މިދިޔަ އަހަރު ބޮޑު ކާމިޔާބީއެއް ހޯދި ފިލްމު "ޖަވާން"ގެ ޑައިރެކްޓަރުގެ ފިލްމު "ބޭބީ ޖޯން"ގެ ފުރަތަމަ ޓީޒާއާ އެކު ފިލްމު ރިލީޒްކުރާ ތާރީޚު އިއުލާނުކޮށްފިއެވެ. ސައުތު ސިނަމާގެ ޑައިރެކްޓަރު އެޓްލީއާއި އަންހެނުން ޕްރިޔާގެ އަމިއްލަ ފިލްމު ކުންފުނިން ގެނެސްދޭ ވަރަށް ވަރުގަދަ އެކްޝަން ފިލްމެކެވެ.
މި އަހަރުގެ މެއި 31ގައި ސިނަމާތަކަށް ގެންނަން ނިންމާފައިވާ މި ފިލްމުގެ ލީޑް ރޯލުން ފެންނާނީ ބޮލީވުޑްގެ އެކްޓަރު ވަރުން ދަވަންއެވެ. ވަރުން ދަވަން ވަރަށް ތަފާތު ރޯލަކުން ފެންނަ މި އެކްޝަން ތުރިލާ ޑައިރެކްޓް ކުރާނީ ސައުތު ސިނަމާގެ މަގުބޫލު ގިނަ ފިލްމުތަކެއް ޑައިރެކްޓްކޮށްފައިވާ ކަލީސްއެވެ. ވަރުން ފުރަތަމަ ފަހަރަށް ދެކުނުގެ ބަތަލާއަކާ އެކު ފެންނަ މި ފިލްމުގެ ބަތަލާ އަކީ، ކީރްތީ ސުރޭޝްއެވެ. ނެޝަނަލް އެވޯޑެއް ވެސް ކާމިޔާބުކޮށްފައިވާ ބަތަލާ ކީރްތީއަކީ ސައުތު ސިނަމާގެ އެންމެ ކުޅަދާނަ ފިލްމީ ތަރިންގެތެރޭ ގުނާލެވޭ ބަތަލާއެކެވެ. ކީރްތީގެ އިތުރުން ބަތަލާ ވަމީގާ ގައްބީ އަދި ކުރީގެ އެކްޓަރު ޖެކީ ޝްރޮފް މި ފިލްމުގެ މުހިއްމު ރޯލުތަކުން ފެންނާނެއެވެ.
ވަރުންގެ މަގުބޫލު ފިލްމު "ބަދްލާޕޫރް"ގެ ޕޯސްޓަރެއް--ފޮޓޯ/ އިންޓަނެޓް
ކެރިއަރުގައި ވަރަށް މަދުން ތުރިލާ ފިލްމު ކުޅެފައިވާ ވަރުން އެންމެ ފަހުން ބެލުންތެރިންނަށް ފެނިފައިވަނީ މިދިޔަ އަހަރު އެމޭޒަން ޕްރައިމްގައި ރިލީޒްކުރި ފިލްމު "ބަވާލް"އިންނެވެ. ވަރުން ކުޅެފައިވާ މަޝްހޫރު ތުރިލާ ފިލްމުތަކުގެ ތެރޭ "ބަދުލާޕޫރް" އަދި "ދިޝޫމް" ހިމެނެއެވެ.
ވަރުންގެ އިތުރު ފިލްމެއް ސިނަމާއަށް އަންނަން ތައްޔާރުވެފައިވާއިރު އެކްޓަރު އަންނަނީ ކެރިއަރުގެ ފުރަތަމަ ސްޓްރީމިން ޕްރޮޖެކްޓުގައި ވެސް މަސައްކަތް ކުރަމުންނެވެ. އެއީ އެމޭޒަން ޕްރައިމްއިން ގެނެސްދޭ "ސިޓަޑެލް އިންޑިއާ"އެވެ. ސައުތު ސިނަމާގެ ބަތަލާ ސަމަންތާއާ އެކު ވަރުން ލީޑް ރޯލް ކުޅޭ މި ޕްރޮޖެކްޓު ރިލީޒްކުރާނެ ދުވަހެއް އަދި އިއުލާނު ނުކުރެއެވެ.