ރާއްޖޭގެ ސްޕެޝަލް އިކޮނޮމިކް ޒޯން (އެސްއީޒެޑް)އެއްގައި މަޝްރޫއެއް ހިންގޭނެ އަގު ދަށްކުރިފަހުން ފުރަތަމަ ފަހަރަށް ލިބިފައިވާ އިއާދަކުރަނިވި ހަކަތައިގެ ބިޔަ މަޝްރޫއުގެ އިންވެސްޓްމަންޓް، ބޯޑުން ރިވިއުކުރަން ފަށައިފިއެވެ.
އެ ޕްރޮޕޯސަލަކީ އިއާދަކުރަނިވި ހަކަތައިން 110 މެގަވޯޓުގެ ކަރަންޓު އުފެއްދުމުގެ މަޝްރޫއެކެވެ.
އިކޮނޮމިކް މިނިސްޓްރީން އެކްސްގައި ކުރި ޕޯސްޓެއްގައި ބުނީ، އެސްއީޒެޑް ފްރޭމްވޯކްގެ ދަށުން ލިބުނު ފުރަތަމަ އެޕްލިކޭޝަން ރިވިއު ކުރަން އިންވެސްޓްމަންޓްސް ބޯޑުން މިއަދު ފަށައިފި ކަމަށެވެ.
މިދިޔަ މަހުގެ 24 ވަނަ ދުވަހު ރައީސް ޑރ. މުޙައްމަދު މުއިއްޒު އެ މަޝްރޫއު އިއުލާނުކުރެއްވިއިރު ވިދާޅުވީ، މި މަޝްރޫއު ވާނީ ކޮޕް28 ސަމިޓަށްފަހު ގައުމަކުން އިއާދަކުރަނިވި ހަކަތައިގެ ދާއިރާއިން ފަށާ ފުރަތަމަ މަސައްކަތް ކަމަށެވެ.
އެސްއީޒެޑެއްގައި ހިންގިދާނެ އިގްތިސާދީ މަސައްކަތްތަކާއި، އެއިން ޒޯނެއްގައި ހިމެނޭ ޖުމްލަ އިންވެސްޓްމަންޓްގެ އެންމެ ކުޑަ މިންގަނޑު 100 މިލިއަން އެމެރިކާ ޑޮލަރަށް ދަށްކުރައްވައި އެ މިންވަރު ރައީސް ޑރ. މުއިއްޒު ކަނޑައެޅުއްވީ މި މަހު 17ގައެވެ.
ކުރިން އޮތް އެންމެ ކުޑަ އަގަކީ އަގަކީ 150 މިލިއަން ޑޮލަރެވެ.
އެސްއީޒެޑް ގާނޫނު އެންމެ ފުރަތަމަ ތައާރަފުކުރީ 2015 ވަނަ އަހަރުއެވެ.