ދިވެހިރާއްޖޭގެ ހުރިހާ ކޯޓުތަކެއްގެ އިތުރުން ކަމާގުޅޭ އިދާރާތައް އެއް ވިއުގައަކުން ގުޅާލައިދޭ އިންޓަގްރޭޓެޑް ކޯޓް މެނޭޖުމަންޓު ސިސްޓަމް (އައިސީއެމްއެސް) މިއަދު އިފްތިތާހުކޮށްފިއެވެ.
މި ސިސްޓަމް އިފްތިތާހުކޮށްދެއްވީ އުއްތަމަ ފަނޑިޔާރު މުޢުތަސިމް އަދުނާނެވެ.
މި ސިސްޓަމްގައި އާންމުންނަށް ލިބޭ އެކްސެސްގެ ތެރެއިން އެ މީހެއްގެ މައްސަލައިގެ ސްޓޭޓަސް ބެލެން ހުންނާނެއެވެ.
ޑިޕާޓްމަންޓު އޮފް ޖުޑީޝަލް އެޑްމިނިސްޓްރޭޝަން (ޑީޖޭއޭ) އިން މައުލޫމާތު ދިން ގޮތުގައި މި ސިސްޓަމް މެދުވެރިކޮށް، ދައުވާ ފޯމު ހުށަހެޅުމުން ފެށިގެން، ކޭސް ރަޖިސްޓްރޭޝަން، ކޭސްއަށް ފަނޑިޔާރުން ހަމަޖެއްސުން، ކޭސް ޝެޑިއުލިން އަދި ކޯޓު އަމުރު ތައްޔާރުކޮށް ހުކުމް ކުރުން ވެސް ކުރިޔަށް ގެންދެވޭނެެއެވެ.
ޑީޖޭއޭއިން ބުނީ މި ސިސްޓަމްގެ ސަބަބުން މައްސަލަތަކުގެ ބެކްލޮގް ވަރަށް ބޮޑަށް ދަށްވެ، ކޯޓުތަކުގެ ހިންގުން ހަރުދަނާވުމުގެ އިތުރުން އަވަހަށް އަދުލު އިންސާފު ލިބުމަށް މަގުފަހިވެގެންދާނެ ކަމަށެވެ.
"އަޅުގަނޑު އުފަލާއެކު ފާހަގަ ކުރަން ބޭނުންވާ ކަމަކީ މިއަދު އަޅުގަނޑުމެން މި ލޯންޗްކުރާ އައިސީއެމްއެސް ނުވަތަ އިންޓަގްރޭޓެޑް ކޭސް މެނޭޖްމެންޓް ސިސްޓަމަކީ ޝަރުއީ ދާއިރާގައި އަދި ބްރޯޑާ ލީގަލް އެންޑް ޖަސްޓިސް ސެކްޓާގައި ހިމެނޭ ހުރިހާ ސްޓޭކްހޯލްޑަރުންނާ އެއް ވިޔުގައަކުން ގުޅާލެވި، ސްޓްރީމްލައިން ކުރުމަށްޓަކާ އެޅޭ މުހިންމު މުހިންމު ފާލަމެއް ކަމުގައި.." ޑީޖޭއޭގެ ޗީފް އެޑްމިނިސްޓްރޭޓަރު ރިޒްނާ ވިދާޅުވިއެވެ.
އައިސީއެމްއެސް ފަރުމާކޮށްފައިވަނީ ރާއްޖޭގައި ހުންނަ އިނގިރޭސިވިލާތުގެ ހައި ކޮމިޝަނާއި ޔޫއެންޑީޕީގެ އެހީތެރިކަމާ ވެސް އެކުގައެވެ.
މި މިސްޓަމް އިފްތިތާހުކުރުމުގެ ރަސްމިއްޔާތުގައި އުއްތަމަ ފަނޑިޔާރުގެ އިތުރުން، ޖުޑީޝަލް ސާވިސް ކޮމިޝަން (ޖޭއެސްސީ)ގެ ރައީސް ޙިސާން ޙުސައިނާއި، ޑީޖޭއޭގެ ޗީފް އެޑްމިނިސްޓްރޭޓަރު އައިޝަތު ރިޒްނާ ވެސް ބައިވެރިވެ ވަޑައިގަތެވެ.