މޯލްޑިވްސް އެސޯސިއޭޝަން އޮފް އެޗްއާރު ޕްރޮފެޝަނަލްސް (މާޕް)އިން ރާއްޖޭގައި ބާއްވާ އެންމެ ބޮޑު އެޗްއާރު ކޮންވެންޝަން އަންނަ ހޮނިހިރު ދުވަހު ފަށަން ތައްޔާރުވެފައި ވާކަމަށް އެ ޖަމިއްޔާއިން ބުނެފިއެވެ.
މި ހަރަކާތް އޮންނާނީ މޯލްޑިވްސް ނޭޝަނަލް ޔުނިވާސިޓީގެ މައި އޮޑިޓޯރިއަމްގައި ހޮނިހިރު އަދި އާދިއްތަ ދުވަހުއެވެ. މާޕްއިން ބުނި ގޮތުގައި މި ކޮންވެންޝަންގައި 350 މީހުން ބައިވެރި ވާނެއެވެ.
މި އަހަރުގެ ކޮންވެންޝަންގައި 19 ވާހަކަދެއްކުންތެރިން ބައިވެރި ވާނެއެވެ. އޭގެ ތެރޭގައި ގައުމީ ފެންވަރު ނުވަ މީހުންނާއި ރާއްޖެއިން 10 މީހުން ބައިވެރިވާނެއެވެ.
މި ކޮންވެންޝަންގައި ބައިވެރިވާ ގައުމީ ފެންވަރުގެ ވާހަކަދެއްކުންތެރިންގެ ތެރޭގައި އިންޑިއާ، އޮސްޓްރޭލިއާ، ސްވިޑެން، ސްރީ ލަންކާ، ސައުތް އެފްރިކާ، ޔޫކޭ، ސިންގަޕޯ އަދި ޗައިނާގެ ވާހަކަދެއްކުންތެރިން ހިމެނެއެވެ.
ކޮންވެންޝަނުގައި އެކްސްޕާޓުން ހަ ކީނޯޓެއް ހުށަހަޅާނެއެވެ. އޭގެ އިތުރަށް، މި އެކްސްޕާޓުން ބައިވެރިންނަށް ޕްރެޒެންޓޭޝަނެއް ވެސް ހުށަހަޅައިދޭނެއެވެ. މި ކޮންވެންޝަންގައި ހަތް ކީނޯޓް ސްޕީކަރުން ބައިވެރިވާނެއެވެ.
މިއަހަރުގެ ކޮންވެންޝަންގެ މައިގަނޑު މައުޟޫތަކުގެ ތެރޭގައި، މަސައްކަތްތެރިންގެ ގާބިލްކަން އިތުރުކޮށް ހަރުދަނާކުރުން، މަސައްކަތް ދެމެހެއްޓެނިވި ގޮތެއްގައި ބައްޓަން ކުރުން އަދި މަސައްކަތުގެ މާހައުލުގައި އުފެދޭ ގުޅުންތަކާއި މައްސަލަތައް ހައްލު ކުރުން ހިމެނެއެވެ.
މިއަހަރުގެ ކޮންވެންޝަންގައި އެންމެ ތަފާތު ކަމަކަށް 'ފަޔާ ސައިޑް ޗެޓެއް' ކުރިއަށް ގެންދާނެއެވެ. ދެ މޮޑެރޭޓަރުން މި ޗެޓް ކުރިއަށް ގެންދާއިރު، މި ޗެޓުގައި ވެސް މަސައްކަތުގެ މާހައުލުގެ ކަންކަމަށް އަލި އަޅުވާލާނެއެވެ.
މި ކޮންވެންޝަންއާ ގުޅޭ ގޮތުން ވާހަކަ ދައްކަވަމުން މާޕްގެ ރައީސް އަހުމަދު އިބްރާހިމް ވިދާޅުވީ ކޮންވެންޝަންގެ ބައިވެރިންނަށް ރަނގަޅު ތަޖުރިބާއަކަށް މި ކޮންވެންޝަން ވާނެ ކަމަށް އުއްމީދު ކުރައްވާ ކަމަށެވެ. އަދި މި ކޮންވެންޝަން ކާމިޔާބުކަމާއެކު ނިންމާލުމަށް މަސައްކަތް ކުރާ ކަމަށް އޭނާ ވިދާޅުވިއެވެ.
މީގެ ކުރީ ތިން އަހަރު ވެސް މާޕްއިން ވަނީ އެޗްއާރު ކޮންވެންޝަން ބާއްވާފައެވެ. މިއީ މި ކޮންވެންޝަން ބާއްވާ ހަތަރުވަނަ އަހަރެވެ.