މިދިޔަ އަހަރު ފިލްމު "ޕަތާން"އިން ނަބައިބައި މީހެއްގެ ރޯލުން ފެނުނު ބޮލީވުޑްގެ މަގުބޫލު އެކްޓަރު ޖޯން އަބްރަހަމްގެ ވަރުގަދަ އެކްޝަން ފިލްމެއް މި އަހަރުގެ ޖުލައި މަހު ސިނަމާއަށް އަންނާނެކަން އިއުލާނުކޮށްފިއެވެ.
މީގެ ކުރިން ވެސް ޖޯންއާ އެކު މަސައްކަތް ކޮށްފައިވާ ޑައިރެކްޓަރު ނިކިލް "ވެދާ"ގެ ނަމުގައި އުފައްދާ މި ފިލްމަކީ، ޖޯންގެ ވަރަށް ވަރުގަދަ އެކްޝަން ސީންތަކެއް ހިމެނޭ އެކްޝަން ތުރިލާއެކެވެ.
މި އަހަރުގެ ޖުލައި މަހުގެ 12 ވަނަ ދުވަހު ސިނަމާތަކަށް ގެންނަން ނިންމާފައިވާ މި ފިލްމުގެ ފުރަތަމަ ޕޯސްޓަރު ދައްކާލަމުން ޑައިރެކްޓަރު ނިކިލް އަދްވާނީ ބުނެފައިވަނީ މި ފިލްމުން ވަރަށް ވަރުގަދަ ހަނގުރާމައެއްގެ ތެރެއަށް ބެލުންތެރިން ފީނަންޖެހޭނެ ކަމުގައެވެ. ޖޯންއާ އެކު ބަތަލާ ޝަރުވަރީ ވާގް މުހިއްމު ރޯލަކުން ފެންނާނެ މި ފިލްމުގެ ވަރަށް ތަފާތު ރޯލަކުން ބަތަލާ ތަމަންނާ ބާޓިއާ ވެސް ފެންނާނެއެވެ.
ޑައިރެކްޓަރު ނިކިލްއާއި ޖޯން އެކީގައި މަސައްކަތް ކޮށްފައިވާ މަގުބޫލު ފިލްމުތަކުގެ ތެރޭ 2019 ވަނަ އަހަރު ރިލީޒްކުރި ފިލްމު "ބަޓްލާ ހައުސް"، "ސަތިޔަމޭވަ ޖަޔަތޭ" އަދި "ސަރުދާރު ކާ ގްރޭންޑް ސަން" ހިމެނެއެވެ.
ޖޯން އެންމެ ފަހުން ވިލެންގެ ރޯލުން ފެނުނު ފިލްމު "ޕަތާން" އަކީ މިދިޔަ އަހަރު ބޮކްސް އޮފީހުގައި ބޮޑު ކާމިޔާބީއެއް ހޯދި ބެލުންތެރިންގެ މެދުގައި ބޮޑު މަގުބޫލުކަމެއް ހޯދި ފިލްމެކެވެ. ހާއްސަކޮށް ޖޯން ފިލްމުގައި ކުޅުނު ވިލެންގެ ރޯލްގެ ފުރިހަމަކަމާ އެކު ގިނަ ބަޔަކު އެކްޓަރު ބޭނުން ވަނީ އެފަދަ ރޯލްތަކުން ކަމަށް ވެސް ވަނީ ބުނެފައެވެ.
ފިލްމު "ވެދާ"ގެ އިތުރުން ޖޯން އަންނަނީ އިތުރު ތިން ފިލްމެއްގައި މަސައްކަތް ކުރަމުންނެވެ. އެއީ ބަތަލާ މަނޫޝީ ޗިލާއާ އެކު ކުޅޭ ފިލްމު "ތެހެރާން"، "ތާރިޤް" އަދި "ދަ ޑިޕްލޮމެޓް"އެވެ.