ތްރީ ޑައިމެންޝަނަލް ނުވަތަ ތްރީޑީ ޕްރޮސެސަރު މެދުވެރިކޮށް ވަޔަލެސް ޓެކްނޮލޮޖީއަށް އިންގިލާބީ ބަދަލުތަކެއް ގެނެވިދާނެ ކަމަށް ސައިންސުވެރިން ބުނެފިއެވެ.
ގިނަމީހުން އެއްފަހަރާ އެއް ނެޓްވޯކެއް ބޭނުންކުރާއިރު، ވައިފައި ސްލޯ ވާކަން އެންމެންނަށްވެސް ފާހަގަކުރެވޭނެއެވެ. ބޮޑެތި ސިސްޓަމްތަކަށްވެސް މިމައްސަލަ މިގޮތަށް ދިމާވެއެވެ.
ސައިންސްވެރިން ލަފާކުރާ ގޮތުގައި އަލަށް ތަޢާރަފުކޮށްފައިވާ އޭއައި ޓެކްނޮލޮޖީއާއެކު ގިނަބަޔަކު އިންޓަނެޓް ބޭނުން ކުރަން ޖެހުމުން އިންޓަނެޓް ސްލޯވުމުގެ މައްސަލަ އިތުރަށް ކުރިމަގުގައި ގޯސްވާނެއެވެ.
އެ މައްސަލައާ ގުޅޭ ގޮތުން ޔުނިވާސިޓީ އޮފް ފްލޮރިޑާގެ ސައިންސްވެރިން ހެދި ދިރާސާއަކުން ދައްކާ ގޮތުގައި އެކަމަށް އޮތް ހައްލަކީ ޗިޕްތައް ތްރީޑީ ކުރުމެވެ.
އެ ދިރާސާގައި ބުނެފައިވާގޮތުގައި ގިނަ ވަޔަލެސް ކޮމިއުނިކޭޝަން ބަރޯސާވަނީ "ޕްލޭނަރ" ޕްރޮސެސަރުތަކުގެ މައްޗަށެވެ. އެއީ ޓޫ ޑައިމެންޝަނަލް އެއްޗަކަށް ވާތީ، ވަކި ވަގުތެއްގައި ބެލެހެއްޓޭނީ ވަރަށް މަދު ފްރިކުއެންސީތަކެކެވެ. އެކަމަކު ތްރީ ޑައިމެންޝަނަކަށް ޗިޕްތައް ހަދަން މަގުފަހިކޮށްދޭ މެނުފެކްޗަރިން ޕްރޮސެސްއެއް އަންލޮކް ކުރުމުން ހާޑްވެއާއަށް އެއްފަހަރާ ގިނަ ފްރިކުއެންސީތައް ހޭންޑްލް ކުރެވޭނެއެވެ. އެއީ އިންގިލާބަކަށް ވެދާނެ ކަމަށްވެސް ދިރާސާގައި ބުނެފައިވެއެވެ.
ޔުނިވާސިޓީ އޮފް ފްލޮރިޑާގެ އިލެކްޓްރިކަލް އެންޑް ކޮމްޕިއުޓާ އިންޖިނިއަރިންގެ އެސޯސިއޭޓް ޕްރޮފެސަރެއް ކަމަށްވާ ރޫޒްބެހް ޓަބްރިޒިއަން ވިދާޅުވި ގޮތުގައި މި މައްސަލަ އަކީ ސިޓީއެއްގައި ދަތުރުކުރާ ޓްރެފިކާ އަޅައިބެލޭނެ މައްސަލައެކެވެ.
އޭނާ ވިދާޅުވީ ސިޓީއަކަށް ނުތަކާވަރަށް އުޅަނދުތައް އިތުރުވާނަމަ އެކަން މައްސަލައަކަށްވެ އެކްސިޑެންޓްތައް ހިނގައި، އެކަތި އަނެއްކައްޗަށް މުޑިއަރައި އެއްކޮށް ޓްރެފިކް ތޮއްޖެހޭނެ ކަމަށެވެ.
ނޭޗާ އިލެކްޓްރޯނިކްސް ޖާނަލްގައި ޝާއިއުކޮށްފައިވާ މި ދިރާސާގައި ސެމިކޮންޑަކްޓާ ޓެކްނޮލޮޖީ ބޭނުންކޮށްގެން ތަފާތު ފްރިކުއެންސީތަކަށް ހަދާފައިވާ ގިނަ ޕްރޮސެސަރުތައް އެއް ޗިޕެއްގައި ބެހެއްޓުމަށް އާ ވިސްނުމެއް ބަޔާންކޮށްފައިވެއެވެ.
އެ ދިރާސާގައި ވާގޮތުން އެގޮތަށް ޗިޕްތައް އުފެއްދުމުން ޗިޕް ނަގާ ޖާގަ ކުޑަކުރާއިރު، ޕާފޯމަންސް އިތުރުކޮށްދެއެވެ. ޕްލޭނަރ ޗިޕްތައް ބޮޑުވާނީ އެ ޗިޕްތައް ފުޅާކޮށްދީގެން ނަމަވެސް ދެ ޑައިމެންޝަންގެ ބަދަލުގައި ތިން ޑައިމެންޝަނަކުން ކެޕޭސިޓީ އިތުރުކުރާ ޗިޕްތައް ހެދުމުގެ ޤާބިލުކަން ލިބުމުގެ މާނައަކީ ޓެކްނޮލޮޖީ ސްކޭލް ކުރަން ފަސޭހަވެގެން ދިއުން ކަމުގައި ދިރާސާގައި ބަޔާންކޮށްފައިވެއެވެ.