އިދިކޮޅު އެމްޑީޕީން މިދިޔަ ހޮނިހިރު ދުވަހު ބޭއްވި ޕްރައިމަރީގައި ކާށިދޫ ދާއިރާގެ ކެންޑިޑެސީ ކާމިޔާބުކުރެއްވި އެ ދާއިރާގެ މިހާރުގެ މެންބަރު އަބްދުﷲ ޖާބިރުގެ ކެންޑިޑެސީ ބާތިލުކޮށް، އޭނާ ޕާޓީން ވަކިކޮށްފިއެވެ.
އެމްޑީޕީން މިއަދި ނެރުނު ބަޔާނެއްގައިވަނީ ޖާބިރު އެ ޕާޓީގެ މެންބަރެއްގެ ގޮތުގައި ހުންނަވައި މުޖުތަމައުގެ އާންމު މިންގަނޑާ ޚިލާފަށް ރައްޔިތުންނާ ބޭއަދަބީ ބަހުރުވައިން މުއާމަލާތްކޮށް، މަސްލަހަތު ގެއްލޭގޮތަށް ތަކުރާރުކޮށް އަމަލުކުރައްވަމުންދާ ކަމަށެވެ.
އެ ކަމަކީ އެމްޑީޕީ އާއި އެ ޕާޓީގެ އާންމު މެންބަރުންގެ މަސްލަހަތަށް އުނިކަންލިބޭ ފަދަ އަމަލެއް ކަމަށްވާތީ އެ ޕާޓީގެ ފިޔަވަޅުއަޅާ ކޮމިޓީން އެ މައްސަލަ ބެލި ކަމަށް އެމްޑީޕީން ބުންޏެވެ.
އެ ކޮމިޓީން ނިންމާފައިވަނީ، އެ ޕާޓީގެ ފަރާތުން ވާދަކުރުމުގެ ފުރުސަތު ޖާބިރަށް ނުދިނުމަށާއި، މިއަދުން ފެށިގެން ޕާޓީގެ މެންބަރުކަމުން އޭނާ ވަކިކުރުމަށް ކަމަށް އެމްޑީޕީން ބުންޏެވެ.
މީގެ އިތުރުން ޖާބިރު އެ ޕާޓީއާ އަލުން ގުޅުމަށް އެދުނުކަމުގައިވީ ނަމަވެސް އެފުރުސަތު ލިބޭނީ އެ ޕާޓީގެ ގައުމީ މަޖިލީހަށް އެކަން ހުށަހަޅައި އެމަޖިލިހުން ނިންމާ ގޮތެއްގެ މަތިން ކަމަށް ބަޔާނުގައިވެއެވެ.
"އަދި މި ޕާޓީއާ ގުޅުމުގެ ފުރުސަތު ދެވުނުކަމުގައިވީނަމަވެސް އަބްދުﷲ ޖާބިރު މި ޕާޓީގެ މެންބަރަކަށްވާ ދުވަހުންފެށިގެން މީލާދީ 5 (ފަހެއް) އަހަރު ދުވަހުގެ މުއްދަތެއް ޕާޓީގެ އެއްވެސް މަގާމަކަށް އަދި ޕްރައިމަރީއެއްގައި ވާދަކުރުމުގެ ފުރުސަތު ނުލިބޭނެ ކަމަށްވެސް މި ޕާޓީގެ ފިޔަވަޅުއަޅާ ކޮމެޓީން ވަނީ ނިންމާފައި،" އެމްޑީޕީން ބުންޏެވެ.
ޖާބިރު މަޖިލީހުގައާއި އާންމު ތަންތަނުގައި ބޭއަދަބީކޮށް ވާހަކަ ދައްކަވައި، އިޝާރާތް ކުރައްވާ މައްސަލަތައް ތަކުރާރުކޮށް ފެންމަތިވެފައިވެއެވެ. އެފަދަ މައްސަލަތަކުގައި މަޖިލީހުގެ ޖަލްސާތަކުގައި އޭނާގެ ނަން އިއްވައި، ތަޅުމުން ބޭރުކޮށްފައި ވެސްވެއެވެ.
ދާދިފަހުން ސޯޝަލްމީޑިއާގައި، ޖާބިރު އާންމުންނާ ޒުވާބުކޮށް، އަވަގުރާނަ ގޮވައި، ހުތުރު އިޝާރާތްތައް ކުރައްވާ މަންޒަރު ފެންނަ ވީޑިއޯތަކެއް އާންމުވެފައިވެއެވެ. އޭގެ ސަބަބުން އޭނާއަށް ފާޑުކިޔުންތައް އަމާޒުވެ، އޭނާ މެންބަރު ކަމުން ވަކިކުރަން ވެސް ބައެއް މީހުން ގޮވާލާފައިވެއެވެ.
ރައްޔިތުންގެ މަޖިލީހުގެ މި ދައުރަށް ޖާބިރު އިންތިޚާބުވީ އަމިއްލަ ގޮތުގައި ވާދަކުރައްވައިގެންނެވެ. އެއީ 2019 ވަނަ އަހަރުގެ މަޖިލިސް އިންތިޚާބަށް އޭނާ އެމްޑީޕީގެ ޓިކެޓަށް ވާދަކުރެއްވުމަށް ފަހު ނާކާމިޔާބުވުމުން އެ ޕާޓީން ވަކިވެވަޑައިގަތުމަށްފަހުއެވެ.
އޭގެ ކުރިން ޖާބިރު ހުންނެވީ، ކުރީގެ ރައީސް މައުމޫން އަބްދުލްގައްޔޫމް އުފެއްދެވި ޑީއާރުޕީގެ ލީޑަރެއްގެ ގޮތުގައެވެ. ނަމަވެސް އެ ޕާޓީގެ މެންބަރުން ހަމަނުވާތީ ޕާޓީ އުވާލަން އިލެކްޝަންސް ކޮމިޝަން (އީސީ)އިން ނިންމުމުން އޭނާ ގްރީން ޕާޓީގެ ނަމުގައި އަމިއްލަ ޕާޓީއެއް އުފައްދަވަން ވެސް މަސައްކަތް ކުރެއްވިއެވެ.
އެއަށްފަހު، މިދިޔަ އަހަރުގެ ޖޫން 25ގައި އޭނާ އަލުން އެމްޑީޕީއާ ގުޅިވަޑައިގަތީއެވެ.
އެމްޑީޕީގެ މިފަހަރުގެ ޕްރައިމަރީގައި ޖާބިރުގެ ދަރިފުޅު އަހްމަދު މުއާޒު ވެސް ވާދަކުރައްވައި ކެންޑިޑެސީ ހޯއްދެވިއެވެ. އޭނާ ހޯއްދެވީ އދ. މަހިބަދޫ ދާއިރާގެ ޓިކެޓެވެ.