ރާއްޖޭގެ ދެކުނުގެ އަތޮޅެއްގެ ރަށަކުން 12 އަހަރުގެ ކުޑަ ކުއްޖަކާ ބެހުނު ކަމުގެ ތުހުމަތުގައި 61 އަހަރުގެ ދިވެހި ފިރިހެނަކު ހައްޔަރުކޮށްފައިވާ ކަމަށް ފުލުހުން މިއަދު ބުނެފިއެވެ.
އެ މައްސަލަ ފުލުހަށް ހުށަހަޅާފައިވަނީ މިދިޔަ އާދިއްތަ ދުވަހު ކަމަށް އެ ޚިދުމަތުން ބުނެއެވެ.
ފުލުހުން ބުނީ މި މައްސަލައިގައި ފިރިހެން މީހާ ހައްޔަރު ކުރީ ކޯޓު އަމުރެއްގެ ދަށުން އިއްޔެ ކަމަށެވެ. އޭނާގެ ބަންދާ މެދު ގޮތެއް ނިންމުމަށް ކޯޓަށް ހާޒިރު ކުރުމުން ތަހުގީގީ މަރުހަލާ ނިމެންދެން ބަންދު ކުރުމަށް ކޯޓުން އަމުރުކޮށްފައިވާ ކަމަށް ފުލުހުން ބުނެއެވެ.
މި މައްސަލައާ ގުޅުން ހުރި އިތުރު މައުލޫމާތެއް ހާމަކޮށްފައިނުވާއިރު، ފުލުހުން އަންނަނީ މި މައްސަލަ ތަހުގީގު ކުރަމުންނެވެ.
ކުޑަކުދިންނަށް ޖިންސީ ގޯނާކޮށްގެން ފުލުހަށް ހުށަހަޅާ މައްސަލަތަކަކީ ރާއްޖޭގައި އެންމެ ގިނަވެފައިވާ އެއް މައްސަލައެވެ. އެގޮތުން، ކޮންމެ މަހަކުވެސް އެތައް މައްސަލައެއް ފުލުހަށް ހުށަހަަޅައެވެ.