ފަރުމަހުގެ މަސްވެރިކަން ކުރާ މީހުންނަށް ހަތް ލައްކަ ރުފިޔާއާ ހަމައަށް ލޯނު ނެގޭ ގޮތް، ކުދި އަދި މެދު ފަންތީގެ ވިޔަފާރިއަށް އެހީފޯރުކޮށްދޭ އެސްޑީއެފްސީގެ 'ކަނޑުފަޅު ނަފާ' ލޯން ސްކީމުގެ ތެރެއިން ހަމަޖައްސައިފިއެވެ.
އެސްޑީއެފްސީން އެކްސްގައި ކުރި ޕޯސްޓެއްގައިވާ ގޮތުން އެ ލޯނުގެ އިންޓަރެސްޓް ރޭޓަކީ ފަސް ޕަސެންޓެވެ. ގްރޭސް ޕީރިއަޑް ނުވަތަ ލޯނު ދައްކަން ފެށުމުގެ ކުރިން ލިބޭ މުއްދަތަކީ ހަ މަސް ދުވަހެވެ.
އެ ލޯނު އަނބުރާ ދެއްކުމަށް 10 އަހަރުގެ މުއްދަތެއް ދޭނެ ކަމަށް ވެސް އެސްޑީއެފްސީން ބުނެފައިވެއެވެ.
އެ ލޯނު ފުރުސަތު އަމާޒުކޮށްފައިވަނީ ފަރުމަހުގެ މަސްވެރިކަން ކުރާ މީހުންނާއި، އާންމުކޮށް ވިއްކުމަށާއި ރިސޯޓްތަކަށް ސަޕްލައި ކުރުމަށް ފިނިކުރި ފަރުމަހާއި ފަރުމަހުގެ އުފެއްދުންތައް ޕެކްކޮށް ސަޕްލައިކުރާ މީހުންނާއި، އެކްސްޕޯޓުކުރުމަށް ފަރުމަސް ބަންދުކުރާ ނުވަތަ ފަރުމަހުގެ ޕުރޮޑަކްޓްސް އުފައްދާ ފަރާތްތަކުގެ އިތުރުން އަތޮޅުތެރޭގެ ރަށްރަށުން މާލޭ ސަރަހައްދުގެ ސަޕްލަޔަރުންނަށް ފަރުމަހާއި މަހުގެ އެކިއެކި އުފެންދުއްތައް އުފައްދާ ފޮނުވާ މީހުންނަށެވެ.
މި މަޝްރޫއުގެ ދަށުން ލޯނު ދޫކުރާ ކަންތައްތަކުގެ ތެރޭގައި:
- ފަރުމަހުގެ މަސްވެރިކަން ކުރާ އުޅަނދު މަރާމާތުކުރުމަށް އަދި އަލަށް އުޅަނދެއް ބަނުމަށް ނުވަތަ ގަތުމަށް
- ފަރުމަހުގެ މަސްވެރިކަން ކުރާ އުޅަނދުގައި އިންޖީނު އެޅުމަށް
- ފަރުމަހުގެ މަސްވެރިކަން ކުރާ އުޅަނދުގައި ހަރުކުރާ މަސްވެރިކަމުގައި ބޭނުންކުރާ ވަސީލަތްތައް ގަތުމަށް
- ފަރުމަހުގެ މަސްވެރިކަން ކުރާ އުޅަނދު މަރާމާތުކުރުމާއި އިތުރު ބަދަލުތައް ގެނައުމަށް
- މަސް ބަންދުކުރާ މެޝިނަރީއާއި އާލާތްތައް ގަތުމަށް
- މަސް ރައްކާކުރުމަށް ބޭނުންވާ ވަސީލަތްތަކާއި އާލާތްތައް ގަތުމަށް
ކަނޑުފަޅު ނަފާ ސްކީމްގެ ދަށުން އެސްޑީއެފްސީން ލޯނު ދޫކުރާ އެހެން މަސައްކަތްތަކުގެ ތެރޭގައި އައިސްޕްލާންޓް ގާއިމުކުރުމަށާއި އާރްއެސްޑަބްލިއު ސިސްޓަމް ގާއިމްކުރުމަށް ހިމެނެއެވެ.