މާދަމާއިން ފެށިގެން ޑިސެމްބަރު މަހުގެ ނިޔަލަށް ހައިކޯޓުން ރިސެސްއަށް ދިއުމަށް ނިންމައިފިއެވެ.
ހައިކޯޓުން މިއަދު ނެރުނު އިއުލާނެއްގައި ވަނީ، މިކަން ހާމަކޮށްފައެވެ. އަދި ރިސެސްގެ މުއްދަތުގައި ކުރަން ފަނޑިޔާރުންގެ އާންމު މަޖިލީހުން ނިންމާފައިވާ ކަންކަން ވެސް ވަނީ އިއުލާނުކޮށްފައެވެ. އެގޮތުން ކުރިއަށް އޮތް އެއް މަސްދުވަހު އެ ކޯޓުން ކުރާނެ މަސައްކަތްތަކުގެ ތެރޭގައި:
- ހުކުމް ކުރުމަށް ބާއްވާ ޝަރީއަތުގެ މަޖިލިސްތައް ބޭއްވުން
- B12 ސެކްޝަނުން ބަލާ އަމުރުތަކާއި މޮނިކޮން އަމުރުތަކާއި އަވަސް ތަބީއަތުގެ އަމުރުތަކާއި ހުކުމް ތަންފީޒުކުރުން އަވަސް ކުރުމުގެ އަމުރުތަކާއި އިޖުރާއީ އިއުތިރާޟާ ގުޅޭ ނިންމުންތަކުގެ ތެރެއިން މުއްދަތު ހަމަވާ މައްސަލަތައް
ހައިކޯޓުން އަންނަ މަހު ރިސެސްއަށް ދާކަން އިއުލާނުކޮށްފައި ވާއިރު، ސުޕްރީމް ކޯޓާއި ކްރިމިނަލް ކޯޓުން އަދި ރިސެސްއަށް ދާކަން ނުވަތަ ނޫންކަން ހާމަކޮށްފައެއް ނުވެއެވެ. އާންމުކޮށް ދަށު ކޯޓުތަކުން ޑިސެމްބަރު މަހު ރިސެސްއަށް ދެއެވެ.
ރިސެސްގެ މުއްދަތުގައި އާންމު އަޑުއެހުމެއް ކޯޓުގައި ކުރިއަށް ނުދާނެއެވެ. ނަމަވެސް ވަކި ކަމެއް ވަކި މުއްދަތެއްގެ ތެރޭގައި ނިންމަންޖެހޭކަމަށް ބަޔާންކޮށްފައިވާ ހާލަތެއް އައިސްފިނަމަ އެ މަސައްކަތެއް ކުރަން ޖެހޭނެއެވެ.
ކޯޓުތަކުގެ ގާނޫނުގައިވާ ގޮތުން, ކޯޓުތައް ރިސެސްއަށް ދިޔަ ނަމަވެސް އިދާރީ މަސައްކަތްތަކާއި މައްސަލަ ބަލައިގަތުން މެދުކެނޑުމެއްނެތި ކުރިއަށްގެންދާނެއެވެ.