ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް)ގެ ރައީސްކަމަށް ވާދަކުރާ ދެ ކެންޑިޑޭޓުންނަށް ވެސް ކްލަބު ވެލެންސިއާއިން ތާއީދު ސިޓީ ދީފައިވާތީ، ފީފާ އާއި އޭއެފްސީގެ ލަފަޔަކަށް އެފްއޭއެމުން އެދިއްޖެއެވެ.
މި މަހުގެ 31ގައި ބޭއްވުމަށް ހަމަޖެހިފައިވާ އެފްއޭއެމްގެ އިންތިހާބުގައި ރައީސްކަމަށް ވާދަކުރައްވަނީ އެ އިދާރާގެ ހިންގާ ކޮމިޓީގެ މެންބަރެއްގެ ގޮތުގައި މިހާރު ވެސް ހުންނެވި މުވާފިޒް ހާޝިމް (މުފާ) އާއި އެފްއޭއެމްގެ ކުރީގެ ރައީސް އަދި މަހިބަދޫ ދާއިރާގެ މަޖިލިސް މެންބަރު އަހުމަދު ތާރިގު (ޓޮމް)އެވެ.
ތިން ކްލަބެއްގެ ތާއީދާއެކު މުފާ ކުރިމަތިލެއްވި އިރު، ޓޮމް ވެސް ކުރިމަތިލެއްވީ ތިން ކްލަބެއްގެ ތާއީދާއެކުއެވެ.
އެ ދެ ކެންޑިޑޭޓުން ފޯމު ހުށަހެޅުއްވިއިރު، އެންމެ ބޮޑު މައްސަލައެއްގެ ގޮތުގައި ފާހަގަވެފައިވަނީ މުފާ އަދި ޓޮމްއަށް ވެސް ވެލެންސިއާގެ ތާއީދު ސިޓީ ދީފައިވުމެވެ. އެކަމާ ގުޅޭގޮތުން ވެލެންސިއާގެ މިހާރުގެ ޗެއާމަން އަބްދުﷲ އަޒްމީން ވިދާޅުވެފައިވާ ގޮތުގައި، އެ ކްލަބުން ތާއީދު ސިޓީ ދީފައިވާނީ ހަމައެކަނި ޓޮމްއަށެވެ.
އެ މައްސަލައިގައި އެފްއޭއެމްގެ އިލެކްޓޯރަލް ކޮމިޓީން ނެރުނު ބަޔާނެއްގައި ބުނީ ދެ ކެންޑިޑޭޓުންގެ ފޯމުތައް ކަނޑައި ޗެކްކުރި އިރު، ދެ ކެންޑިޑޭޓުންނަށް ވެސް ވެލެންސިއާ އިން ތާއީދުކޮށް ސިޓީ ދީފައިވާކަން ފާހަގަކުރެވުނު ކަމަށާއި އެހެންކަމުން އެ ފަދަ ހާލަތެއްގައި އަމަލުކުރާނެ ގޮތުގެ ލަފައަކަށް ފީފާ އަދި އޭއެފްސީގައި މިހާރު އެދިފައިވާނެ ކަމަށެވެ.
"އެ އިދާރާތަކުން ދެއްވާ ލަފަޔާއެކު އިލެކްޓޯރަލް ކޯޑުގައި ބަޔާންކޮށްފައިވާ މުއްދަތުގެ ތެރޭގައި މި ކޮމިޓީން ނިންމި ގޮތް ހިއްސާކުރާނެ ވާހަކަ ދެންނެވީމެވެ. އިންތިހާބުގެ އެންމެހާ ކަންކަން ފުޓްބޯލް އެސޯސިއޭޝަން އޮފް މޯލްޑިވްސްގެ ގަވާއިދާއި އޭއެފްސީ އާއި ފީފާގެ ލަފަޔާއި މަޝްވަރާގެ މަތިން، އިންސާފުވެރިކަމާއެކު ކުރިއަށްގެންދާނެކަމުގެ ޔަގީންކަން މި ކޮމިޓީން ދެމެވެ..،" އެ ކޮމިޓީން ނެރުނު ބަޔާނުގައި ބުންޏެވެ.
އެ މައްސަލައިގައި ވެލެންސިއާގެ ޗެއާމަން އަޒްމީން، އެފްއޭއެމަށް ފޮނުއްވި ސިޓީއެއްގައި ވިދާޅުވެފައިވަނީ، މުފާ ހުށަހަޅުއްވައިފައިވާ އެ ކްލަބުގެ ސިޓީއަކީ ފޯޖުކޮށްފައިވާ ސިޓީއެއް ކަމަށް ބެލެވޭތީ، އެ މައްސަލަ ކޮމިޝަނާ އޮފް ސްޕޯޓްސް އާއި ފުލުހަށް ހުށަހަޅައިފައިވާ ކަމަށާއި އެ މައްސަލަ ތަހުގީގުކުރުމަށް ކްލަބުން ދޭން ޖެހޭ ފުރިހަމަ އެއްބާރުލުން ދޭނެ ކަމަށެވެ.
އެކަމާ ގުޅޭގޮތުން ފުލުހުން ބުނެފައިވަނީ، ވެލެންސިއާ އިން އެފަދަ އެއްވެސް މައްސަލައެއް އެ އިދާރާއަށް ހުށަހަޅާފައިނުވާ ކަމަށެވެ.