އިންޑިއާގެ ބޮލީވުޑްގެ އެންމެ ލޯބި ދެމަފިރިންގެ ތެރޭ ހިމެނޭ ވަރުން ދަވަންއާއި އަންހެނުން ނަތާޝާއަށް ދަރިއަކު ލިބެން އުޅޭކަން އިއްޔެގެ ވަގުތެއްގައި އިއުލާނުކޮށްފިއެވެ.
ވަރުންގެ އިންސްޓަގްރާމްގައި ދެމަފިރިންގެ ފޮޓޯއަކާ އެކު ހިއްސާކުރި ޕޯސްޓުގައި ބުނެފައިވަނީ އަންހެނުން ނަތާޝާ އަލަތު ދަރިފުޅަށް ބަލިވެއިން ކަމަށާއި ބޭނުން ވަނީ ހެޔޮއެދޭ އެންމެހާ ބައެއްގެ ލޯތްބާއި ހެޔޮ ދުއާ ކަމަށެވެ.
ވަރުންއާއި ނަތާޝާއަށް ދަރިއަކު ލިބެން އުޅޭކަން މީގެ ކުރިން މީޑިއާތަކުން ބުނެފައިވީ ނަމަވެސް އޭރު ދެ މީހުންގެ ފަރާތުން ވެސް އެ ޚަބަރު ކަށަވަރު ކޮށްދީފައެއް ނުވެއެވެ. އަންހެނުން ބަލިވެއިން ޚަބަރު ސޯޝަލް މީޑިއާގައި ޕޯސްޓު ކުރުމާއެކު ބޮލީވުޑްގެ ގިނަ ފިލްމީ ތަރިން ވަރުންގެ ދެމަފިރިންނަށް މަރުހަބާ ކިޔާފައިވެއެވެ. އޭގެ ތެރޭގައި ވަރުން ފިލްމީ ދާއިރާއަށް ތައާރަފުކުރި ޑައިރެކްޓަރު ކަރަން ޖޯހަރު، މިހާރު މަންމައިންނަށް ވެފައިވާ ނެހާ ދޫޕިއާ އަދި ސޯނަމް ކަޕޫރު ހިމެނެއެވެ.
ވަރުންއާއި ނަތާޝާގެ ކައިވެނި ކުރެވުނީ ދިގު މުއްދަތަކަށް ދެ މީހުން ލޯބީގެ ގޮތުން ގުޅިގެން އުޅުމަށް ފަހުއެވެ. މީގެ ތިން އަހަރު ކުރިން ކުރެވުނު މި ކައިވެންޏަކީ ވަރަށް ގިނަ ބައެއްގެ ސަމާލުކަން ހޯދި ކައިވެންޏެކެވެ. އޭގެ އެންމެ ބޮޑު އެއް ސަބަބަކީ ވަރުން ދަވަންއާއި ނަތާޝާ އަކީ ކުޑައިރުއްސުރެ ދަންނަ ދެ މީހުންނަށް ވެފައި ލޯބީގެ ގޮތުން ގުޅިގެން އުޅުމަށް ފަހު ވެސް ވަރުން ލޯބީގައި ތެދުވެރި މީހެއްގެ ގޮތުގައި ދެމި ހުރުމުންނެވެ.
ވަރުންއާއި ނަތާޝާއަށް ދަރިއަކު ލިބެން އުޅޭކަން އިއުލާނުކުރި ޕޯސްޓު -- ފޮޓޯ/ އިންސްޓަގްރާމް
ފިލްމީ ދާއިރާއަށް ނުކުތުމަށް ފަހު ލިބުނު މަޝްހޫރުކަމާ އެކު ވެސް ކުޑައިރުގެ ލޯބީގެ ގުޅުން ތެދުވެރިކަމާ އެކު ދެމެހެއްޓުމަކީ ހަގީގަތުގައި ވެސް ވަރަށް މަދުން ފިލްމު އިންޑަސްޓްރީން ފެންނަ މަންޒަރަކަށްވުމުން ވަރަށް ގިނަ ބައެއްގެ ލޯބި މި ދެމަފިރިންނަށް ވަނީ ލިބިފައެވެ.
ވަރުންގެ އަންހެނުން ނަތާޝާއަކީ ފިލްމީ އާއިލާއަކާ އެއްވެސް ގުޅުމެއް ނެތް އަމިއްލަ މަސައްކަތުން ފެޝަން ޑިޒައިނަރެއްގެ ގޮތުގައި މަސައްކަތް ކުރަމުން އަންނަ ފަންނާނެކެވެ. ފިލްމީ ތަރިއެއްގެ އަންހެނުންނަށް ވިޔަސް ނަތާޝާ އަކީ އަބަދުވެސް މީޑިއާތަކާ ވަރަށް ބީރައްޓެހި މީހެއް ވެސް މެއެވެ.
ހިންދީ ސިނަމާގެ ކާމިޔާބު ޑައިރެކްޓަރު ޑޭވިޑް ދަވަންގެ ދަރިފުޅު ވަރުން އަކީ ވަރަށް ކުޑަ ދުވަސްކޮޅެއްގެ ތެރޭ ފިލްމީ ދާއިރާއިން ކުރިއެރުން ހޯދި އެކްޓަރެކެވެ. އެންމެ ފަހުން ޑައިރެކްޓަރު ނިތޭޝް ތިވާރީގެ ފިލްމު "ބަވާލް"އިން ފެނުނު އެކްޓަރު އަންނަނީ އެމޭޒަން ޕްރައިމްގެ ވެބް ސީރީސް "ސިޓަޑެލް އިންޑިއާ"ގައި މަސައްކަތް ކުރަމުންނެވެ. ބަތަލާ ސަމަންތާ ޕްރަބޫއާ އެކު ވަރުން ފެންނާނެ މި ވެބް ސީރީސް ރިލީޒް ކުރާނެ ތާރީޚެއް އަދި އިއުލާނު ނުކުރެއެވެ.