ވޮލީބޯލް އެސޯސިއޭޝަން އޮފް މޯލްޑިވްސް (ވީއޭއެމް)އިން އިންތިޒާމުކޮށްގެން ބާއްވާ ވޮލީބޯލް އެސޯސިއޭޝަން ކަޕްގެ އަންހެން ޑިވިޝަންގެ ޗެމްޕިއަންކަން ކްލަބު ވެމްކޯ ހޯދައިފިއެވެ.
ސޯޝަލް ސެންޓަރު އިންޑޯ ހޯލުގައި ކުރިއަށްދާ އެ މުބާރާތުގެ ޗެމްޕިއަންކަން ވެމްކޯއިން ހޯދީ ރޭ ކުޅުނު ފައިނަލް މެޗުން މޮޅުވެގެންނެވެ. އެ މެޗުގައި ވެމްކޯ ނުކުތީ ޕޮލިސް ކްލަބާ ދެކޮޅަށެވެ.
ފައިނަލުގައި ޕޮލިސް ކްލަބު އަތުން ވެމްކޯ މޮޅުވީ ސީދާ ތިން ސެޓުންނެވެ. އެ މެޗުގެ ސެޓުތައް ވެމްކޯއިން ގެންދިޔައީ 21-25، 23-25 އަދި 17-25 އިންނެވެ. މެޗުގެ މޮޅު ކުޅުންތެރިޔާގެ މަގާމަށް ހޮވުނީ ވެމްކޯގެ ޖެސިކާ ސޯރެސް ދާސް ނެވޭސްއެވެ.
ފައިނަލް މެޗަށްފަހު ބޭއްވި އިނާމު ދިނުމުގެ ރަސްމިއްޔާތުގައި ވަނަވަނައަށް ހޮވުނު ޓީމުތަކުގެ އިތުރުން އެކި މަގާމުތަކަށް ހޮވުނު ކުޅުންތެރިންގެ މައްޗަށް އެކުލެވޭ ޑްރީމް ޓީމު ވެސް ވަނީ ހޮވައިފައެވެ.
އަންހެން ޑިވިޝަންގެ ޑްރީމް ޓީމު:
- ފާތިމަތު ޖޫޒާން ޒަރީރު (ކްލަބު ވެމްކޯ) - ބެސްޓް ސެޓާ
- ހައްވާ ޝަޚާ (އަލްމާ ސްޕޯޓްސް ކްލަބު) - ބެސްޓް މިޑަލް ބްލޮކާ
- ހައްވާ ނާޒިމް (ކްލަބު ވެމްކޯ) - ސެކަންޑް ބެސްޓް މިޑަލް ބްލޮކާ
- އާއިޝަތު މާޖިދާ (ކްލަބު ވެމްކޯ) - ބެސްޓް އައުޓްސައިޑް ހިޓާ
- ހައްވާ ރާޝިދާ (ޕޮލިސް ކްލަބު) - ސެކަންޑް ބެސްޓް އައުޓްސައިޑް ހިޓާ
- އާމިނަތު އަރީޝާ (ކްލަބު ވެމްކޯ) - ބެސްޓް އޮޕަސިޓް ޕްލޭޔާ
- ނުހާ ވަހީދު (އަލްމާ ސްޕޯޓްސް ކްލަބު) - ބެސްޓް ލިބެރޯ ޕްލޭޔާ
- ޖެސިކާ ސޯރެސް ދާސް ނެވޭސް (ކްލަބު ވެމްކޯ) - ބެސްޓް އިންޓަނޭޝަނަލް ޕްލޭޔާ
- މާޔާ ހުސައިން ސަލާހު (ކްލަބު ވެމްކޯ) - މޯސްޓް ޕްރޮމިސިން ޕްލޭޔާ
- އާއިޝަތު މާޖިދާ (ކްލަބު ވެމްކޯ) - މޯސްޓް ވެލިއުބަލް ޕްލޭޔާ
- ޚާލިދު މުހައްމަދު (ކްލަބު ވެމްކޯ) - ކޯޗު