ނިމިދިޔަ މަޖިލިސް އިންތިޚާބުގައި ފުނަދޫ ދާއިރާގެ ގޮނޑި ކާމިޔާބުކުރެއްވި އިންތިޚާބީ މެންބަރު މުހައްމަދު މަމްދޫހު (މަންޑޭ)އަށް ސިހުރު ހަދަން އުޅުނުކަމުގެ ތުހުމަތުގައި ހައްޔަރުކުރި މީހާގެ ބަންދަށް މިއަދު 15 ދުވަސް ޖަހައިފިއެވެ.
ށ. ފުނަދޫގައި ސިހުރު ހަދާކަމުގެ ތުހުމަތުގައި އުމުރުން 60 އަހަރުގެ މީހަކު ހައްޔަރު ކުރީ ރޭގެ ވަގުތެއްގައެވެ. އޭނާގެ ބަންދާމެދު ގޮތެއް ނިންމުމަށް ހާޒިރުކުރީ ފުނަދޫ މެޖިސްޓްރޭޓް ކޯޓަށެވެ.
ފުނަދޫން "ސަން"އާ ވާހަކަ ދެއްކި މީހަކު ބުނީ، އޭނާ ސިހުރު ހަދާފައިވަނީ ރަށުގެ އެކި ހިސާބުތަކުގައި ހުރި ބިޔަ ގަސްތަކަށް ކަމަށެވެ.
"ދެން ރޭ ހައްޔަރުކުރި ހިސާބުން ރަށުގެ ރައްޔިތުން އޭނާ ދެކެ ވަރަށް ހިތްހަމަނުޖެހިގެން މަގުމައްޗަށް ނުކުމެފައިވަނީ،" އޭނާ ބުންޏެވެ.
އޭނާ ބުނީ މުއްދަތު ޖަހަން ސިހުރު ހެދި ކަމަށް ތުހުމަތު ކުރެވޭ މީހާ ފުނަދޫ މެޖިސްޓްރޭޓް ކޯޓަށް ގެންދިއުމުން ކޯޓު ދޮށުގައި ވެސް ރައްޔިތުން ނުރުހުން ފާޅުކުރި ކަމަށެވެ. އަދި، އެ ރަށުގެ ގިނަ ބަޔަކު މަގުމައްޗަށް ނުކުމެ މިހާރު ވެސް ދަނީ އަޑުއުފުލަމުންނެވެ. ފުނަދޫ މީހުން ބުނަނީ އެ މީހާއަށް ހައްގު އަދަބު ދޭން ޖެހޭކަމަށެވެ.
އޭނާ ސިހުރު ހަދަން ބޭނުންކުރި ބައެއް ސާމާނު ކަމަށް ތުހުމަތުކުރެވޭ ތަކެތީގެ ފޮޓޯ ވެސް މިހާރު ސޯޝަލް މީޑިއާގައި ވަނީ އާންމުވެފައެވެ.
ފުނަދޫ ގޮނޑި މަމްދޫހު ކާމިޔާބުކުރެއްވީ އޭނާއާ އެންމެ ގާތުން ވާދަކުރެއްވި އެމްޑީޕީގެ ކެންޑިޑޭޓް އަދި ކުރީގެ މެންބަރު އިލްހާމް އަހުމަދަށް ވުރު 1،100 ވޯޓުގެ ތަފާތުންނެވެ. މަމްދޫހު ވަނީ 1486 ވޯޓު ހޯއްދަވައިފައެވެ.