ރާއްޖެއިން ޓައިވާނާއެކު އެއްވެސް ގުޅުމެއް ގާއިމް ނުކުރާނެ ކަމަށާއި ޗައިނާއާއި ޓައިވާނުގެ މައްސަލައިގައި ރާއްޖެއިން ތާއީދު ކުރަނީ، 'ވަން ޗައިނާ' ޕްރިންސިޕަލަށް ކަމަށް ރާއްޖެއިން ބުނެފިއެވެ.
ޓައިވާނުން ހޮނިހިރު ދުވަހު ވަނީ އެގައުމުގެ ރައީސަކު ހޮވުމަށް އިންތިޚާބެއް ބާއްވާފައެވެ. މިކަމާ ގުޅިގެން މިއަދު ރައްޖޭގެ ފޮރިން މިނިސްޓްރީން ނެރުނު ބަޔާނެއްގައި ވަނީ، ޗައިނާއާއި ރާއްޖޭގެ ގުޅުމުގެ އަސްލަކީ ރާއްޖެއިން ގަބޫލުކުރާ 'ވަން ޗައިނާ' އުސޫލު ކަމަށެވެ.
އެ ބަޔާނުގައި ވަނީ، ރައީސް ޑރ. މުހައްމަދު މުއިއްޒު ޗައިނާއަށް ކުރެއްވި ދަތުރުފުޅުގައި ދެ ގައުމުގެ ސަރުކާރުން ނެރުނު ބަޔާނުގައި ވާފަދައިން ޓައިވާނަކީ ޗައިނާއާ ވަކިނުކުރެވޭނެ، އެ ގައުމުގެ ބަޔެއްގެ ގޮތުގައި ރާއްޖެއިން ބަލައިގަންނަ ކަމަށެވެ.
މީގެ އިތުރުން ޗައިނާގެ އިސްތިގުލާލާއި ސަރަހައްދީ އިމާ ފުށޫއަރާ ވާހަކަތަކާއި އަމަލުތަކާ ރާއްޖެއިން ދެކޮޅު ހަދާ ކަމަށާއި ޓައިވާން ވަކިކުރުމަށް ހިންގާ ހަރަކާތްތަކާ ވެސް ދެކޮޅު ކަމަށް އެ ބަޔާނުގައިވެއެވެ.
މީގެ އިތުރުން، ޓައިވާނާ އެއްވެސް ގުޅުމެއް ރާއްޖެއިން ނުބާއްވާނެ ކަމަށާއި، ޗައިނާގެ އެއްބައިވަންތަކަމަށް ޓަކައި އެ ގައުމުން އަޅާ ފިޔަވަޅުތަކަށް ރާއްޖެއިން ސަޕޯޓުކުރާކަމަށް ވެސް އެ ބަޔާނުގައި ވެއެވެ.
މިމަހުގެ އަށްވަނަ ދުވަހު ރައީސް ވަނީ ޗައިނާގެ ރައީސް ޝީ ޖިން ޕިން ދައުވަތަކަށް އެ ގައުމަށް ޒިޔާރާތް ކުރައްވާފައެވެ. މި ދަތުރުފުޅުގައި ދެ ގައުމުން ވަނީ ގިނަ މަޝްވަރާތަކެއްކޮށް، މުހިންމު އެއްބަސްވުންތަކެއްގައި ސޮއިކޮށްފައެވެ.
މީގެ ކުރިން ޗައިނާއިން ވަނީ، ޗައިނާގެ ދާހިލީ ކަންކަމަށް ބޭރުން ނުފޫޒު ފޯރުވުމާ ރާއްޖެއިން ދެކޮޅުވާ ގޮތަށް، ރާއްޖެއަށް ވެސް ބޭރުގެ ބަޔެއްގެ ނުފޫޒު ފޯރުވުމާ ޗައިނާއިން ދެކޮޅު ކަމަށް ބުނެފައެވެ.