މިދިޔަ ސަރުކާރުގެ ވެރިކަން ނިމުނު އިރު އިސްލާމިކް މިނިސްޓްރީން ނުދައްކައި ހުރި ދަރަނި ދައްކާ ނިންމާ، ސްޕޯޓްސް މިނިސްޓްރީން ނުދައްކާ ހުރި ދަރަނީގެ އެއްބައި މިހާރު ދައްކާ ނިންމައިފައިވާ ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދާއި، ސްޕޯޓްސް މިނިސްޓަރު އަބްދުﷲ ރާފިއު މިރޭ ވިދާޅުވެއްޖެއެވެ.
ވަޒީރުންނާ ސުވާލުކުރުމުގެ ފުރުސަތު ދިނުމަށް މިރޭ ބޭއްވި 'އަހާ' ފޯރަމުގައި ވާހަކަ ދައްކަވަމުން ޝަހީމް ވިދާޅުވީ ރައީސް ޑރ. މުޙައްމަދު މުޢިއްޒާ ރާއްޖޭގެ ވެރިކަން ހަވާލުވީ އިރު ހަމައެކަނި އިސްލާމީ ކަންކަމާބެހޭ ވުޒާރާއަށް 27 މިލިއަން ރުފިޔާގެ ދަރަނި އޮތް ކަމަށެވެ.
"ރައީސްގެ ފުރަތަމަ ދެ ހަފުތާގެ ތެރޭގައި ވަނީ މި ދަރަނިތައް ފިލުވައިލުމަށްޓަކައި މިނިސްޓްރީއަށް ފައިސާ ހަމަ ޖައްސަވައިފައި. މިހާރު މި ވަނީ މި 27 މިިލިއަން ރުފިޔާގެ ދަރަނި ފިލުވައިލައިފައި،" އޭނާ ވިދާޅުވިއެވެ.
މިއީ އިގުތިސާދީ ދަތިކަމުގެ ތެރޭގައިވެސް ރައީސް ކޮށްދެއްވި ވަރަށް މުހިންމު ކަމެއް ކަން ޝަހީމް ވިދާޅުވިއެވެ. އަދި އޭރު ދަރަނި ބޮޑުވެ ފައިސާ ނުދެއްކުމުގެ ސަބަބުން ހުއްޓިފައި ހުރި މަޝްރޫތައް ވަރަށް އަވަހަށް ފެށޭނެ ކަންވެސް މިނިސްޓަރު ފާހަގަކުރެއްވިއެވެ.
"އެހެން ވީމަ މިނިސްޓްރީގެ ފަރާތުން ކުރިއަށް ގެންދާ މަޝްރޫއުތައް ރަށްރަށުގަ ހުރި މިސްކިތްތައް. އަދި ހުއްޓިފައި ހުރި ހުރިހާ މަޝްރޫއުތަކަށާއި، އެ ކުންފުނިތަކަށް ލާރި ނުދައްކާ ހުރުމުގެ ސަބަބުން ހުއްޓިފައިހުރި މަޝްރޫތައް. ހުރިހާ ކުންފުނިތަކަށް މިހާރު ވާނީ ލާރި ދެއްކިފަ. ރައީސް މިކަން ވަރަށް ގާތުން އެބަ ބައްލަވާ،" ޝަހީމް ވިދާޅުވިއެވެ.
މި މަޝްރޫތައް ކުރިއަށް ގެންގޮސް، ލަސްތަކެއް ނުވެ ރައްޔިތުންނަށް އެތަންތަނުން ޚިދުމަތް ލިބޭނެ ކަމަށް ވެސް މިނިސްޓަރު ވިދާޅުވިއެވެ.
ސްޕޯޓްސް މިނިސްޓްރީގެ ދަރަންޏާ ގުޅޭ ގޮތުން ރާފިއު ވިދާޅުވީ، މި ސަރުކާރާ ވެރިކަން ހަވާލުވި އިރު އެ މިނިސްޓްރީން ދައްކަން ޖެހޭ ދަރަނި ވެސް އިންތިހާއަށް ބޮޑު ކަމަށެވެ. އަދި ކުރެވުނު މަސައްކަތުން ދަރަނީގެ ބައެއް މިހާރު ދެއްކިފައިވާ ކަމަށް އޭނާ ވިދާޅުވިއެވެ.
"އަޅުގަނޑުމެންނަށް މިނިސްޓްރީ ހަވާލުވިއިރު ދަރަނި 160 މިލިއަންގައި އޮތީ. މިދިޔަ ދެ މަސްދުވަހު ކުރެވުނު މަސައްކަތުން 125 މިލިއަން ދަރަނި ވަނީ ދައްކާފައި،" ރާފިއު ވިދާޅުވިއެވެ.
އިތުރަށް ވާހަކަ ދައްކަވަމުން އޭނާ ވިދާޅުވީ، މި ސަރުކާރާ ވެރިކަން ހަވާލުވެ މި ވީ ދުވަސްކޮޅުގެ ތެރޭގައި މިހާރު ރާއްޖޭގެ އެކި ސަރަހައްދުތަކުގައި އިތުރު 131 ޕްރޮޖެކްޓެއް ފަށައިފައިވާ ކަމަށެވެ.
މިދިޔަ ބުދަ ދުވަހު އިގްތިސާދީ ކަންތައްތަކާ ބެހޭ ވަޒީރު، ސައީދު ކުރެއްވި ޓްވީޓެއްގައިވެސް ވާގޮތުން، ރަައީސް ޑރ. މުޙައްމަދު މުއިއްޒު ވެރިކަމާ ހަވާލުވެވަޑައިގެންނެވި އިރު ފައިސާ ދޫނުކޮށް ހަތް ބިލިއަނެއްހާ ރުފިޔާގެ ބިލުތައް ހުއްޓެވެ. އޭގެ ސަބަބުން ރާއްޖޭގެ ވިޔަފާރިތަކަށް ނޭދެވޭ އަސަރު ކޮށްފައިވާ ކަމަށް އޭނާ ވިދާޅުވެފައިވެއެެވެ.