ކުރީގެ ރައީސް އަބްދުﷲ ޔާމީން އަބްދުލްގައްޔޫމް މިނިވަންކުރަން ސަރުކާރަށް ކުރެވޭނެ އިތުރު ކަމެއް ނެތް ކަމަށާއި މިހާރު އެ ހުރިހާ ކަމެއް އޮތީ ޝަރުއީ ދާއިރާގެ އަތްމަތީގައި ކަމަށް ސަރުކާރުގެ އިސް ތަރުޖަމާނު މުހައްމަދު ޝަހީބު މިއަދު ވިދާޅުވެއްޖެއެވެ.
ޔާމީނަށް މިދިޔަ އަހަރުގެ ޑިސެމްބަރު 25 ގައި ވަނީ 11 އަހަރުގެ ޖަލު ހުކުމެއް އިއްވައި، ފަސް މިލިއަން ޑޮލަރުން ޖޫރިމަނާކޮށްފައެވެ. އެ މަނިކުފާނު މިނިވަންކުރުމަކީ ރައީސް ޑރ. މުހައްމަދު މުއިއްޒުގެ އެންމެ ބޮޑު އެއް ރިޔާސީ ވައުދުފުޅެވެ.
މިއަދު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ސަރުކާރުގެ އިސް ތަރުޖަމާނު ވިދާޅުވީ، މުތުލަގަށް ޔާމީން މިނިވަންކުރަން ރައީސް ވައުދުވެވަޑައިގެންފައިނުވާނެ ކަމަށާއި ވައުދުވެލެއްވީ އެ މަނިކުފާނު ގެކޮޅަށް ބަދަލުކޮށް، ޝަރުއީ ދާއިރާއަށް ސަރުކާރުތަކުން ފޯރުވާ ނުފޫޒު ނިމުމަކަށް ގެނައުން ކަމަށެވެ. އަދި، ހުވާ ކުރެއްވުމަށް ފަހު ދެއްވި ފުރަތަމަ ތަގުރީރުގައި ރައީސް ވިދާޅުވި ފަދައިން އެ ދުވަހުން ފެށިގެން ސަރުކާރުން އެއްވެސް ނުފޫޒެއް ޝަރުއީ ދާއިރާއަށް ނުފޯރުވާނެ ކަމަށެވެ.
އެހެންވެ، މިހާރު ޔާމީން މިނިވަންކުރުމަކީ ސަރުކާރުގެ އަތްމަތީގައި އޮތް ކަމެއް ނޫން ކަމަށާއި ސަރުކާރުން އެއްވެސް ނުފޫޒެއް ނުފޯރުވާނެ ކަމަށް ޝަހީބު ވިދާޅުވިއެވެ. އޭނާ ވިދާޅުވީ، ޔާމީން މިނިވަންކުރުމުގެ ބާރު އޮތީ ޝަރުއީ ދާއިރާގެ އަތްމަތީގައި ކަމަށެވެ.
"ރައީސް މުއިއްޒުގެ ވައުދުފުޅު އޮތީ 17 ނޮވެމްބަރު ވީ ދުވަހު ފުއްދާފައި، ޖުޑިޝަރީ އަތްމަތީގައި މިހާރު އޮތީ. ހަމަ ގައިމު ވެސް ސަރުކާރުން ނުފޫޒެއް ނުފޯރުވާނެ،" ތަރުޖަމާނު ވިދާޅުވިއެވެ.
ރައީސް އޮފީހުގެ ތަރުޖަމާނު މުޙައްމަދު ޝަހީބު: އޭނާ ވިދާޅުވީ ޔާމީން މިނިވަންކުރުން އޮތީ ޝަރުއީ ދާއިރާގެ އަތްމަތީގައި ކަމަށް -- ފޮޓޯ/ ރައީސް އޮފީސް
ޝަހީބު ވިދާޅުވީ، ޔާމީން އަދިވެސް ހުކުމެއްގައި ހުންނެވުމުގެ ސަބަބުން އެ މަނިކުފާނަށް ސިޔާސީ ކަންކަމުގައި ބައިވެރިވުމުގެ ފުރުސަތު ނޯންނަ ކަމަށެވެ. އެހެންވެ، އަދި އެ މަނިކުފާނާ ބައްދަލުކުރައްވަން ރައީސް މުއިއްޒު ބޭނުންފުޅުނުވާ ކަމަށް އޭނާ ވިދާޅުވިއެވެ.
ޔާމީންގެ ފަރާތްޕުޅުން ހައިކޯޓުގައި ޖަލު ހުކުމް އިސްތިއުނާފުކޮށްފައި އޮތުމާ އެކު، ރިޔާސީ އިންތިޚާބު ނިމުމުން ކުރީ ސަރުކާރުން ވަނީ ޔާމީންގެ ބަންދަށް ބޮޑެތި ލުއިތަކެއްދީ، ގޭބަންދަށް ބަދަލުކޮށްފައެވެ. އޭގެ ތެރޭގައި ސިއްހީ ކަންކަމާއި ކަސްރަތަށް ބޭރަށް ދިއުމުގެ ހުއްދަ ވެސް ވަނީ ދީފައެވެ.
އޭގެ ފަހުން، ޔާމީން ތިން ފަހަރެއްގެ މަތިން ޕާޓީ އޮފީހަށް ވަޑައިގެން ސިޔާސީ ކަންކަމުގައި އުޅުއްވާތީ ކަރެކްޝަންސްއިން އިންޒާރު ވެސް ދިނެވެ. އެހެންވެ، ޔާމީންގެ ފަރާތްޕުޅުން އެދުނީ ސިޔާސީ ކަންކަމުގައި އުޅުއްވޭ ގޮތަށް ބަންދަށް އިތުރު ލުއިތަކެއް ދިނުމަށެވެ. އެކަމަކު، ކަރެކްޝަންސްއިން ނިންމީ ލުއިދެވެން ނެތް ކަމަށެވެ.
ޕީއެންސީގެ ސަރުކާރު އުފެދުނުތާ ހަފުތާއެއް ނުވަނީސް ދެ ރައީސުންގެ ގުޅުން ގޯސްވެ، ޔާމީން ވަނީ ޕީޕީއެމްގެ މެންބަރުން ޕީއެންސީއަށް ބަދަލުވާކަމުގެ ކަންބޮޑުވުން ހިއްސާކުރައްވައިފައެވެ.
އޭގެ ފަހުން އެ މަނިކުފާނު ވަނީ ޕީޕީއެމް ހިންގަން ކޮމިޓީއެއް އެކުލަވައިލައިފައެވެ. އެކަމަކު، ސަރުކާރު ފެކްޝަނުން އެ ކޮމިޓީގައި އިސްކޮށް ހުންނެވި ކުރީގެ ސައެންސް މިނިސްޓަރު މުހައްމަދު މަލީހް ޖަމާލަށް ފިޔަވަޅު އެޅުމުން ޔާމީން ވަނީ ޕީޕީއެމުން ވަކިވެވަޑައިގެންފައެވެ. އެއަށް ފަހު، އެ މަނިކުފާނު ގެންދަވަނީ ޕީޕަލްސް ނެޝަނަލް ފްރަންޓު [ޕީއެންއެފް]ގެ ނަމުގައި އާ ސިޔާސީ ޕާޓީއެއް އުފެއްދުމުގެ މަސައްކަތް ކުރައްވަމުންނެވެ.