ރިއަލް އެސްޓޭޓް ޓޫރިޒަމް ތަރައްގީކުރާ ހަންކެޑެ މަޝްރޫއުގެ ބިންގާ އަޅައި، އަމަލީ މަސައްކަތް މިރޭ ފަށައިފިއެވެ.
މި މަޝްރޫއުގެ ބިންގާ އަޅުއްވައި ދެއްވީ، ހޯމް މިނިސްޓަރު އަލީ އިހުސާނާއި ފަންޑު މެނޭޖްމަންޓް ކޯޕްރޭޝަންގެ މެނޭޖިން ޑިރެކްޓަރު އަހުމަދު ނާޒިމް އަބޫބަކުރުގެ އިތުރުން ޗައިނާގެ ނެޝަނަލް އިލެކްޓްރިކަލް އިންޖިނިއަރިން ކޮމްޕެނީ (ސީއެންއީއީސީ) ގެ މަންދޫބެކެވެ. މި މަޝްރޫއު ކުރިއަށް ގެންދަނީ ސީއެންއީއީސީންނެވެ.
މި ރަސްމިއްޔާތުގައި ވާހަކަފުޅުދައްކަވަމުން މިނިސްޓަރު އިހުސާނު ވިދާޅުވީ، މި މަޝްރޫއުގެ ވާހަކަ 2008ވަނަ އަހަރުން ފެށިގެން އަޑު އެހި ކަމަށެވެ. އަދި މި ޕްރޮޖެކްޓުގެ އަމަލީ މަސައްކަތް ދެ ހަފުތާ ތެރޭ ފެށޭނެކަމަށް މިނިސްޓަރު ވިދާޅުވިއެވެ.
"20082 އެނދު އެއީ މި ޕްރޮޖެކްޓުގެ ވައުދަކީ. 20082 އެނދާއެކު އުފެދިގެން މި އަންނަނީ 1986 ސީދާ ވަޒީފާ،" އިހުސާނު ވިދާޅުވިއެވެ.
އޭނާ ވިދާޅުވީ، މި މަޝްރޫއުގައި ރައީސް ޑރ. މުހައްމަދު މުއިއްޒު ގެންގުޅުއްވަނީ ތަފާތު ތަސައްވުރެއް ކަމަށެ. އެގޮތުން މި މަޝްރޫއު ނިމޭއިރު، ސަރަހައްދީ ތަރައްގީ އައްޑޫއަށް އައިސް ނިމޭނެ ކަމަށް މިނިސްޓަރު ވިދާޅުވިއެވެ. އަދި މި މަޝްރޫއާ އެކު އައްޑޫގެ ހޯލްސޭލް ރީޓެއިލް ދާއިރާއާއި ފުޑް އެންޑް ބެވަރެޖް އިންޑަސްޓްރީ ވެސް ކުރިއަރާނެ ކަމަށް މިނިސްޓަރު ވިދާޅުވިއެވެ.
ހަންކެޑެ ތަރައްގީކުރަން މިދިޔަ ސަރުކާރުން ޗައިނާގެ ސީއެންއީއީސީއާ ހަވާލު ކުރީ މިދިޔަ އަހަރު މާޗްމަހުގެ 30ވަނަ ދުވަހުއެވެ.
ހަންކެޑެ ހުރިހާ ގޮތަކުން ވެސް ތަފާތު މަންޒިލަކަށް ވާނެ ކަމަށް ބުނެ މި މަޝްރޫޢު އިއުލާނުކޮށް، މި މަޝްރޫއުގެ ޑިޒައިންގެ ފޮޓޯ ހިއްސާކުރަމުން، މީގެ ކުރިން އެމްއެފްއެމްސީން ބުނީ މި މަޝްރޫއުގެ ދަށުން، ހަންކެޑޭގައި 1،041 ކޮޓަރި ހެދުމަށް ހަމަޖެހިފައިވާ ކަމަށެވެ.
ހަންކެޑެގެ އިތުރުން ކ. ގާފަރުފަޅުގައި ވެސް ރިއަލް އެސްޓޭޓް ޓޫރިޒަމް ތަރައްގީކުރަން މިދިޔަ ސަރުކާރުން ކަނޑައެޅިއެވެ. އެގޮތަށް ކަނޑައަޅާފައި ވަނީ ކުރީގެ ރައީސް އިބްރާހިމް މުޙައްމަދު ޞާލިޙު ސޮއިކުރައްވާ 2021 ވަނަ އަހަރުގެ ޑިސެމްބަރު މަހުގެ ދެ ވަނަ ދުވަހު ނެރުއްވި ގަރާރެއްގައެވެ.