާއީލާއި އެމެރިކާ އަދި އިނގިރޭސިވިލާތުގެ އާގުބޯޓުތައް ހިމެނޭގޮތަށް 98 އާގު ބޯޓަކަށް ހަމަލާ ދީފައެވެ. އިއްޔެ ވެސް ހޫޘީންގެ ހަމަލާއެއް ބޯޓަކަށް އަރާފައިވެއެވެ.
ޙޫޘީންގެ ހަމަލާތަކުގެ ގެއްލުން އެތިން ގައުމަށް ވަރަށް ބޮޑެވެ. އެއީ އިންޝުއަރެންސް ޚަރަދު އިންތިހާއަށް ބޮޑުވުމުގެއިތުރުން ހޫޘީންގެ ހަމަލާތަކަށް ބިރުން އެސަރަހައްދުން ދަތުރުކުރަން އިސްރާއީލާއި އެމެރިކާ އަދި އިނގިރޭސިވިލާތުގެ އާގު ބޯޓުތަކަށް ނުކުރޭތީއެވެ.
ހޫޘީންގެ މިސައިލްތަކެއް
ހޫޘީންގެ ހަމަލާތަކުގައި އިނގިރޭސިވިލާތުގެ އާގުބޯޓެއްވަނީ އޭގައި ހުރި މުދަލާއެކު ރަތްކަނޑަށް ފައްތާ ވެސް ލާފައެވެ. ހޫޘީންގެ ހަމަލާތަކެއްގައި އެމެރިކާ ސިފައިންގެ ތިން މީހަކު މީގެ ފަސް މަސްކުރިން އަރަބި ކަނޑަށް ގެއްލިފައި ވެސް ވެއެވެ.
މުރާސިލުން ބުނާގޮތުގައި ހޫޘީންގެ މިއިންޒާރާއެކު މެޑިޓަރޭނިއަން ކަނޑުން ދަތުރުކުރާ އިސްރާއީލުގެ އާގުބޯޓުތަކުގެ އިންޝުއަރެންސް އިންތިހާއަށް މައްޗަށްދާނެއެވެ. އަދި ހޫޘީން އެންމެ ހަމަލާއަކުން ވެސް އެޖަމާއަތުގެ މަގްސަދު ހާސިލްވާނެއެވެ. އެހަމަލާއަކުން މާބޮޑު ގެއްލުމެއް ނުލިބުނަސް އިސްރާއީލުގެ އާގު ބޯޓުތަކުގެ މުދަލާއި ފަޅުވެރިންގެ އިންޝުއަރެންސް އާދަޔާ ޚިލާފަށް އިންޝުއަރެންސް މައްޗަށް ދާނެއެވެ. ހޫޘީންގެ މައިގަނޑު މަގްސަދަކީ މިއެވެ. ނަތީޖާއަކީ އިސްރާއީލުގެ އެފަދަ ކުންފުނިތައް ބަނގުރޫޓުވާ ހިސާބަށް ކަންތައްތައް ދިޔުމެވެ.
ހޫޘީންގެހަމަތާކުން ސަލާމަތް ވުމަށްޓަކައި އިސްރާއީލާއި އެމެރިކާ އަދި އިނގިރޭސިވިލާތުގެ އާގު ބޯޓުތައް މިހާރު ދާންޖެހެނީ ބާބުލްމަންދަބު ހުރަސްކޮށް ރަތްކަނޑުން ދިޔުމުގެ ބަދަލުގައި މުޅި އެފްރިކާގެ ބައްރު ވަށާލާފައެވެ. މިއީ އެންމެ ހަތަރު ދުވަހުން ކުރެވޭ ދަތުރެއް 23 ދުވަހަށް ދިގުލައިގެން ދިޔުމެވެ. ނަތީޖާއަކީ ޚަރަދުތައް އިންތިހާއަށް މައްޗަށް ދިޔުމެވެ.
އެމެރިކާއާއި އިނގިރޭސިވިލާތްވަނީ ހޫޘީންގެ އަމާޒުތަކަށް ތަކުރާރުކޮށް ބޮންއަޅައިގެން ވެސް ހޫޘީންގެ ހަމަލާތައް ހުއްޓުވޭގޮތެއް ނުވިއެވެ.. އެމެރިކާއަކީ އެއްގަމުން ޔަމަނަށް އަރައިގަނެ އެއްގަމުން ހަނގުރާމަކޮށްގެން ހޫޘީ ޖަމާއަތް ބަލިކުރެވޭވަރުގެ ބާރުގަދަ ގައުމެއް ނޫނެވެ.
އެމެރިކާގެ ހުރިހާ ވެސް އަސްކަރީ ބާރަކީ ފައިޓާޖެޓްތަކުން ތަންތަނަށް ބޮންއެޅުމުގެ ބާރެވެ. ބޮންއަޅައިގެން ކަމެއް ނުވެއްޖެނަމަ އެހިސާބުން އެމެރިކާ އަސްކަރީ ގޮތުން ބަލިވީއެވެ.
އަފްޣާނިސްތާނުގައި ތާލިބާނުންގެ މައްޗަށް އެމެރިކާއަށް ކާމިޔާބު ނުހޯދުނީ ވެސް މިހެންވެގެންނެވެ. ތާލިބާނުން ބަލި ނުކުރެވި 20 އަހަރަށްފަހު އެގައުމުން ފައިބަން އެމެރިކާއަށް ޖެހުނީ ވައިގެ މަގުން ބޮންއަޅައިގެން ތާލިބާނުން ބަލި ނުކުރުމުންނެވެ. އެއީ ތާލިބާނުންނަކީ ފަރުބަދަތަކުގެ އަޑީގައި އަސްކަރީ މަރުކަޒުތައް ހަދައިގެން އުޅޭ ބަޔަކަށްވާތީއެވެ.
ރިޕޯޓްތައް ބުނާގޮތުން ހޫޘީންގެ ޑްރޯންތަކާއި މިސައިލްތައް އަދި އަސްކަރީ އިންފްރާސްޓްރަކްޗަރ ހުރީ ބިމު އަޑީގެ ބިންގަރާސްތަކުގައެވެ. ހޫޘީންނަށް އަމާޒުކޮށް އެމެރިކާ ދޭ ހަމަލާތަކުން ހޫޘީންގެ އަސްކަރީ ބާރު ކުޑަނުކުރެވެނީ އަދި ހޫޘީން ބަލިނުކުރެވެނީ މިހެންވެއެވެ.