ޓްރާންޝިޕްމަންޓް އާއި ރީއެކްސްޕޯޓް ވިޔަފާރިއަށް ޙާއްޞަކޮށް ކުންފުންޏެއް އުފައްދަން ސަރުކާރުން ނިންމާފައިވާ ކަމަށް އިކޮނޮމިކް މިނިސްޓަރު މުޙައްމަދު ސައީދު މިރޭ ވިދާޅުވެއްޖެއެވެ.
ސައީދު އެކްސްގައި ކުރެއްވި ޕޯސްޓެއްގައި ވިދާޅުވީ، ރާއްޖޭގެ އިޤްތިޞާދީ ރައްކާތެރިކަން ކަށަވަރުކުރުމާއި، ވެލިއުއެޑްކުރުމާއި، ޓްރާންޝިޕްމަންޓް އާއި ރީއެކްސްޕޯޓް ވިޔަފާރިއަށް ޚާއްޞަ 100 ޕަސެންޓް ދިވެހި ކުންފުންޏެއް އުފައްދަން ރައީސް ޑރ. މުޙައްމަދު މުއިއްޒު ނިންމަވާފައިވާ ކަމަށެވެ.
އެ ކުންފުންޏަށް ދީފައިވާ ނަމަކީ މޯލްޑިވްސް އިންޑަސްޓްރިއަލް ޑިވެލޮޕްމަންޓް ފްރީ ޒޯން ކަމަށް އޭނާ ވިދާޅުވިއެވެ.
ގްރޭޓާ މާލެ އޭރިއާގައި ޓްރާންސްޝިޕްމަންޓް ބަނދަރެއް ބިނާކުރުމުގެ ކަންކަން ރާވައި އިންތިޒާމުކޮށް، އެ މަޝްރޫއަށް ބޭނުންވާ މަސައްކަތްތައް ފެށުމަކީ މި ސަރުކާރުން ފުރަތަމަ 14 ހަފުތާ ތެރޭގައި ކުރަން ނިންމާފައިވާ ކަންތައްތަކުގެ ތެރެއިން ކަމެކެވެ.
މުދާ އުފުލާ އެއް ބޯޓުން އަނެއް ބޯޓަށް، ދަތުރުމަތީގައި މުދާ ބަދަލު ކުރުމުގެ ފުރުސަތު ފަހިކޮށްދޭ ޓްރާންސްޝިޕްމަންޓް ޚިދުމަތުން އިގުތިސާދީ މަންފާތައް ލިބޭނެއެވެ.
ނަމަވެސް އެ މަޝްރޫއާ ގުޅުން ހުރި އިތުރު މައުލޫމާތެއް މިހާތަނަށް މިނިސްޓަރު ވެސް އިކޮނޮމިކް މިނިސްޓްރީން ވެސް ހާމަކޮށްފައިނުވެއެވެ.
ރައީސް ވަނީ، ލ. އަތޮޅުގައި އޮތް ހިމާޔަތްކޮށްފައިވާ ރަށެއް ކަމަށްވާ ގާދޫގައި ބަންކަރިންގެ ޚިދުމަތާއެކު ޓްރާންޝިޕްމެންޓު ބަނދަރެއް ތަރައްގީކުރުމުގެ މަސައްކަތް ވެސް ފުރަތަމަ 14 ހަފުތާ ތެރޭގައި ފައްޓަވާނެކަން މީގެ ކުރިން އިއުލާންކުރައްވާފައެވެ.