ތާރީޚުގައި ވެސް މުޅިން އަލަށް ކެބިނެޓުގެ ވަޒީރުންނަށް ރުހުން ނުދީ ހިފަހައްޓައި، ދިވެހި ރައްޔިތުންގެ ކުރިމަތީގައި މަޖިލީހުގެ އަމިއްލަ ނަން ހަޑިކޮށްލައިފި ކަމަށް ނައިބު ރައީސް ހުސެއިން މުޙައްމަދު ލަތީފް މިރޭ ވިދާޅުވެއްޖެއެވެ.
ނައިބު ރައީސް މިފަދައިން ވިދާޅުވެފައި ވަނީ، ދައުރު ނިންމައި މަޖިލީސް ޗުއްޓީއަށް ދިޔައިރު، ވަޒީރުންނަށް ރުހުން ދިނުމުގެ މައްސަލަ ކޮމިޓީ މަރުހަލާގައި އޮތުމުންނެވެ.
ޕީޕީއެމް/ ޕީއެންސީގެ ފަރާތުން ސިޓީ ކައުންސިލަށް ވާދަކުރައްވާ ބޭފުޅުން ހެންވޭރުގެ ރައްޔިތުންނާ މިރޭ ބޭއްވި ކެމްޕެއިން ޖަލްސާގައި އެމަނިކުފާނު ވިދާޅުވީ، ވަޒީރުންނަށް ރުހުން ނުދީ ހިފަހައްޓަނީ ދުސްތޫރީ ނިޒާމު ގަޑުބަޑުކޮށްލުމަށްޓަކައި ކަމަށެވެ.
"އެއްވެސް ސަރުކާރަކުން އެއްވެސް މަޖިލީހަކުން އެއްވެސް އިރެއްގައި އަޅުގަނޑުމެންގެ ވަޒީރުންނަށް، ދައުލަތުގެ ވަޒީރުންނަށް، ފުރަތަމަ ފަހަރަށް ރުހުން ނުދީ ހިފަހައްޓާފައެއް ނެތް. ދިވެހި ރައްޔިތުންގެ ކުރިމަތީ ތާރީޚުގެ ތެރޭގައި އެބޭފުޅުންގެ ނަން އެ ހަޑިކޮށްލީ،" ނައިބު ރައީސް ވިދާޅުވިއެވެ.
ނައިބު ރައީސް ވިދާޅުވީ އެފަދަ ގޮތަކަށް، މި ސަރުކާރުގެ ތަރައްގީގެ ޕްލޭންތަކުގެ ވިސްނުމާ ދެކޮޅު ބަޔަކަށް ކުރިއަށް އޮތް ތަނުގައި ފުރުސަތު ދެވިއްޖެނަމަ މި ސަރުކާރުގެ ތަރައްގީގެ ފިޔަވަޅު "ފަހަތު ފަޔަށް ސޮއްސާލާނެ" ކަމަށެވެ.
އެގޮތުން މާލޭގެ މޭޔަރަކު ހޮވުމުގައި ރައްޔިތުން އެ ހުރިހާ ކަމަކަށް ވިސްނާނެ ކަމަށް ނައިބު ރައީސް ވިދާޅުވިއެވެ.
ޕީއެންސީގެ ޓިކެޓުގައި މާލޭ މޭޔަރުކަމުގެ ގޮނޑިއަށް ކެމްޕޭނު ކުރައްވަމުން ގެންދަވާ ކުރީގެ ބަންޑާރަ ނައިބު އާއިޝަތު އާޒިމާ ޝަކޫރަށް އިޝާރާތްކުރައްވާ ނައިބު ރައީސް ވިދާޅުވީ، ރައީސް ޑރ. މުޙައްމަދު މުއިއްޒުގެ އަތްޕުޅުގައި ހިތްޕަވައިގެން ނުކުންނަވާ ކެންޑިޑޭޓަށް މާލެ ރައްޔިތުން ވޯޓު ދެއްވާނެ ކަމުގެ ޔަގީންކަން އެބައޮތް ކަމަށެވެ.
ވަޒީރުންނަށް ރުހުންހޯދަން މަޖިލީހަށް ފޮނުވީ މިދިޔަ މަހު 20 ގައެވެ.
ކުރިން މިދިޔަ މަހު 18ގައި ވަޒީރުންނަށް ރުހުންދޭން ތަޅުމަށް އެޖެންޑާކުރި ނަމަވެސް، އެ ދުވަހު ކޮމިޓީން އެކުލަވައިލި ރިޕޯޓު އެއްކޮށް ފުރިހަމަނުވާތީއާއި ވުޒާރާތަކުގެ މެންޑޭޓު ފާސްކޮށްފައިނުވާތީ މަޖިލީހުގެ ރައީސް މުހައްމަދު އަސްލަމް ނިންމެވީ މައްސަލަ އަނބުރާ ކޮމިޓީއަށް ފޮނުވައިލާށެވެ.
އެއަށްފަހު މަޖިލިސް ޗުއްޓީއަށް ވެސް ގޮސްފައިވަނިކޮށް މިދިޔަ ހޮނިހިރު ދުވަހު ރައީސް މުއިއްޒުގެ ކެބިނެޓަށް ރުހުން ދޭން، ރައްޔިތުންގެ މަޖިލީހުގެ ސަރުކާރު މަސްއޫލިއްޔަތު އަދާ ކުރާ މިންވަރު ބަލާ ކޮމިޓީއިން ވަނީ ފާސްކޮށްފައެވެ.
ކޮމިޓީގައި މައްސަލަ އަލުން އެޖެންޑާކުރިއިރު، ކުރިން އެމްޑީޕީގައި ތިއްބެވި 12 މެމްބަރަކު ޕާޓީ ބަދަލުކޮށް ވަނީ ޕީއެންސީއަށް ސޮއި ކުރައްވައިފައެވެ.
ވަޒީރުންނަށް ރުހުން ނުދެވި، ދިގުދެމިގެންދާތީ ގިނަ ބަޔަކު އަންނަނީ މަޖިލީހުގެ މެޖޯރިޓީ އޮތް އެމްޑީޕީއަށް ވަރަށް ބޮޑަށް ފާޑުކިޔަމުންނެވެ. އެކަމަކު، އެމްޑީޕީގެ ބައެއް މެންބަރުން އަންނަނީ މިހާރު ވެސް ސަރުކާރުގެ ބައެއް ވަޒީރުންނަށް ރުހުންނުދޭން ގޮވައިލަމުންނެވެ.