އިންޑިއާގެ އެންމެ ވަރުގަދަ އެއް ފިލްމު ކުންފުނި ދަރުމާ ޕްރޮޑަކްޝަންސްއަށް ކާމިޔާބު ގިނަ ފިލްމުތަކެއް ޑައިރެކްޓްކޮށްދީފައިވާ ޝަޝާންކް ހައިތަންގެ ފިލްމަކަށް ވަރުން ދަވަންއާއި ޖާންވީ ސޮއިކޮށްފިއެވެ.
މި ފިލްމަކީ މިދިޔަ އަހަރު އެމޭޒަން ޕްރައިމްގައި ޕްރިމިއާކުރި ފިލްމު "ބަވާލް"އަށް ދެ ތަރިން އެކީގައި ފެންނާނެ ދެވަނަ ފިލްމެވެ.
ވަރުން އާއި ޖާންވީ އަކީ ވެސް ދަރުމާއިން ބޮލީވުޑަށް ނުކުތް ދެ ތަރިންނަށްވާއިރު ޖާންވީ ކަޕޫރު ފިލްމީ ދާއިރާއަށް ތައާރަފުވި ފިލްމު "ދަޅަކް"ގެ ޑައިރެކްޓަރަކީ ވެސް ޝަޝާންކްއެވެ. ޝަޝާންކްއާ އެކު ވަރުން މީގެ ކުރިން ވަނީ ދެ ފިލްމެއްގައި މަސައްކަތް ކޮށްފައެވެ. ދަރުމާ ކުންފުނިން އުފެއްދި އެ ދެ ފިލްމަކީ ވެސް ބޮކްސް އޮފީހުގައި ވަރަށް ބޮޑު ކާމިޔާބީއެއް ހޯދި ދެ ފިލްމެވެ.
ވަރުންއާއި ޖާންވީ އަލަށް ސޮއިކުރި ފިލްމު "ސަނީ ސަންސްކާރީ ކީ ތުލްސީ ކުމާރީ" ސިނަމާތަކަށް ގެންނަން ތާވަލުކޮށްފައި ވަނީ މި އަންނަ އަހަރުގެ އޭޕްރިލް މަހުގެ 18 ވަނަ ދުވަހުއެވެ.
ޖާންވީ ކަޕޫރާއި ވަރުން ދަވަން ފިލްމު "ބަވާލް"ގެ މަންޒަރެއްގައި-- ފޮޓޯ/ ބޮލީވުޑްހަންގާމާ
ވަރުން ސޮއިކޮށްފައިވާ ފިލްމު "ބޭބީ ޖޯން" މި އަހަރު މެއި މަހު ސިނަމާތަކަށް ގެންނަން ނިންމާފައިވާއިރު އޭނާ އަންނަނީ އެމޭޒަން ޕްރައިމްއިން އުފައްދާ ވެބް ސީރީސް "ސިޓަޑެލް އިންޑިއާ"ގައި ވެސް މަސައްކަތް ކުރަމުންނެވެ. ރިލީޒްކުރާނެ ދުވަހެއްގެ އިންތިޒާރު ގިނަ ބަޔަކު ކުރަމުން އަންނަ މި ވެބް ސީރީސް ޕްރިމިއާ ކުރާނެ ދުވަހެއް އަދި އިއުލާނު ނުކުރެއެވެ.
ބަތަލާ ޖާންވީ ތިން ފިލްމެއްގައި މި އަހަރު މަސައްކަތް ކުރަން ސޮއިކޮށްފައިވާއިރު ބަތަލާގެ އަލަތު ތެލުގޫ ފިލްމު މި އަހަރުގެ އޮކްޓޯބަރު މަހު ރިލީޒް ކުރުމަށް ވަނީ ތާވަލުކޮށްފައެވެ.