ކުރިއަށް އޮތް ރައްޔިތުންގެ މަޖިލިސް އިންތިޚާބުގައި މީހުން ދިރިއުޅޭ ރަށްތަކުގެ އިތުރުން ވޯޓު ފޮށި ބަހައްޓާނީ ހަތް ރިސޯޓަކާއި ރާއްޖެއިން ބޭރުގެ ތިން ގައުމެއްގައި ކަމަށް އިލެކްޝަންސް ކޮމިޝަން (އީސީ)އިން ބުނެފިއެވެ.
މިކަމާ ގުޅިގެން 'ސަން'އަށް މައުލޫމާތު ދެއްވަމުން އީސީގެ ސެކްރެޓަރީ ޖެނެރަލް ހަސަން ޒަކަރިއްޔާ ވިދާޅުވީ ރީ-ރަޖިސްޓާ ކުރުމަށް އޮތް ފުރުސަތު ހަމަވިއިރު ވޯޓު ފޮށި ބަހައްޓާވަރަށް މީހުން ރަޖިސްޓްރީވެފައި ވަނީ އިންޑިއާ، ލަންކާ އަަދި މެލޭޝިއާގައި ކަމަށެވެ.
"ރީ-ރަޖިސްޓާ ކުރުމަށް އޮތް ފުރުސަތު ހަމަވިއިރު ވޯޓު ފޮށި ބަހައްޓާ ވަރަށް މީހުން ރަޖިސްޓްރީވެފައި ވަނީ ތިން ގައުމެއްގައި. އެއީ އިންޑިއާގެ ޓްރިވެންޑްރަމް، ލަންކާގެ ކޮލަންބޯ އަދި މެލޭޝިއާގެ ކުއަލާލަންޕޫރްގައި،" އޭނާ ވިދާޅުވިއެވެ.
ޒަކަރިއްޔާ ވިދާޅުވީ މި ގައުމުތަކުގެ އިތުރުން އެއްވެސް ގައުމެއްގައި ވޯޓު ފޮށި ބަހައްޓާވަރަށް މީހުން ރަޖިސްޓްރީވެފައި ނުވާތީ އިތުރު ގައުމުތަކުގައި ވޯޓު ފޮށި ނުބަހައްޓާނެ ކަމަށެވެ.
މަޖިލިސް އިންތިޚާބު އަންނަ މަހުގެ 21ގައި ބޭއްވުމަށް ނިންމާފައިވާއިރު، ވޯޓުލާ މަރުކަޒު ބަދަލުކުރުމަށް ރީ-ރަޖިސްޓާ ކުރުމަށް ހުޅުވާލި ފުރުސަތު މިއަދު 15:00ގައި ވަނީ ހަމަވެފައެވެ.